އިސްލާމިކް ޔުނިވާސިޓީ އޮފް މޯލްޑިވްސް (އައިޔޫއެމް) އިން ހުޅުމާލޭގައި އަޅާ ވަގުފު އިމާރާތަށް ބިން ހަމަޖެހިފައިވާ ކަމަށް އެ ޔުނިވާސިޓީގެ ޗާންސެލާ ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެެވެ.
އިސްލާމިކް ޔުނިވާސިޓީގައި މިއަދު ބޭއްވި ނޫސްވެރިންގެ ބައްދަލުވުމެއްގައި ޝަހީމް ވިދާޅުވީ، މިދިޔަ ހަފްތާތެރޭގައި އަބްދުﷲ ޔާމީން އަބްދުލް ގައްޔޫމާ އެކު ބޭއްވި ބައްދަލުވުމެއްގައި ބިން ހަމަޖައްސަވައި ދެއްވާނެ ކަމަށް ވިދާޅުވެފައިވާ ކަމަށެވެ.
އޭނާ ވިދާޅުވީ، ކޮންމެ ޔުނިވާސިޓީއެއް ނުވަތަ ކޮލެޖެއްގައި ވެސް އެތަނަކަށް ބޭނުންވާ ފައިސާ ހޯދާނެ ވަސީލަތެއް ގާއިމް ކުރަން ޖެހޭ ކަމަށެވެ. އެގޮތުން ވަގުފު އިމާރާތުން އެ ޔުނިވާސިޓީ ހިންގުމަށް ބޭނުންވާ ފައިސާ އާއި އެހެނިހެން ކަންކަމަށް ހޭދަކުރާނެ ފައިސާ ހޯދާނެ ކަމަށެވެ.
"މި ޔުނިވާސިޓީ ކޮލެޖު ދުވަސްވަރުން ފެށިގެން ވެސް، މައުހަދު ދުވަސްވަރުން ފެށިގެން ވެސް ދައުލަތުގެ ބަޖެޓަށް ބަރޯސާވެގެން ކުރިއަށް މިދަނީ. އެއީ އަޅުގަނޑުމެން ވަރަށް ބޮޑަށް ޝުކުރުވެރިވެ، އުފާ ކުރާ ކަމެއް ވެސް މެ. އެހެން ނަމަވެސް އެއްވެސް ޔުނިވާސިޓީއެއް ކޮލެޖެއް، އޭގެ އަމިއްލަ ވަސީލަތްތައް ހުންނަން ޖެހޭ ލާރި ހޯދާނެ ވަސީލަތްތައް،" ޝަހީމް ވިދާޅުވި އެވެ.
ޝަހީމް ވިދާޅުވީ، އެ އިމާރާތްކުރުމުގެ މަސައްކަތް މިއަހަރުގެ ތެރޭގައި ފަށާނެ ކަމަށާއި، އަންނަ އަހަރު ތެރޭގައި އެ މަސައްކަތް ނިންމާލެވޭނެ ކަމަށެވެ.
އޭނާ ވިދާޅުވީ، އެ މަޝްރޫއު އެކުލަވާލައިފައިވާ ގޮތާއި، އިމާރާތަށް ހަރަދުވާނެ ވަރާއި އިމާރާތް އެޅުމަށް ލިބިފައިވާ ބިމުގެ ބޮޑުމިނާއި އިތުރު ތަފްސީލް ފަހުން ހާމަކުރައްވާނެ ކަމަށް ވިދާޅުވި އެވެ.