މެނީލާ (ޖެނުއަރީ 30): ފިލިޕީންސްގައި އިއްޔެ ނިމިގެންދިޔަ މިސް ޔުނިވާސް މުބާރާތުގައި މިސް ޔުނިވާސްގެ ތާޖު ފްރާންސުގެ ރީތީގެ ރާނީ އައިރިސް މިޓެނައިރީ ކާމިޔާބުކޮށްފި އެވެ.
ޑެންޓިސްޓްރީ ކިޔަވަމުންދާ އުމުރުން 23 އަހަރުގެ މިޓެނައިރީގެ ބޮލުގައި މިސް ޔުނިވާސްގެ ތާޖު އަޅުވާފައި ވަނީ މިދިޔަ އަހަރުގެ މިސް ޔުނިވާސް ޕިއާ ވޯޓްސްބާގް އެވެ.
މިސް ޔުނިވާސްގެ ލަގަބު ލިބިއްޖެ ނަމަ އަނގަ އާއި ދަތުގެ ސިއްހަތާ ބެހޭ ގޮތުން ހޭލުންތެރިކަން އިތުރު ކުރާނެ ކަމަށް ބުނެފައިވާ މިޓެނައިރީ އެލަގަބު ކާމިޔާބު ކުރީ 86 ގައުމެއްގެ ރީތީގެ ރާނީންނާ ވާދަކޮށެވެ.
ފިލިޕީންސްގެ ވެރިރަށް މެނީލާގެ މޯލް އޮފް އޭޝިއާ އެރީނާގައި މިއަދު އޮތް މިސް ޔުނިވާސް މުބާރާތުން ފަސްޓް ރަނަރަޕްގެ މަގާމު މިސް ހެއިޓީ، ރަކޭލް ޕެލިސިއާ ހޯދި އިރު، ދެ ވަނަ ރަނަރަޕްގެ މަގާމު ލިބުނީ މިސް ކޮލަމްބިއާ، އެންޑްރިއާ ޓޯވާ އަށެވެ.
މިދިޔަ އަހަރު އޮތް މިސް ޔުނިވާސް މުބާރާތުގައި ހޯސްޓް ސްޓީވް ހާވޭ ވަނީ އޮޅުމަކުން މިސް ކޮލަމްބިއާ އަކީ މިސް ޔުނިވާސް ކަމަށް އިއުލާން ކޮށްފަ އެވެ. އަދި މިސް ކޮލަމްބިއާ، އަރިއަޑްނާ ގުޓެއިރޭޒްގެ ބޮލުގައި މިސް ޔުނިވާސްގެ ތާޖު އެޅުވި ފަހުން ޖެހުނީ އެ ތާޖު އަސްލު މިސް ޔުނިވާސް ކަމަށްވާ ފިލިޕީންސްގެ ރީތީގެ ރާނީގެ ބޮލުގައި އަޅުވާށެވެ. އޭގެ ސަބަބުން ސްޓީވް ހާވޭއަށް ގިނަ ބަޔެއްގެ ފާޑު ކިޔުން އަމާޒުވި އެވެ. (އޭޕީ)