މިސްރުން ރާއްޖެ އެތެރެކުރާ ސްޓްރޯބެރީން މިހާތަނަށް މައްސަލައެއް ފާހަގަކުރެއްވިފައި ނުވާ ކަމަށް މޯލްޑިވްސް ފުޑްއެންޑް ޑްރަގް އޮތޯރިޓީ (އެފްޑީއޭ) ބުނެފި އެވެ.
މި އަހަރުގެ އޮކްޓޫބަރު މަހު ޔޫއެސް އިން ވަނީ މިސްރުން "ފްރޯޒެން ސްޓްރޯބެރީސް" އެތެރެކުރުން މަނާކޮށްފަ އެވެ. އެއީ އޭގެން ހެޕަޓައިޓިސް އޭ ފެނިގެން ކަމަށް ބައެއް ނޫސްތަކުގައި ވަނީ ރިޕޯޓްކޮށްފަ އެވެ.
އެފްޑީއޭގެ އޮފިޝަލަކު "ސަން"އަށް ވިދާޅުވީ މިސްރުން ރާއްޖެ އެތެރެ ކުރަނީ ރޯ ސްޓްރޯބެރީ ކަމަށާއި އޭގެން މިހާތަނަށް އެއްވެސް މައްސަލައެއް ފެނިފައި ނުވާ ކަމަށެވެ. އަދި ޑަބްލިއުއެޗްއޯ އާއި އީޔޫއިންވެސް އެފަދަ އެލާޓެއް ފޮނުވާފައި ނުވާ ކަމަށް އެފްޑީއޭއިން ބުންޏެވެ.
"ސޯޝިއަލް މީޑިއާގައި އެފަދަ ހަބަރުތަކެއް އުޅޭތީ އަޅުގަނޑުމެން ބަލައިފިން. މިހާތަނަށް އަދި މިސްރުން އެތެރެކުރާ ސްޓްރޯބެރީން މައްސަލައެއް ފާހަގަކުރެވިފައެއް ނެތް. އަނެއްކާ މައްސަލަޖެހިގެން އެމެރިކާގައި ބޭން ކުރީ ފްރޯޒަން ސްޓްރޯބެރީސް، ރާއްޖެ މި އެތެރެކުރަނީ ރޯ ސްޓްރޯބެރީ،" އެފްޑީއޭގެ އޮފިޝަލަކު ވިދާޅުވި އެވެ.
ރާއްޖޭގައި މިހާރު ސްޓްރޯ ބެރީ ތިޔާގިވެ، އަގުވެސް ވަނީ ވަރަށް ބޮޑުތަނުން ހެޔޮ ވެފަ އެވެ. މީގެކުރިން 70 އަށް 50 ލިބޭ ސްޓްރޯބެރީ ފޮއްޓެއް މިހާރު 15 ނުނީ 20 ރުފިޔާއަށް ލިބެ އެވެ.
ރާއްޖެއަށް ސްޓްރޯބެރީ އެތެރެކުރާ ބައެއް ފަރާތްތަކުން ބުނީ މިއީ މިސްރުގައި ސްޓްރޯބެރީ މޫސުން ކަމުން އެ ގައުމުން ސްޓްރީބެރީ އަގުހެޔޮކޮށް ލިބޭ ކަމަށެވެ.