ރައީސް މައުމޫން އެމްޑީޕީއަށް ސޮއިކުރެއްވުން!

ޢަބްދުﷲ ޝިނާން

ދުނިޔެ މިހާތަނަށް ދުށް އެންމެ ގަދަފަދަ އެއް އަސްކަރީ ޝަހުސިއްޔަތަކީ ފަރަންސޭސި އިންގިލާބުގެ ފަހުކޮޅު ވިދާލި ނަޕޯލިއަން ބޮނަޕާރޓްއެވެ. އޭނާގެ ފަލްސަފާއަކީ މި ދުނިޔެމަތީގައި ނުވާނެ، ނުކުރެވޭނެ އެއްވެސް ކަމެއް ނޯންނާނެ ކަމުގެ ފަލްސަފާއެވެ. އޭނާ ވިދާޅުވެފައި ވެއެވެ. "ނުވާނެ، ނުކުރެވޭނެ" މި ބަސްތައް ފެންނާނީ ހަމައެކަނި މޮޔައިންގެ ރަދީފުންނެވެ."
ބޮނަޕާރޓުގެ ޕަލްސަފާގެ ނަޒަރުން ބަލާ އިރު، ކުރީގެ ރައީސް އަލްއުސްތާޛު މައުމޫނު ޢަބްދުލްޤައްޔޫމް އެމްޑީޕީއަށް ސޮއި ކުރައްވައިފާނެއެވެ. އެމްޑީޕީގެ ރީނދޫ ޕޯޑިއަމަށް އަރާވަޑައިގެންފާނެއެވެ. އަދި މިހާރުގެ ރައީސް ނަޝީދާ ކޮނޑާއި ކޮނޑު ޖައްސަވައި ސަލާމް ކުރައްވާ ތަން ވެސް ފެނިދާނެއެވެ. ނަމަވެސް ހެޔޮވިސްނޭ އެއްވެސް މީހަކު މިހެން މިކަން ވެދާނެ ކަމަކަށް ގަބޫލެއް ނުކުރާނެއެވެ. ނަޕޯލިއަން ވިދާޅުވިޔަސް، ލިންކަން ވިދާޅުވިޔަސް މި ވަހާކަ ގަބޫލު ކުރާނެ މީހަކު މި ރާއްޖެއިން ހޯދުމަކީ ދަތި ކަމެކެވެ. އެކަމަކު މިއަދު އަޅުގަނޑުމެންނަށް މި ފެންނަ މަންޒަރާއި އިވޭ އަޑުތަކަކީ ހަމަ ގަބޫލު ކުރަން ދަތި އަޑުތަކާއި ވާހަކަތަކެވެ.

މީހުން ބުނާތީ އަޑު އަހަމެވެ. ކޮންމެ މީހެއް ވެސް އެއްބަސް ވާ ކޮންމެވެސް އަގެއް އޮންނާނެއެވެ. އެ އަގާ ދިމާވުމުން ނުވަތަ އެ އަގު ކިއުމުން އެ މީހަކު "އުފުރާލުމަކީ" މުސްތަހީލު ކަމެއް ނޫނެވެ. ދާދި ފަހުން "އުފުރާލި" ކަމަށް ތުހުމަތު ކުރާ މެންބަރުންގެ އަގު ނީލަމުގައި އެ މެންބަރުން ގަބޫލު ކުރާ ހިސާބަށް ދިއުމުން "ވިކުނީ" ކަމަށް ފާޅުގައި ސިޔާސީ ބޭފުޅުން ވިދާޅުވަމުން އެހަރަ ގެންދަވަނީއެވެ.

"ވިކުމަށް" ފަހު އެކި ބޭފުޅުން ދައްކަވާ ވާހަކަތައް ވެސް އަޅުގަނޑުމެންނަށް އެބަ އިވެއެވެ. "ވިކުނު" އިއްޒަތްތެރި މަޖިލީހުގެ މެންބަރުންނެއް ނޫނެވެ. އެކަމަކު ގަންނަން ފައިސާ އަޅައިގެން ހިނގާ "ސޭޓުން" ނާއި، މި ރޭވުމުގެ އަޑީގައި އުޅޭ އާރުކާޓީ ކަމަށް ތުހުމަތު ކުރެވޭ ބޭބޭފުޅުންގެ ވާހަކަތަކެވެ.

