ފަސްޓްލޭޑީ މެޑަމް ފާތިމަތު އިބްރާހިމްގެ އިސްނެންގެވުމުގެ މަތިން، ދިވެހި އަންހެނުންގެ މަސައްކަތްތެރިކަމާއި ހުނަރު ދައްކުވައިދިނުމަށް މިމަހު ބާއްވަން ރާވާފައި އޮތް "ހީވާގި ކަނބަލުން" މައުރަޒު އަންނަ ފެބްރުއަރީ މަހަށް ފަސްކޮށްފިއެވެ.
ކުރިން އެ މައުރަޒު ބާއްވަން ހަމަޖެހިފައި އޮތީ މިމަހުގެ 22 އިން 26 އަށް ކަލާފާނު ސްކޫލުގައެވެ.
ނަމަވެސް ހީވާގި ކަނބަލުން އިންތިޒާމްކުރާ ކޮމެޓީގެ މެމްބަރަކު ވިދާޅުވީ، އެ މައުރަޒު ބާއްވަން މިހާރު ހަމަޖެހިފަިއވަނީ އަންނަ ފެބްރުއަރީ މަހުގެ 23 އިން 27 އަށް ދަރުބާރުގޭގައި ކަމަށެވެ.
ފަސްކުރި ސަބަބެއް ކަމަށް އޭނާ ވިދާޅުވީ، މައުރަޒަށް ލިބެމުންދާ ތަރުހީބު އިތުރުވެ، މައުރަޒުގައި ބައިވެރިވުމަށް ގިނަ ބަޔަކު އެދެމުންދާތީވެ އެފަދަ ފަރާތްތަކަށް އެ ފުރުސަތު ފަހިކޮށްދިނުމުގެ ގޮތުންނެވެ.
އެގޮތުން، މައުރަޒުގައި ބައިވެރިވާން ބޭނުންވާ ފަރާތްތަކަށް މަރުއަޒުގައި ބައިވެރިވުމުގެ ފުރުސަތު އަންނަ ޖަނަވަރީ މަހުގެ 15 ވަނަ ދުވަހަށް އިތުރުކޮށްފައިވާ ކަމަށް ވެސް މެމްބަރު ވިދާޅުވިއެވެ.
ބައިވެރިވުމަށް އެދި ހުށަހަޅާ ފޯމް ފުރިހަމަކޮށް ހުށަހަޅަންޖެހޭނީ މާލޭގައި ނަމަ ޖަނަވަރީމަގުގައި ހުންނަ މެޑަމް ފާތިމަތު އިބްރާހިމްގެ އޮފީހަށެވެ. އަދި އީމެއިލް މެދުވެރިކޮށް ވެސް ފޯމް ބަލައިގަންނައިރު، ފޯމް ބަލައިގަންނާނީ އަންނަ ޖަނަވަރީ މަހުގެ 15ގެ ނިޔަލަށް ބަންދުނޫން ކޮންމެ ދުވަހެއްގެ ރަސްމީގަޑީގައެވެ.
ހަތަރު ކެޓަގަރީއަކުން 21 ގިންތިއެއް ހިމަނައިގެން ކުރިއަށް ގެންދާ މި މައުރަޒުގައި ކޮންމެ ކެޓަގަރީއަކުން އަދި މުޅި މައުރަޒުން އެންމެ މޮޅު އެއް ވަނަ، ދެ ވަނަ އަދި ތިން ވަނަ ހޮވަން ވަނީ ހަމަޖެހިފައެވެ.
އެގޮތުން އެއް ވަނައަށް ހޮވޭ ފަރާތަކަށް އެއް ލައްކަ ރުފިޔާ، ދެވަނަ އަށް 75،000ރ. އަދި ތިން ވަނަ އަށް 50،000ރ. ހުށަހަޅައިފައިވާއިރު، މުޅި މައުރަޒުން އެއްވަނަ ދެ ވަނަ އަދި ތިން ވަނައަށްދާ ފަރާތްތަކަށް ރާއްޖެ އަދި ރާއްޖެއިން ބޭރުގައި އޮންނަ މިފަދަ މައުރަޒުތަކުގައި ބައިވެރިވުމުގެ ފުުރުސަތު ދޭން ވަނީ ނިންމާފައެވެ.
ހީވާގި ކަނބަލުންގައި ހިމެނޭ ކެޓަގަރީތައް
- ވަކިވަކި ކަނބަލުން
- އަންހެނުންގެ ކޮމިޓީތައް
- ކްލަބު ޖަމިއްޔާތައް
- ހާއްސަ އެހީއަށް ބޭނުންވާ ކަނބަލުންގެ ދާއިރާ
ހީވާގި ކަނބަލުން މައުރަޒާ ބެހޭގޮތުން މައުލޫމާތު ދެއްވަމުން މައުރަޒުގެ އިންތިޒާމް ކޮމެޓީގެ މެމްބަރު ޒީނާޒް އަދުނާން މީގެ ކުރިން ވިދަޅުވީ މައުރަޒުގެ ތެރެއިން، އަންހެނުންނަށް ކުރިއަށް ދެވިދާނެ ދާއިރާތަކާ ބެހޭގޮތުން މައުލޫމާތު ދިނުމުގެ ސެޝަންތަކެއްވެސް ކުރިއަށްދާއިރު، ކޮންމެ ރެއަކު ލައިވް ޝޯތަކެއް ވެސް ކުރިއަށް ގެންދާނެ ކަމަށެވެ.