ޓީމު މެންބަރެއް މަނާ ބޭހަށް ޕޮޒިޓިވްވުމުން ޖެމެއިކާގެ ދުވުންތެރިޔާ އުސައިން ބޯލްޓް އަތުން މެޑެއްޔެއް ގެއްލިއްޖެ އެވެ.
އޮލިމްޕިކްސްގައި ބޯލްޓް ހޯދާފައިވާ ނުވަ ރަން މެޑެލްގެ ތެރެއިން އެއް މެޑެލް ގެއްލިފައި ވަނީ އޮލިމްޕިކް ގޭމްސް 2008ގައި ޖެމެއިކާގެ ރިލޭ ޓީމުގައި ހިމެނުނު ނެސްޓާ ކާޓާ، މަނާ ބޭހެއް ކަމަށްވާ މެތައިލްހެކްޒަނިއަމިން އަށް ޕޮޒިޓިވް ވުމުންނެވެ. ބައިޖިންގައި ބޭއްވި އޮލިމްޕިކްސް ގޭމްސްގައި ދެ ފަހަރެއްގެ މަތިން ކާޓާ، ޑްރަގް ޓެސްޓް ހަދާފައިވެ އެވެ.
ކާޓާ މަނާ ބޭސް ބޭނުންކޮށްފައިވުމުން އިންޓަނޭޝަނަލް އޮލިމްޕިކް ކޮމިޓީ (އައިއޯސީ)އިން ވަނީ އޮލިމްޕިކް ގޭމްސް 2008ގެ ހަތަރެއް ގުނަ 100 މީޓަރު ދުވުން ކާމިޔާބުކުރި ޖެމެއިކާ ޑިސްކޮލިފައި ކޮށްފަ އެވެ. އެހެންކަމުން ނެސްޓާއާއި ބޯލްޓްގެ އިތުރުން ޖެމެއިކާގެ ރިލޭ ޓީމުގައި ދެން ހިމެނޭ މައިކަލް ފްރޭޓާއާއި އަސާފާ ޕޮވެލްގެ މެޑެލް ވެސް އައިއޯސީއާ ހަވާލުކުރަން ޖެހޭނެ އެވެ.
ކާޓާގެ ވަކީލު ސްޓުއާޓް ސިމްޕްސަން ބުނީ، ޖެމެއިކާގެ ދުވުންތެރިޔާ ކާޓާ އެ މައްސަލަ ކޯޓް އޮފް އާބިޓްރޭޝަން އޮފް ސްޕޯޓް (ސީއޭއެސް)ގައި އިސްތިއުނާފް ކުރާނެ ކަމަށެވެ.
ރަން މެޑެލް ގެއްލުނު ޖެމެއިކާ ޓީމު މެންބަރުންގެ ތެރޭގައި ހިމެނޭ ބޯލްޓްއަކީ ދުނިޔޭގެ އެންމެ ބާރު ދުވުންތެރިޔާ އެވެ. ބޯލްޓް ވަނީ ފާއިތުވެ ދިޔަ ތިން އޮލިމްޕިކްސްގައި ވާދަކޮށް، އޭނާ ދުވި ހުރިހާ އިވެންޓަކުން ރަން މެޑެލް ހޯދައިފަ އެވެ.
ޖެމެއިކާގެ ރިލޭ ޓީމު ޑިސްކޮލިފައި ކުރުމުން ދެން ރަން މެޑެލް ލިބޭނީ ދެވަނަ އަށް ރޭސް ފުރިހަމަކުރި ޓްރިނިޑާޑް އެންޑް ޓޮބޭގޯއަށެވެ. ގޭމްސްގައި ލޯ މެޑެލް ހޯދި ޖަޕާނަށް އެ އިވެންޓްގެ ރިހި މެޑެލް ލިބޭއިރު، ލޯ މެޑެލް ލިބޭނީ ހަތަރުވަނައަށް ނިންމި ބްރެޒިލްއަށެވެ.