އުފާވެރި ހުވަފެންތަކާއި ފޮނި އުންމީދު ތަކާއެކު ފަށާ އެތައް ދިރިއުޅުމެއް އަނިޔާވެރިކަމަށް ބަދަލުވުން މިވަނީ އާންމުވެފައެވެ. ގިނައިން އަނިޔާ ތަހައްމަލް ކުރަން މިޖެހެނީ އަންހެނުންނަށް ކަމަށްވާއިރު އެފަދަ އެތައް ބަޔަކު މިމުޖުތަމައުގައި ދިރިއުޅެއެވެ. އަނިޔާ ލިބޭ އަންހެނުންގެ ވާހަކަތަކުން އެކަން ޔަގީންވެއެވެ.
"ފުރަތަމަ ޖެހީމަ ހިތަކަށް ނާރާ ދާނީއެކޭ، ހިތައްއެރީ ހިތްވަރުކޮށްލާފައި ކުރިއަށްދާނީއޭ، ދެން ލައިފް ހަލާކުވެއްޖެއްޔާ މީހުންދެކޭނެ ގޮތްވެސް ހިތައް އަރާފަ ހިތައް އެރީ ކުރިއަށްދާނިއްޔޭ، އެކަމަކު ކަރަށް ފައިން އެރިފަހުން ދެން ބިރުގަތީ" އަނިޔާލިބެމުންދާ އަންހެނަކު ކިޔައިދިނެވެ.
ހިތްހަމަނުޖެހޭ ކޮންމެ ފަހަރަކު ފުރާނައަށް ގެއްލުންވާފަދަ އަނިޔާކުރުމަކީ ބައެއް ފިރިހެނުންގެ އާދައަކަށްވާއިރު އޭގެ ސަބަބުން ވޭންދެނިވި ހާލު ތަހައްމަލް ކުރަންޖެހެނީ ނިކަމެތި އަންހެން މީހާއަށެވެ.
"ބޮލުގައި ޖެހުން އަނގަމަތި ފަޅާލުން ކަރުގަ ހިފުން، ކަރުގަ ހިފައިގެން ހުންނާނެ ނޭވާ ނުލެވެންދެންވެސް، ފަހުންފަހަށް އައިސް ކަރަށްވެސް ފައިން އެރި، ކޮންމެ ދުވަހެއްގެ އަނިޔާގައިވެސް ބޮލަށް ގެއްލުންވާނެ، ބޯ ތަންތަން ހުންނާނެ ދުޅަވެފައި،" އޭނާ ކިޔައިދިނެވެ.
އަނިޔާއަށް ގިނަ ބަޔަކު ކެތް ކުރަން މަޖުބޫރުވާ އެހެން ސަބަބުތަކެއްވެސް އޮވެއެވެ. އެއީ އަނިޔާލިބޭ މާހައުލުން އެމީހަކަށް އެހީތެރިވާނެ މީހުން ނެތުމެވެ.
މިކުޑަ މުޖުތަމައުގައި ގެވެށި އަނިޔާގެ ޝިކާރައަކަށްވެ މިދުނިޔެ ދޫކޮށްފައިވާ އަންހެނުންވެސް އެބަވެއެވެ. ފަހުގެ ތާރީހެއްގައިވެސް އެފަދަ ހާދިސާތައް ހިންގާފައި އެބަހުއްޓެވެ. ދުވަހުން ދުވަހަށް އެފަދަ މައްސަލަތައް އިތުރުވާއިރު މީގައި އޮތް އެންމެ ބޮޑު ކަންބޮޑުވުމަކީ އެކަމަށް ހޭލުންތެރި ނުވުމެވެ.
އަނިޔާއަށް ހޭލުންތެރިވާށެވެ. ގެވެށިއަނިއާގެ ގޮތުގައި ގެވެށި ގުޅުމެއް ގައިވާ މީހެއްގެ ފަރާތުން ލިބޭ ޖިސްމާނީ އަދި ނަފްސާނީ އަނިޔާ ހިމެނެއެވެ.
ފެމިލީ ލޭގަލް ކުލިނިކްގެ ކޯ ފައުންޑާ އަދި ވަކީލް ޝަފީޢާ ރިޒާ ވިދާޅުވިގޮތުގައި މާލީ ގޮތުން ދަތިކުރުމާއި ތަނަކަށް ނުދެވޭގޮތަށް ބަންދު ކުރުމުގެ އިތުރުން ބަހުގެ ހަމަލާދިނުމާއި ޖިސްމާނީ އަނިޔާތަކަކީވެސް ގެވެށި އަނިޔާތައް ކަމަށެވެ.
"އަނބިމީހާގެ ބަލިހާލަތުހުރީ މާބަނޑުވުން ރަނގަޅު ނޫން ހާލަތުގައިކަމަށް ޑޮކްޓަރު ކަނޑައަޅާފައިވާ ހާލަތުގައި މަޖުބޫރުން މާބަނޑު ކުރުވަން އުޅުން، މިކަހަލަ އެތައް އަނިޔާއެއް ގެވެށި އަނިޔާގެގޮތުގައި ގެވެށި އަނިޔާ ހުއްޓުވުމުގެ ގާނޫނުން މަނާކުރޭ،" ޝަފީޢާ ވިދާޅުވިއެވެ.
ގެވެށި އަނިޔާއިން ސަލާމަތް ވުމަށް ވަނީ އެކަށޭނަ ގާނޫނެއް ހަދާފައެވެ. އެގާނޫނުގެ ދަށުން އަނިޔާއިން ސަލާމަތްވެވޭނެ ހަރުދަނާ އުސޫލްތަކެއް ވަނީ ގާއިމް ކުރެވިފައެވެ.
