ކޮންމެ ދިވެއްސަކަށް ކީރިތި ގުރުއާނުގެ ކޮޕީއެއް ނުވަތަ މުސްހަފެއް ދިނުމަށް ސަރުކާރުން ފެށި މަޝްރޫއުގެ ދަށުން މުސްހަފް ބަހަން މިއަދު ފަށައިފި އެވެ.
އިސްލާމިކް މިނިސްޓްރީ އަދި ޕަބްލިކް ސާވިސް މީޑިއާ ގުޅިގެން އުފެއްދި ދީނީ ޗެނަލް އިފްތިތާހްކުރުމަށް މިއަދު ރައީސް އޮފީހުގައި ބޭއްވި ރަސްމިއްޔާތުގައި ރާއްޖެއަށް ހާއްސަކޮށްގެން ޗާޕްކުރި މުސްހަފްތައް ބަހަން ފައްޓަވާފައިވަނީ ރައީސް އަބްދުﷲ ޔާމީން އެވެ.
މުސްހަފް ބަހަން ފެއްޓުމުގެ ގޮތުން މުސްހަފް މާލްދީފްގެ ފުރަތަމަ ކޮޕީ ދީފައި ވަނީ ކީރިތި ޤުރުއާނާ ބެހޭ މަރުކަޒުގައި ޤުރުއާން ހިތުދަސް ކުރަމުންދާ ފަސް ކުއްޖަކަށެވެ.
"މުސްހަފް މާލްދީފް" ނުވަތަ "ކޮންމެ ދިވެހި ރައްޔިތަކަށް މުޞްހަފެއް"ގެ ނަމުގައި ދިވެހި ކޮންމެ ރައްޔިތަކަށް މުސްހަފެއް ދިނުމަށް ސަރުކާރުން މަޝްރޫއެއް ފެށީ، ކުރީގެ އިސްލާމިކް މިނިސްޓަރު މުހައްމަދު ޝަހީމްގެ ބެއްލެވުމުގެ ދަށުން، މީގެ ދެ އަހަރު ކުރިންނެވެ.
ރާއްޖޭގެ އިސްލާމިކް މިނިސްޓްރީ އާއި ރާއްޖޭގެ ޖަމިއްޔާތަކާއި ބަހުރެއިންގެ ޤުރުއާން ކެއާ ސޮސައިޓީއާ ގުޅިގެން ފެށި އެ މަޝްރޫއަށް ފައިސާ ހޯދާފައިވަނީ ސަރުކާރުގެ ބަޖެޓުން އެއްވެސް ފައިސާއެއް ނުނަގައި ދިވެހި ބައެއް ކުންފުނިތަކާއި އާންމުން ހަދިޔާ ކުރާ ފައިސާއިންނެވެ. އެ މަޝްރޫއަށް ބަހުރެއިންގެ ޤުރުއާން ކެއާ ސޮސައިޓީން ވެސް ބައިނަލްއަގްވާމީ ގޮތުން އެހީތެރިކަން ހޯދަން އެއްބަސްވެފައިވެ އެވެ.
މަޝްރޫއުގެ ދަށުން ފުރަތަމަ ޝިޕްމަންޓުގައި ރާއްޖެ ގެނެސްފައި ވަނީ 100،000 މުސްހަފެވެ. އަދި އިސްލާމިކް މިނިސްޓްރީން އެ މުސްހަފްތައް ކުރިން ބަހަން ނިންމީ ކޮންމެ ގޭބިސީއަކަށް މުސްހަފެއްގެ ގޮތުގަ އެވެ.
ނަމަވެސް އިސްލާމިކް މިނިސްޓްރީގެ މީޑިއާ ކޯޑިނޭޓަރު މުހައްމަދު އަހުސަން ވިދާޅުވީ، މުސްހަފްތައް މިހާރު ބަހަން ހަމަޖެހިފައި ވަނީ އުމުރުން 15 އަހަރާއި 40 އަހަރާ ދެމެދުގެ ކޮންމެ މީހަކަށް މުސްހަފެއްގެ ގޮތުގައި ކަމަށެވެ.
އެކަމަށް ބޭނުންވާ ޑޭޓާ ބޭސްތައް އަންނަ ޖަނަވަރީ މަހުގެ ފުރަތަމަ ހަފްތާ ތެރޭގައި ނިންމާލައި އަންނަ މަސް ނިމުމުގެ ކުރިން ކަނޑައެޅި އުމުރުފުރާގެ ކޮންމެ ދިވެއްސަކަށް މުސްހަފެއް ފޯރުކޮށްދެވޭނެ ކަމަށް އަހުސަން ވިދާޅުވި އެވެ.
އަދި ވިދާޅުވީ، ޗާޕްކޮށްގެން ގެންނަ ދެވަނަ ޝިޕްމަންޓުގައި ކޮންމެ ދިވެއްސަކަށް މުސްހަފެއް ލިބިގެންދާނެ ކަމަށެވެ. ނަމަވެސް ދެވަނަ ޝިޕްމަންޓް ގެނެވޭނެ ތާރީހެއް އަދި ވިދާޅުވުމަށް ދަތި ކަމަށް އަހުސަން ވިދާޅުވި އެވެ.
މިއަދުގެ ރަސްމިއްޔާތުގައި ވާހަކަފުޅުދައްކަވަމުން އިސްލާމިކް މިނިސްޓަރު ޑރ. އަހުމަދު ޒިޔާދު ބާގިރު ވިދާޅުވީ ގުރުއާންގެ އިލްމު ކުރިއެރުވަން އިސްލާމީ ބައެއް ގައުމުތަކުން ވެސް ރާއްޖެއަށް އެހީތެރިވަމުން އަންނަ ކަމަށެވެ.
މިއީ ރައީސް ޔާމީން އިސްލާމީ ގައުމުތަކާއި އަރަބި ގައުމުތަކާ ބާއްވާ ގާތް ގުޅުމުގެ ނަތީޖާ ހާމަވެގެންދާ ކަމެއްކަމަށް ފާހަގަކުރައްވާ މިނިސްޓަރު ވިދާޅުވީ، އެ އެހީތައް ވަރަށް އަވަހަށް ލިބެން ފަށާނެ ކަމަށެވެ.
އެގޮތުން ގުރުއާނުގެ އިލްމު ފުޅާކުރުމަށް ޓަކައި ސައުދީ އަރަބިއްޔާގެ އެހީތެރިކަމާ އެކު 1000 ވުރެ ގިނަ ހަތިމު ލިބިފައިވާ އިރު ތުރުކީގެ ސަރުކާރު 2000 ހަތިމު ލިބިފައިވާ ކަމަށް މިނިސްޓަރު ވިދާޅުވި އެވެ.
އަދި ވިދާޅުވީ، ކައިރި މުސްތަގުބަލެއްގައި ގަތުރާއި އެމިރޭޓްސް ސަރުކާރުން 60،000 ވުރެ ގިނަ ހަތިމް ލިބޭނެ ކަމަށް އުއްމީދު ކުރައްވާ ކަމަށެވެ.