އިނގިރޭސި މަޝްހޫރު ލިޔުންތެރިއެއް ކަމަށް ވާ ޖޯރޖް އޯރވެލް ވިދާޅުވެފައި ވެއެވެ. "ސިޔާސީ ބަހުރުވަ އަތުރާލެވިފައި ވަނީ ދޮގާއި އޮޅުވާލުމަކީ އެއީ ތެދާއި ރަނގަޅު ގޮތް ކަން ހާމަ ވާ ގޮތަށް ކަމަށެވެ. މީހުން މެރުމަކީ އިހުތިރާމު ލިބިގެންދާ ފަދަ މަސައްކަތެއްގެ ގޮތުގައި ހާމަ ކުރެވޭ ފަދަ ގޮތަކަށެވެ. އަދި ފެންނަ ފެނުމަށް އެއީ މޮޅު ގޮތް ކަމަށް ސިފަ ވާ ގޮތަށެވެ"
މިއީ މިއަދު ފެންނަމުންދާ ހަގީގަތް ކަމަށް ވާ ނަމަ ކުރީގެ ރައީސް މައުމޫނު އެމްޑީޕީއާއި ގުޅިވަޑައިގެންފި ނަމަ ދެން އެ ބޭފުޅުންގެ ދޫފުޅުތަކުން ބޭރު ވާނެ ބަސްތަކަކީ ކޮބައި ހެއްޔެވެ؟

އެ ބޭފުޅުން ވިދާޅުވާނެއެވެ. ރައީސް މައުމޫނަކީ މިގައުމުގެ ރަން 30 އަހަރުގެ ބާނީއެވެ. އެމަނިކުފާނުގެ ހިކުމަތާއި ދުރު ވިސްނުންފުޅަކީ ކޮންމެހެން މިއަދު ބޭނުން ވާނެ އެއްޗެކެވެ. ގޮވެލިފަތި ގޮވާ މީހުން ގޮވާނެއެވެ. ގައުމަށް މިފަދަ ބޭނުންތެރި ވަގުތެއްގައި ރައީސް މައުމޫނު އެމްޑީޕީއާ ގުޅިވަޑައިގަތުމުން އެނގެނީ އެމަނިކުފާނު މި ގައުމަށާއި މި ގައުމުގެ ރައްޔިތުންނަށް އިހްލާސްތެރިކަމާ އެކު ހިދުމަތް ކޮށްދެއްވަން ތައްޔާރަށް ހުންނެވި ކަމެވެ. އަދި މިއަދު އެމްޑީޕީއަށް މި ލިބުނީ ވަރަށް އަގުބޮޑު ޖަވާހިރެއް ކަމަށް ވެސް ބުނާނެއެވެ.

އަދިވެސް ބުނާ މީހުން ބުނާނެއެވެ. ކުރީގެ ރައީސް އަލްއުސްތާޛު މައުމޫނު ޢަބްދުލްޤައްޔޫމުގެ ގަދަރު ކުޑަ ވާ ގޮތަށް ހަމަ އެކަކު ވެސް ވާހަކަ ދައްކައިގެން ނުވާނެއެވެ. އެއީ މި ގައުމުގައި 30 އަހަރު ވަންދެން ވެރިކަން ކުރެއްވި ލީޑަރެކެވެ. ޑިމޮކްރަސީގެ މަގު އަޅުގަނޑުމެންގެ މިހާރުގެ ޕާޓީގެ "އެންމެ އިސް ވެރިޔާ" ރައީސް މުހައްމަދު ނަޝީދަށް ދެއްކެވި އިއްޒަތްތެރި ވެރިޔާއެވެ. އެމަނިކުފާނު ދުނިޔޭގައި ހުންނެވިހައި ދުވަހަކު އިއްޒަތާއި ޝަރަފުގައި ބެހެއްޓުމަކީ މި ދައުލަތުގެ މައްޗަށް ލާޒިމް ކަމެކެވެ. މި ގައުމުގެ ކުރިމަގު ބިނާ ވާނީ ރައީސް މައުމޫނާ މެދު އަމަލު ކުރެވޭ ގޮތެއްގެ މައްޗަށެވެ.

