މޯލްޑިވްސް ޕޯޓްސް ލިމިޓެޑު (އެމްޕީއެލް)ގެ ތެޔޮ ސަޕްލައިކުރުމަށް މެރީޑިއަމް ސާވިސް ޕްރައިވެޓް ލިމިޓެޑަށް ނޫން އެހެން ބަޔަކަށް ނުދިނުމަށް އަންގައި ސިވިލް ކޯޓުން ނެރުނު ވަގުތީ އަމުރު ހައިކޯޓުގައި އިސްތިއުނާފު ކޮށްފި އެވެ.
އެމްޕީއެލްގެ ތެޔޮ ސަޕްލައިކުރަން މެރީޑިއަމް ނޫން ބަޔަކަށް ނުދިނުމަށް އަންގައި ސިވިލް ކޯޓުން ވަގުތީ އަމުރެއް ނެރުނީ މިދިއަ މަހުގެ 11 ވަނަ ދުވަހު އެވެ. އަދި އެ އަމުރު މުރާޖާ ކޮށްދިނުމަށް އެމްޕީއެލްގެ ފަރާތުން ސިވިލް ކޯޓުގައި އެދުމުން، އެ އަމުރަށް ބަދަލު ގެންނަން ނުޖެހޭ ކަމަށް ސިވިލް ކޯޓުން ވަނީ ނިންމާފަ އެވެ.
އެ އަމުރު ހައިކޯޓުގައި އިސްތިއުނާފު ކުރުމުން މިމަހުގެ ހަ ވަނަ ދުވަހު ވަނީ ރެޖިސްޓްރީ ކޮށްފަ އެވެ.
ސިވިލް ކޯޓުން އެމްޕީއެލްގެ މައްޗަށް ކުރި އަމުރުގައި ބުނެފައި ވަނީ މެރީޑިއަމް ސާވިސް އާއި ޕޯޓްސް ލިމިޓެޑާ އެކު 17 އޭޕްރީލް 2016ގައި އެއްބަސްވުމެއް ހަދާފައިވާ ކަމަށެވެ. އަދި އޭގައި ޕޯޓްސް ލިމިޓެޑްގެ ސައިޓްތަކުގައި ބޭނުންކުރާ ވެހިކަލް އަދި ވެސެލްސްތަކަށް ބޭނުންވާ ޑީސަލް ސަޕްލައިކޮށް ދިނުމާ ގުޅޭ ގޮތުން އެއްބަސްވެފައިވާކަން އެނގެން އޮންނަ ކަމަށް ސިވިލް ކޯޓުގެ އަމުރުގައިވެއެވެ.
އެހެންކަމުން ސިވިލް ކޯޓަށް ހުށަހެޅި ކުރިއަށްދާ މައްސަލަ ނިމެންދެން މެރީޑިއަމް ނޫން ބަޔަކަށް ތެޔޮ ސަޕްލައިކުރަން ނުދިނުމަށް ވަނީ ވަނީ އަމުރުކޮށްފަ އެވެ.
އެ އަމުރާ ގުޅިގެން އެމްޕީއެލްގެ ސީއީއޯ މުހައްމަދު ޖުނައިދު ވިދާޅުވެފައި ވަނީ މެރީޑިއަމަށް ތެޔޮ ސަޕްލައި ކުރަން ހަވާލުކޮށްފައި ވަނީ ބިޑްކުރުމެއް ނެތި ކަމަށެވެ. އަދި ތެޔޮ ސަޕްލައި ކުރުމުގައި އެމްޕީއެލުން އަމަލުކުރާ ގޮތުން މިލިއަނުން ގެއްލުންތަކާ ކުރިމަތިވާ ކަމަށް ޖުނައިދު ވިދާޅުވި އެވެ.
ނަމަވެސް މެރީޑިއަމުން ކޯޓަށް ހުށަހެޅި މައްސަލައިގައި ބުނެފައިވަނީ އެފަރާތުން އެމްޕީއެލްއަށް ތެޔޮ ސަޕްލައިކުރަން ފެށީ ބިޑް ކާމިޔާބުކޮށްގެން ކަމަށެވެ.