ވޮޝިންޓަން (ނޮވެމްބަރު 22): ރަޝިޔާގެ ދުރުރާސްތާގެ ބެލަސްޓިކް މިސައިލާއި އެސް 400 މަރުކާގެ މިސައިލްއައްޑަނައިގެ ނިޒާމުގެ ސަބަބުން ޔޫރަޕްގެ އަމަނާއި ސަލާމަތް ނުރައްކަލުގެ ތެރެއަށް ހުށަހެޅޭކަމަށް އެމެރިކާއިން ބުނެފިއެވެ.
އެމެރިކާގެ ޚާރިޖީ ވުޒާރާގެ ތަރްޖަމާން ޖޯން ކާބީ ވިދާޅުވީ، ރަޝިޔާއިން އުފައްދާފައިވާ އިސްކަންދަރު މަރުކާގެ ބެލަސްޓިކް މިސައިލަކީ ނިއުކްލިޔަރ އެތަށް ބޯތަކެއް އެއްފަހަރާ ހަރުކުރުމުގެ ގާބިލްކަން ލިބިފައިވާ އިންޓަކޮންޓިނެންޓަލް ބެލަސްޓިކް މިސައިލެއްކަމަށާއި މި މިސައިލް ޔޫރަޕްގެ ކޮންމެ ތަނަކަށްވެސް ފޯރާނެ ކަމުގައެވެ. އަދި މިސައިލާ ދެކޮޅަށް ބޭނުންކުރާ ރަޝިޔާގެ ޒަމާނީ މިސައިލް އައްޑަނައިގެ ނިޒާމެއްކަމަށްވާ އެސް 400 ނިޒާމުގެ އެންޓި މިސައިލް ނިޒާމަކީ ވެސް ޔޫރަޕަށްހުރި ބިރެއްކަމުގައެވެ.
ރަޝިޔާއިންވަނީ އެގައުމުގެ ހުޅަނގުގެ ކެލިންގްރާޑް ސަރަހައްދުގައި މިދެ ބާވަތުގެ މިސައިލް ނިޒާމުތައްވެސް ރުކުރުވާލާފައެވެ.
އަނެއްކޮޅުން ރަޝިޔާގެ އިއްތިޙާދުގެ ދިފާއީކަންކަމާބެހޭ ކޮމިޓީގެ ވެރިޔާ ވަނީ ރަޝިޔާއިން ދާދިފަހުން ޚިދްމަތަށްނެރުނު "ޑީމޮން" (ޝައިތާން) މަރުކާގެ މިސައިލް ނިޒާމުތައްވެސް ރަޝިޔާގެ ހުޅަނގު ބިތުގައި ޔޫރަޕަށް އަމާޒުވާނެ ގޮތަށް ރުކުރުވާލުމަށް ރައީސް ވްލަޑިމިޔަރ ޕޫޓިން އަމުރު ކުރައްވާފައިވާކަން ހާމަކުރައްވާފައެވެ.
"ޑީމޮން" (ޝައިތާން) މަރުކާގެ މިސައިލް ނިޒާމުތަކަކީ ތަންތަން ފަނާކޮށްލުމުގެ ގާބިލްކަން ލިބިފައިވާ ވަރަށް ބާރުގަދަ މިސައިލް ނިޒާމެކެވެ.
ރަޝިޔާގެ މިސައިލް ބާރުތަކުގެ އިސް ކޮމާންޑަރު ޖެނެރަލް މިޚައިލް މެޓްވޮއެސްކީ ވަނީ ރަޝިޔާއިން އެންމެފަހުން ޚިދްމަތަށް ނެރުނު "ޑީމޮން" މަރުކާގެ މިސައިލް ނިޒާމަކީ ފިޒިކްސްގައި މިހާތަނަށް އެއްވެސް ގައުމަކުން ބޭނުންކޮށްފައި ނުވާބާވަތުގެ އައު ޕްރިންސިޕަލް ތަކުގެ މައްޗަށް އުފައްދާފައިވާ ހަތިޔާރެއްކަމަށް ސިފަކުރައްވާފައެވެ.
"ޑީމޮން" މަރުކާގެ މިސައިލް ރަޝިޔާގެ ހުޅަނގުގައި ރުކުރުވާލުމަށް ރައީސް ޕޫޓިން އަމުރުކުރެއްވީ ނޭޓޯއިން، ރަޝިޔާގެ އަވަށްޓެރި އިރުމަތީ ޔޫރަޕްގެ ގައުމުތަކުގައި ބަރުހަތިޔާރާއި އިތުރު ސިފައިންގެ ލަޝްކަރުތައް ރުކުރުވާލުމަށް ކުރަމުންގެންދާ މަސައްކަތްތަކަށް ރައްދު ދިނުމުގެ ގޮތުންނެވެ. ނޭޓޯގެ މިފިޔަވަޅަކީ ރަޝިޔާއަށް އަމާޒުކޮށްގެން އަޅާ ފިޔަވަޅެއްކަމަށް ރަޝިޔާއިން ދެކެއެވެ.
ރަޝިޔާ އިން ގެންދަނީ އެގައުމުގެ ހަތިޔާރުގެ އިންޑަސްޓްރީން އުފައްދާ ޒަމާނީ ބަރުހަތިޔާރުތަކުގެ ފެންވަރު ބެލުމަށްޓަކައި ސޫރިޔާގެ ހަނގުރާމައިގާ އެތަކެތި ވަރަށް ފުޅާދާއިރާއެއްގައި ބޭނުން ކުރަމުންނެވެ.
ރަޝިޔާގެ ހަތިޔާރުތައް ސޫރިޔާގައި އަމާޒުކުރަނީ މައިގަނޑު ގޮތެއްގައި ސޫރިޔާގެ އިދިކޮޅު ޖަމާއަތްތަކަށެވެ. އެޖަމާއަތްތަކުން ސޫރިޔާ ސިފައިންނާ ދެކޮޅަށް ބޭނުންކުރަނީ އެމެރިކާގެ ހަތިޔާރެވެ. މިގޮތުން ރަޝިޔާ އެކޭ އެއްގޮތަށް އެމެރިކާވެސް އެގައުމުގެ ހަތިޔާރުތަކުގެ އަޖުމަބެލުމަށް ބޭނުންކުރާ ހަނގުރާމައިގެ މައިދާނަކީ ސޫރިޔާގެ ހަނގުރާމައިގެ މައިދާނެވެ. (އަލްޖަޒީރާ)