އަދިވެސް ބުނާ މީހުން ބުނާނެއެވެ. ރައީސް މައުމޫނު ވަރުގެ އިހުލާސްތެރި ތެދުވެރި ބޭފުޅަކު މި އުޑުދަށަކުން ތިމަންމެން ނުދެކެމެވެ. އަޅުގަނޑުމެން ދައުލަތުގެ، ސަރުކާރުގެ ލިޔެކިއުންތައް ބަލައި، ފައިސާގެ ހިޔާނާތެއް އޮތްތޯ މި ދިޔަ ދުވަސްތަކުގައި މި ދިޔައީ ބަލަމުންނެވެ. މިއަދާ ހަމައަށް އައި އިރު ހަމަ ނުފުރޮޅާ އެންމެ ގާކޮޅެއް ވެސް ނޯންނާނެއެވެ. ރައީސް މައުމޫނު ވިދާޅުވި ހެން އެމަނިކުފާނު ހަމަ ލޯލާރިއެއްގައި ވެސް ޖެހިވަޑައިގެންފައި ވާ ކަމަށް އަޅުގަޑުމެން ބެލި ބެލުމުން ނުފެންނަކަން މިއަދު މި އިއުލާން ކުރަނީ އުފަލާއި ހިތްހަމަޖެހުމާ އެކުގައެވެ.

އެހެން ވާ ދުވަހަކުން، ކުރީގައި ޖަލުތަކުގައި އަނިޔާކުރި ވާހަކަ އަކީ ދޮގު ބުހުތާން ކަމުގައި ބުނާ "އަޑުގަދަ" އިއްޒަތްތެރި ބޭފުޅުން ފާޅުވާނެއެވެ. އެބޭފުޅުން ވިދާޅުވާނެއެވެ. ޖަލުގައި އަނިޔާކުރީ ރައީސް މައުމޫނަށް އެނގިވަޑައިގަތުމަކާ ނުލައެވެ. އެމަނިކުފާނަކީ އަނިޔާވެރިކަން ހުއްޓުވަން މަސައްކަތް ކުރެއްވި، އެކަމާ ސީދާ ދެކޮޅު ބޭފުޅެކެވެ. މީގެ ކުރިން އަޅުގަނޑުމެންގެ ތެރޭގައި އެ ވާހަކަ ދެކެވުނީ ބަޔަކު ހަދައިގެން އެވާހަކަ ތެދެއްހެން ހީވާ ގޮތަށް އަޅުގަނޑުމެންގެ ތެރޭގައި ފެތުރުމުންނެވެ. ޖަލްސާތަކުގައި އެހެން އެ ބުނާ މީހުން ނިކަން ސިއްރުން މަރާލި ކަމަށް ބުނާ އެއްވެސް މީހެއްގެ މަރުގެ ސާބިތު ހެކި ހުށައަޅާބަލާށެވެ. އަޅުގަނޑު އެފަދަ ހެއްކެއް ނެތް ކަމަށް އަދި ނުވެސް ގެނެވޭނެ ކަމަށްބުނެ އެ މީހުންނަށް ގޮންޖަހާނަމެވެ. އަދި ދާދި ފަހުން ފެނުނު ކަށިތައް ބަލާ ދިރާސާ ކުރުމުން ވެސް އެނގުނީ އެއީ މިނިކައްޓެއް ނޫންކަމެވެ.

