ރާއްޖޭގައި ހަރަކާތްތެރިވުމުގެ ލައިސަންސް ލިބުނު ފުރަތަމަ ރޭޓިންގ އޭޖެންސީ، އިންޑިއާގެ ރޭޓިންގްސް ކުންފުނި، ކްރެޑިޓް އެނެލިސިސް އެންޑް ރީސާޗް ލިމިޓެޑް (ކެއާ ރޭޓިންގްސް) ރާއްޖޭގައި އޮޕަރޭޓުކުރުން ހުއްޓާލައިފިއެވެ.
ކެއާ ރޭޓިންގްސް މޯލްޑިވްސްގެ ގޮތުގައި ކެއާާ ރޭޓިންގްސްއިން ރާއްޖޭގައި ޚިދުމަތް ދިނުމުގެ ލައިސަންސް ލިބުނީ 2011 ވަނަ އަހަރުއެވެ. ކެޕިޓަލް މާކެޓިން ޑިވެލޮޕްމެންޓް އޮތޯރިޓީއިން ކެއާ ރޭޓިންގްސްއަށް ރާއްޖޭގައި އޮޕަރޭޓުކުރުމުގެ ލައިސަންސް ދިނީ 2011 ޖެނުއަރީ ހަވަނަ ދުވަހުއެވެ.
ކެއާ ރޭޓިންގްސް މޯލްޑިވްސްގެ ލައިސަންސް މިއަހަރުގެ ޖެނުއަރީ ހަވަނަ ދުވަހަށް ހަމަވި އިރު، އެކުންފުނިން ނެރުނު ބަޔާނެއްގައި ބުނީ، އެކުންފުނިން މިހާތަނަށް ރާއްޖޭގައި ހިންގި އޮޕަރޭޝަންތަކާއި، ރާއްޖޭގައި އޮތް މުސްތަގުބަލަށް ބަލާ އިރު ލައިސަންސް އާކުރަން ނުފެންނަ ކަމަށެވެ.
"އެހެންކަމުން، 2017 ޖެނުއަރީ ހަޔަކަށް ފަހު ރާއްޖޭގައި ކެއާ ރޭޓިންގްސްގެ އޮޕަރޭޝަންތައް ބަންދު ކުރެވޭނެ،" އެކުންފުނިން ނެރުނު ބަޔާނުގައި ވެއެވެ.
ކެއާ ރޭޓިންގްސްއިން 2011 ވަނަ އަހަރު ވަނީ، ސަރުކާރުގެ ކުންފުނި "ވޯކްސް ކޯޕަރޭޝަން ލިމިޓެޑް"އަށް ކްރެޑިޓު ރޭޓިންގް ދީފައެވެ. މީގެ އިތުރުން 2012 ވަނަ އަހަރު، އެޗްޑީއެފްސީއިން ވިއްކި ބޮންޑުތަކަށް ވެސް ކްރެޑިޓް ރޭޓިންގް ދީފައިވެއެވެ.
މީގެ އިތުރުން ކެއާ ރޭޓިންގްސްއިން ރާއްޖޭގައި ހަރަކާތްތެރިވި އިރު، ރާއްޖޭގެ އިގްތިސާދާ ބެހޭ ބައެއް ރިޕޯޓުތަކާއި، ރާއްޖޭގެ ފަތުރުވެރިކަމުގެ ދާއިރާއާ ގުޅޭ ދިރާސާ ރިޕޯޓެއް ވެސް އެކުލަވާލައި، އާންމުކޮށްފައިވެއެވެ.
ކެއާ ރޭޓިންގްސްއަކީ އިންޑިއާގެ މުމްބާއީގައި 1993 ވަނަ އަހަރު ގާއިމުކުރި ރޭޓިންގްސް ކުންފުންޏެކެވެ. އެކުންފުންޏަކީ އިންޑިއާގައި ދެވަނައަށް އެންމެ ބޮޑު ރޭޓިންގްސް ކުންފުންޏެވެ.