ސްޓޭޓް އިލެކްޓްރިކް ކޮމްޕެނީ (ސްޓެލްކޯ) އިން ތެލުގެ ސާޗާޖުގެ ގޮތުގައި ނަގާ މިންވަރު ކުރިއަށް ވުރެ ބޮޑުކޮށް، ޔުނިޓަކަށް 38 ލާރި ނަގަން ފަށައިފި އެވެ.
މީގެ ކުރިން، މިދިޔަ ޑިސެމްބަރު މަހުގެ ނުވަ ވަނަ ދުވަހުން ފެށިގެން ނަގަމުން އައީ 27 ލާރި އެވެ. މިއީ އެ ކުންފުނިން އެއް މަސް ތެރޭގައި ފިއުލް ސާޗާޖު ބޮޑުކުރި ދެވަނަ ފަހަރެވެ.
މިދިޔަ ސެޕްޓެމްބަރު 19 އިން ފެށިގެން ސާޗާޖުގެ ގޮތުގައި ޔުނިޓަކަށް ނަގަމުން އައީ ހަތަރު ލާރި އެވެ. ނޮވެމްބަރު 16 އިން ފެށިގެން ވަނީ ޔުނިޓަކަށް ނަގާ މިންވަރު 12 ލާރިއަށް ބޮޑުކޮށްފަ އެވެ. އޭގެ ފަހުން ޑިސެމްބަރު 9ގައި ޔުނިޓަކަށް 27 ލާރި ހަމަޖެއްސި އެވެ.
އެހެންކަމުން ސަރުކާރުން ކަރަންޓުގެ އަގަށް މިދިޔަ ފެބްރުއަރީ މަހު ބަދަލު ގެނައި ފަހުން، މިހާތަނަށް ހަތަރު ފަހަރެއްގެ މަތިން ތެލުގެ ސާޗާޖު، ކަރަންޓް ބިލުގައި މިވަނީ ހިމަނައިފަ އެވެ.
ސްޓެލްކޯގެ ވެބްސައިޓްގައިވާ ގޮތުން މިދިޔަ ހުކުރު ދުވަހުގެ ފަހުން ތައްޔާރުކުރާ ބިލްތަކަށް، ތެލުގެ ސާޗާޖުގެ ގޮތުގައި ނަގާނީ، 11 ލާރި ބޮޑުކޮށް، ޔުނިޓަކަށް 38 ލާރި އެވެ.
ސްޓެލްކޯ އަށް ޑީސަލް ގަންނަން ލިބޭ އަގު ލީޓަރެއް އަށް ރުފިޔާ އަށް ވުރެ ބޮޑުވާ ނަމަ އިތުރުވާ ކޮންމެ 10 ލާރިއަކަށް ތިން ލާރީގެ ފިއުލް ސާޗާޖު ނެގުމުގެ ހުއްދަ މޯލްޑިވްސް އެނާޖީ އޮތޯރިޓީން އޮންނަނީ ދީފަ އެވެ. އެ ކުންފުންޏަށް މިހާރު ޑީސަލް ލީޓަރެއް ގަންނަން ލިބެނީ 9.28 ރުފިޔާ އަށެވެ.