ރާގު ބަދަލު ކޮށް، ވާހަކަ އަނބުރާ މީހުން ބުނާނެއެވެ. ޖަލުގައި އަނިޔާއެއް ދިން ނަމަ އެ އަނިޔާއެއް ދިނީ އޭރުގެ ޕޮލިސް ކޮމިޝަނަރު އާދަމް ޒާހިރެވެ. އޭނާ ހިފައި ހައްޔަރު ކުރުމަކީ ކޮންމެހެން ކުރަން ޖެހޭނެ ކަމެކެވެ. ރިޔާސީ ކޮމިޝަނަށް މިހާރު ލިބިފައި ހުރި މައުލޫމާތުން ވެސް އެނގި ކަށަވަރު ވަނީ އަނިޔާގެ މޭސްތިރިޔަކީ އާދަމް ޒާހިރު ކަމެވެ. އަދި އޭނާޔާ އެކު އަނިޔާގެ ބައިވެރިޔަކީ ދާދި ފަހުން ބަންދު ކުރި އިސްތަފާއެވެ. މި މީހުން އިންސާފުގެ ކުރިމައްޗަށް ހަމަ މިހާރުން މިހާރަށް ވެސް ގެންނަން ވީއެވެ. އެ މީހުންގެ ނުބައި އަނިޔާވެރިކަމުގެ ހިޔަނި ކުރީގެ ރައީސްގެ ގައިކޮޅަށް އެޅުނު ކަމީ އެކަމާ މެދު އަޅުގަނޑުމެން ހިތާމަ ކުރާ ކަމެކެވެ. މި ގައުމުގެ ރައްޔިތުންނަށް އިންސާފު ލިބޭނީ މި ދެބޭފުޅުންގެ މައްސަލަ ބެލުމުންނެވެ.

ވާހަކަ ދައްކަވާ ބޭފުޅުން ވިދާޅުވާނެއެވެ. ތިޔަ ބޭފުޅުންނަށް ވެސް ރަނގަޅަށް އެނގިވަޑައިގަންނަވާނެ ފަދައިން ރައީސް މައުމޫނަކީ އަޅުގަނޑުމެންގެ ޕާޓީގެ މެންބަރުންގެ ތެރެއިން މިހާރު އިސްކޮށް މި ތިއްބެވި ވަރަށް ގިނަ ބޭފުޅުންނާ ވަރަށް ގާތް ރަހުމަތްތެރި ބޭފުޅެކެވެ. އަޅުގަނޑުމެންގެ މިހާރުގެ ޒުވާން ނާއިބު ރައީސް އަލްހާން ފަހުމީ އަކީ ރައީސް މައުމޫނުގެ މަދަރުސާ އިން ސިޔާސީ މައިދާނަށް ތައާރަފް ވެވަޑައިގެންނެވި ޒުވާން ބޭފުޅެކެވެ. އަދި ޑީއާރުޕީގެ ޓިކެޓުގައި މައުމޫނުގެ ފުރިހަމަ ތާއީދާ އެކު އައްޑު އަތޮޅު ފޭދޫ ގޮނޑި އަށް އިންތިހާބު ވެވަޑައިގެންނެވި ބޭފުޅެކެވެ.

އަޅުގަނޑުމެންގެ ޕާޓީގެ ޗެއާރޕާރސަން މާރިޔާ ދީދީ އަކީ ރައީސް މައުމޫނުގެ ސަރުކާރުގައި އިސް މަގާމުތަކެއް ފުރުއްވައި، މަޖިލީހުން އެންމެ ފަހުން ރައީސް މައުމޫނަށް 2003 ވަނަ އަހަރު ރައީސްކަމަށް ކުރިމަތިލައްވަން ހިތުން ރުހުމުން ވޯޓު ދެއްވި ބޭފުޅެކެވެ. މިހާރުގެ ހޯމް މިނިސްޓަރ ހަސަން އަފީފަކީ ވެސް ހަމަ އެ ޖަލްސާގައި ވޯޓު ދެއްވި ބޭފުޅެކެވެ. ހަމަ އެގޮތަށް މުހައްމަދު ޝިހާބާއި ޅ.ހިންނަވަރު މެންބަރު އިބްރާހިމް ސޯލިހު (އިބޫ) އަކީވެސް ވޯޓު ދެއްވި މެންބަރުންނެވެ. މިބޭބޭފުޅުންނަކީ އެމްޑީޕީގެ މޭގަނޑެވެ. އެ ބޭފުޅުން އޭރު އެ ވޯޓު ދެއްވީ މިއަދުގެ މި ހާލަތު އަތުވެދާނެ ކަމަށް ބައްލަވައިގެންނެވެ. އެހެން ނޫނީ އެ ބޭބޭފުޅުންނެއް އެގޮތަށް ވޯޓެއް ނުދެއްވާނެއެވެ. އެކަން ތިޔަ ބޭފުޅުންނަށް މާ ރަނގަޅަށް އެނގިވަޑައިގަންނަވާނެއެވެ.

