ތިންވަނަ އެމްބީއޭ ކަޕްގެ ދެވަނަ ޑިވިޝަންގައި ރެޑް ވިންގްސް ބާސްކެޓްބޯލް ކްލަބާ ދެކޮޅަށް ކުޅުނު ދެވަނަ މެޗުން ވެސް ސްޓިންގާސް ބާސްކެޓްބޯލް ކްލަބު މޮޅުވެއްޖެއެވެ.
ސޯޝަލް ސެންޓަރު އެތެރޭ ކޯޓުގައި އިއްޔެ ހަވީރު ކުޅުނު މެޗުގައި ވާދަވެރި ކުޅުމަކަށްފަހު ރެޑް ވިންގްސް އަތުން ސްޓިންގާސް މޮޅުވީ 78-73 ޕޮއިންޓުންނެވެ.
އެ މެޗުގައި ސްޓިންގާސްއަށް އެންމެ ގިނަ ޕޮއިންޓް ހޯދައިދިނީ އެޓީމަށް 26 ޕޮއިންޓް ހޯދައިދިން ސަބީހު ތައުފީގް މުހައްމަދެވެ. ރެޑް ވިންގްސްއަށް އެންމެ ގިނަ ޕޮއިންޓް ހޯދައިދިނީ މެޗުގެ މޮޅު ކުޅުންތެރިޔާގެ މަގާމަށް ވެސް ހޮވުނު މުހައްމަދު އަޝްމަލް އަހްމަދެވެ. އޭނާ ވަނީ އެޓީމަށް 33 ޕޮއިންޓް ހޯދައިދީފައެވެ.
ރެޑް ވިންގްސްއާ ދެކޮޅަށް ކުޅުނު ފުރަތަމަ މެޗުން ސްޓިންގާސް ފަސޭހަކަމާއެކު މޮޅުވިއިރު، ސްޓިންގާސް ކުޅުނު ދެވަނަ މެޗުގައި ރައިވެރިޔާ އަތުން ވަނީ މޮޅުވެފައެވެ. މިހާރު ސްޓިންގާސް އޮތީ ގްރޫޕް ދޭއްގެ އެއްވަނައިގައެވެ.
އެ މުބާރާތުގެ ދެވަނަ ޑިވިޝަންގައި ހަ ޓީމެއް ވާދަކުރާއިރު، އެ ޑިވިޝަން ކުރިއަށްދަނީ ދެ ގްރޫޕަކަށް ބަހާލައިގެންނެވެ. ގްރޫޕް އެކެއްގައި ހިމެނެނީ އެލްޓީއާއި ޔޫއެން ފްރެންޑްސް އަދި އެލްކިޔުއެވެ. ގްރޫޕް ދޭއްގައި ހިމެނެނީ ސްޓިންގާސްއާއި ރެޑް ވިންގްސް އަދި ރައިވެރިޔާއެވެ.
މުބާރާތުގެ ދެވަނަ ޑިވިޝަންގެ ސެމީ ފައިނަލަށް ކޮންމެ ގްރޫޕެއްގެ ވެސް އެއްވަނަ އަދި ދެވަނަ ޓީމު ދަތުރުކުރާނެއެވެ. ލީގު އުސޫލުން ކުޅުމަށްފަހު ފުރަތަމަ ޑިވިޝަންގެ ސެމީ ފައިނަލު ކުޅުމަށް ހަމަޖެހިފައިވެއެވެ. އެ ޑިވިޝަންގެ ސެމީގެ ފުރަތަމަ މެޗުގައި ލީގު އެއްވަނަ އާއި ހަތަރުވަނަ ޓީމު ބައްދަލުކުރާއިރު، ސެމީގެ ދެވަނަ މެޗުގައި ބައްދަލު ކުރާނީ ލީގުގެ ދެ ވަނަ އާއި ތިންވަނަ ޓީމެވެ.
މިއަހަރުގެ ބާސްކެޓްގެ ފުރަތަމަ މުބާރާތް ކަމަށްވާ އެމްބީއޭ ކަޕް ކުރިއަށްގެންދިއުމަށް ހަމަޖެހިފައިވަނީ މިމަހުގެ 7 ވަނަ ދުވަހުން ފެށިގެން މިމަހުގެ 27 ވަނަ ދުވަހުގެ ނިޔަލަށެވެ. އެ މުބާރާތުގެ މެޗުތައް ހަވީރު 16:30 އަދި ރޭގަނޑު 20:30ގައި ކުރިއަށްދާނެއެވެ.