މިނިސްޓްރީ އޮފް އިސްލާމިކް އެފެއާޒުގެ ދީނީ ވަގުފް ފަންޑުން ރައީސް އަބްދުﷲ ޔާމީން އަބްދުލް ގައްޔޫމްގެ އަނބިކަނބަލުން، މެޑަމް ފާތުމަތު އިބްރާހީމަށް ނިސްބަތްވާ ސަދަގާތު ފައުންޑޭޝަންގެ އެކައުންޓަށް 12،000 އެމެރިކާ ޑޮލަރު ޖަމާކުރުމަށް އިސްލާމިކް މިނިސްޓްރީ އިން ފިނޭންސް މިނިސްޓްރީ އަށް އަންގާފައިވާ ކަމަށް ބުނާ މައްސަލަ އަކީ ކޮރަޕްޝަނުގެ ކުށެއް އެކުލެވިގެންނުވާ މައްސަލައެއް ކަމުގައި އެންޓި ކޮރަޕްޝަން ކޮމިޝަނުން ކަނޑައަޅައިފި އެވެ.
އޭސީސީ އިން ތަހުގީގުކޮށް ނިންމާފައި ވަނީ އަބޫދާބީގެ އަމިއްލަ ޖަމާއަތަކުން އިސްލާމިކް މިނިސްޓްރީގެ ވަގުފް ފަންޑަށް ހަދިޔާކޮށްފައިވާ 24،000 އެމެރިކާ ޑޮލަރުގެ ތެރެއިން 12،000 އެމެރިކާ ޑޮލަރު ސަދަގާތު ފައުންޑޭޝަނަށް ޖަމާކޮށްފައިވާ ކަމަށް ބުނާ މައްސަލަ އެކެވެ.
މައްސަލަ ބެލުމަށް ފަހު އޭސީސީ އިން ތައްޔާރު ކުރި ރިޕޯޓުގައި ބުނެފައި ވަނީ އަބޫދާބީގެ އަމިއްލަ ޖަމްޢިއްޔާއަކުން 1437 ވަނަ އަހަރު ރަމަޟާން މަހު މިސްކިތްތަކުގައި އިފްތާރް ޕްރޮގްރާމްގެ ނަމުގައި ޕްރޮގްރާމެއް ރާވައި ކުރިއަށް ގެންދިއުމަށް އެހީގެ ގޮތުގައި، ފެޑެރަލް ރިޒަރވް ބޭންކް އޮފް ނިއުޔޯކުގައި އޮންނަ މޯލްޑިވްސް މަނިޓަރީ އޮތޯރިޓީގެ ޕަބްލިކް ބޭންކް އެކައުންޓަށް 24,980 އެމެރިކާ ޑޮލަރު ޖަމާކޮށްދީފައިވާ ކަން އެނގޭ ކަމަށެވެ.
އެ ފައިސާ އަކީ އެ މިނިސްޓްރީ އިން އިންތިޒާމުކޮށްގެން ބާއްވާ ރޯދަވީއްލުމަށާއި، ދީނީ ހަރަކާތްތައް ކުރިއަށް ގެންދިއުމަށާއި، ސަދަގާތް ފައުންޑޭޝަނަށް ރޯދަމަހު ކުރިއަށްގެންދާ ޙަރަކާތްތަކަށް ފޮނުވާފައިވާ ފައިސާކަމަށް ރިޕޯޓުގައިވެ އެވެ.
ވަގްފް ފަންޑް ހިންގާ އުސޫލުގެ ދަށުން އެ ފަންޑަށް ލިބޭ ފައިސާ ދޫކުރުމުގައި މެމްބަރުން މަޝްވަރާކުރުމަށް ފަހު ދޫކުރާނެ ފައިސާގެ މިންވަރު ކަނޑައެޅުމަކީ ކޮމިޓީއާ މަތިކުރެވިފައިވާ މަސައްކަތެއްކަން އެނގޭއިރު، ވަގްފް ފަންޑް ކޮމިޓީގެ 12 ވަނަ ބައްދަލުވުމުގައި އަބޫދާބީގެ ޖަމިއްޔާއިން ޖަމާކޮށްފައިވާ ފައިސާގެ ތެރެއިން 12,000 އެމެރިކާ ޑޮލަރަށްވާ ދިވެހި ރުފިޔާ ސަދަގާތު ފައުންޑޭޝަނަށް ދިނުމަށް ނިންމާފައިވާ ކަމަށް ވެސް އޭސީސީގެ ތަހުގީގު ރިޕޯޓުގައިވެ އެވެ.