ވާހަކަ ދައްކާ މީހުން ބުނާނެއެވެ. އެމްޑީޕީގެ ރައީސްކަމަށް ކުރިމަތިއްލައްވައި ފެއިލް ވެވަޑައިގެންނެވި އިބްރާހިމް ހުސައިން ޒަކީ އަކީ ރައީސް މައުމޫނުގެ ވެރިކަމުގައި ވަރަށް އިހްލާސްތެރި ހިދްމަތްތަކެއް ކޮށްދެއްވާފައި ވާ ބޭފުޅެކެވެ. އަދި އަޅުގަނޑުމެންގެ "އެންމެ އިސްލީޑަރު" ރައީސް މުހައްމަދު ނަޝިދަކީ ވެސް ރައީސް މައުމޫނަށް ވަރަށް އިހްތިރާމް ކުރައްވާ އެމަނިކުފާނު ގައުމަށް ކޮށްދެއްވި އިހްލާސްތެރި ހިދުމަތްތައް ހިތްޕުޅުގެ އަޑިން ގަބޫލު ކުރައްވައި، އެކަމުގެ އަގު ވަޒަން ކުރައްވާ ބޭފުޅެކެވެ.

އެހެންކަމުން މި ހަގީގަތްތައް މިހެން ހުރި އިރު އެމްޑީޕީއާ އެކު މަސައްކަތް ކުރުމުގެ ރޫހު އެމަނިކުފާނުގެ ކިބައިގައި ނުހުންނާންވީ އެއްވެސް ސަބަބެއް ނެތެވެ. އަދި ދާދި ފަހުން އެމްޑީޕީ އަށް ބަދަލުވެވަޑައިގެންނެވި ތޮއްޑޫ ދާއިރާގެ މެންބަރު އަލީ ވަހީދާއި މާފަންނު ހުޅަނގު ދާއިރާގެ މެންބަރު ޢަބްދުއްﷲ އަބްދުއްރަހީމަކީ ރައީސް މައުމޫނާ އެކު އުނދަގޫ ދުވަސްވަރު ފައިހަރު ކޮށްލެއްވި ޒުވާން ބޭފުޅުންނަށް ވާތީ އެމްޑީޕީގެ މާހައުލަކީ ރައީސް މައުމޫނަށް ބީރައްޓެހި މާހައުލަކަށް ނުވާނެއެވެ.
ރައީސް މައުމޫނު އެމްޑީޕީ އަށް ސޮއި ކުރައްވާ ނަމަ އެފަދަ ބައްދަލުވުމެއްގައި ރައީސް ނަޝީދުގެ ވާހަކަތައް ހުންނާނީ މިފަދަ ރާގެއްގައި ކަމަށް ބެލެވެއެވެ. އެ ޖަލްސާއެއްގައި އެމްޑީޕީގެ ލީޑަރު، އަދި އަޅުގަނޑުމެންގެ މިހާރުގެ ރައީސް ނަޝީދު ވާހަކަފުޅު ފައްޓަވާނީ އަންނަނިވި ފަދަ ބައިތަކުން ކަމަށް ވެސް ބެލެވެއެވެ. "ގުލްޒާރުގާ ނަޔާ މަގޭ، ނޫރާނީމާ ފޮޅޭނެޔޭ ..."