ހަމަ އެއާއެކު އިސްލާމިކް މިނިސްޓްރީ އިން އަބޫދާބީގެ ޖަމިއްޔާގެ އިސްވެރިންނާ އެކު ކުރި މަޝްވަރާތަކުގައި އެއްބަސްވެފައިވާ ގޮތަށް އެ މިނިސްޓްރީގެ ދީނީ ކަންތައްތައް ކުރިއެރުވުމަށް އެހީވާ ވަގްފް ފަންޑަށް ޖަމާކުރެވިފައިވާ ފައިސާގެ ތެރެއިން 12,000 އެމެރިކާ ޑޮލަރަށްވާ ދިވެހި ފައިސާ ސަދަގާތް ފައުންޑޭޝަންގެ އެކައުންޓަށް ޖަމާކޮށް ދިނުމަށް އެދޭ ކަމަށް ބަޔާންކޮށް އިސްލާމިކް މިނިސްޓްރީ އިން ފިނޭންސް މިނިސްޓްރީ އަށް ސިޓީ ފޮނުވާފައިވާ ކަމަށް ވެސް އޭސީސީގެ ރިޕޯޓުގައި ފާހަގަކޮށްފައިވެ އެވެ.
ނަމަވެސް ސަދަގާތް ފައުންޑޭޝަންގެ އެކައުންޓަށް އެ ފައިސާ ޖަމާކޮށްދިނުމަށް އެދި އިސްލާމިކް މިނިސްޓްރީ އިން ފިނޭންސް މިނިސްޓްރީ އަށް ސިޓީ ފޮނުވުމަށް ފަހު އިސްލާމިކް މިނިސްޓްރީ އިން އެ ސިޓީ ކެންސަލްކޮށްފައިވާ ކަމަށާއި އަދި އެ ސިޓީގައި އެދިފައިވާ ގޮތަށް ފިނޭންސް މިނިސްޓްރީ އިން ސަދަގާތް ފައުންޑޭޝަންގެ އެކައުންޓަށް އެ ފައިސާ ޖަމާކޮށްފައިނުވާ ކަމަށް އޭސީސީގެ ތަހުގީގު ރިޕޯޓުގައިވެ އެވެ.
އެހެންކަމުން އެންޓިކޮރަޕްޝަން ކޮމިޝަނުގެ ގާނޫނުގެ ދަށުން އެ މައްސަލައަކީ ކޮރަޕްޝަނުގެ ކުށެއް އެކުލެވިގެން ނުވާ މައްސަލައެއްކަމުގައި އޭސީސީ އިން ވަނީ ކަނޑައަޅާފަ އެވެ.
އޭސީސީ އިން ވަނީ ވަގުފް ފަންޑުގެ ޓްރަސްޓް ސްޓޭޓްމަންޓްގެ ޖަދުވަލު ދޭކަށް މިދިޔަ އަހަރުގެ ޑިސެމްބަރު މަހުގެ 17 ވަނަ ދުވަހު ގެނެވުނު ހަތަރު ވަނަ އިސްލާހުގެ 15 ވަނަ ނަންބަރުގައި، ވަކިކަމެއް ކުރުމަށް ފައިސާ ދޭފަރާތަކުން ފައިސާ ދީފައިވާ ބޭނުމަށް އެ ފައިސާ ހަރަދުކުރެވިދާނެ ކަމަށް ބަޔާންކޮށްފައިވުމާއި، އަބޫ ދާބީގެ ޖަމިއްޔާ އިން މިނިސްޓްރީގެ ދީނީ ފަންޑަށް ޖަމާކުރި ފައިސާ އިން ހަރަދު ކޮށްގެން، ވަކި މިސްކިތެއްގައި ނުވަތަ ވަކި މިސްކިތްތަކެއްގައި ނުވަތަ ކީރިތި ގުރްއާން އުނގަންނައިދޭ ނުވަތަ ޔަތީމްޚާނާތަކުގައި ނުވަތަ އިޖްތިމާއީ ހިދުމަތްތައްދޭ މަރްކަޒްތައް މެދުވެރިކޮށް އެ ޕްރޮގްރާމް ހިންގިދާނެކަން ތަހުގީގަށް ފާހަގަ ކުރެވިފައިވާ ކަމަށް ބުނެފަ އެވެ.