ޝަފީއާ ވިދާޅުވީ ގެވެށި އަނިޔާއިން ސަލާމަތްވުމަށް ރައްކާތެރިކަމުގެ އަމުރަކަށް އެދެވޭނެ ކަމަށެވެ. މާލޭގައި ނަމަ ފެމެލީ ކޯޓަށް އަދި ރަށެއްގަައިނަމަ އެރަށު ކޯޓަށް އެދެވޭނެ ކަމަށާއި އެއާއެކު އަނިޔާކުރާ މީހާގެ ކިބައިން ރައްކާތެރިވުމުގެ ފުރުސަތު ލިބިގެންދާނެ ކަމަށް ޝަފީއާ ވިދާޅުވިއެވެ.
އުސޫލްތަކެއް ގާއިމް ކުރެވިފައި އެބަހުއްޓެވެ. ހަރުދަނާ ގާނޫނުތަކެއްވެސް އެބަހުއްޓެވެ. ނަމަވެސް އެކަމަށް މީހުން އެހާ އަހުލުވެރިއެއް ނޫނެވެ. ބުއްދިވެރިގޮތަކީ އަނިޔާއަށް ކެތް ނުކުރުމެވެ. އެހީތެރިވާނެ ފަރާތްތައް ގިނައެވެ.
ގެވެށި އަނިޔާގެ މައްސަލައެއް ކުރިމަތިވާނަމަ ފެމެލީ ޕުރޮޓެކްޝަން އެޖެންސީ އާއި ފުލުހުންނަށް ނުވަތަ ޖެންޑާ މިނިސްޓްރީގެ ހިލޭ ގުޅޭ ނަމްބަރު 1412 އިން ގުޅޭނެއެވެ. އަދި ފެމިލީ ލޭގަލް ކުލިނިކްގެ ހޮޓްލައިން 7456570 އަށް ގުޅުމުން ހިލޭ ގާނޫނީ ލަފާދެއެވެ.
ގިނަ ބަޔަކު އަނިޔާއަށް ކެތް ކުރާ އެއް ސަބަބަކީ ދަރިންތިބީމައެވެ. ދަރިން ނިކަމެތި ވެދާނެތީއެވެ. ނަމަވެސް ގިނަ ފަހަރަށް ކަންވާ ގޮތަކީ އަނިޔާއަށް ކެތްކުރުމުން ދަރިން ބިކަވެ ދަނީއެވެ.
ދަރިފުޅު އަތުލާނެ ކަމަށް ބުނެ ބިރުދެއްކުމަކީ ގިނަ އަންހެނުން އަނިޔާއަށް ކެތްކުރާ ސަބަބެވެ. ދަރިފުޅާ ވަކިނުވުމަށްޓަކައި އަނިޔާއަށް ކެތްކުރަނީއެވެ. ގިނަ ބަޔަކަށް ގަބޫލް ކުރެވެނީ އަނިޔާކުރާ މީހާއަށް ދަރިފުޅު އަތުލެވޭނެ ކަމަށެވެ. ނަމަވެސް ކަން އޮތީ އެހެނެއް ނޫނެވެ.
ޝަފީއާ ވިދާޅުވީ ގެވެށި އަނިޔާގެ މައްސަލައެއް ރިޕޯޓްކުރުމަކީ ދަރިފުޅު އަތުލެވޭނެ ސަބަބެއް ނޫން ކަމަށެވެ. ދިވެހި ގާނޫނާއި އިސްލާމީ ޝަރީއަތް ބުނާގޮތުންވެސް ކުއްޖާގެ އުމުރުން ހަތް އަހަރު ވަންދެން ކުއްޖާ ހުންނާނީ މަންމަގެ ބެލުމުގެ ދަށުގައި ކަމަށް ޝަފީއާ ވިދާޅުވިއެވެ.
ގާނޫނަކުން ހަރުދަނާ އުސޫލްތަކެއް ގާއިމް ކުރެވިފައި އެބަހުއްޓެވެ. ސަލާމަތްވެވޭނެ މަގުތަކެއްވެސް އެބަހުއްޓެވެ. ކުރަންވީ ކަމަކީ ހައްގުތައް ބޭނުން ކުރުމެވެ. އަނިޔާއަށް ކެތް ކުރުމުގެ ނަތީޖާ ވަރަށްވެސް ހިތްޗެވެ.
"އަޅުގަނޑު އެއް ލައިފްގައި ހަތް އަހަރު އަނެއް ލައިފްގައި ދެ އަހަރު ވެގެން މިދިޔައީ ކެތްކޮށްގެން، ކެތްކޮށްގެން ހުންނަ މީހާ ހަމަ ހުންނަންޖެހޭނީ ކެތްކޮށްގެން، މަގުމަތި ވާންވިޔަސް ގެއިން ނުކުމެގެން ދާންވީ،" އަނިޔާ ލިބިފައިވާ ކުއްޔާ ބުންޏެވެ.
ގެވެށި އަނިޔާގެ މައްސަލަތައް ދުވަހުން ދުވަހަށް އިތުރުވަމުންދާއިރު އެކަންކަމުން މީހުން ސަލާމަތްކުރުމަށް ދައުލަތުގެ މުއައްސަސާތަކުންވެސް މިހާރަށްވުރެ ހަރުދަނާ އުސޫލްތަކެއް ގާއިމް ކުރަންޖެހެއެވެ. އަދި އަނިޔާ ލިބޭ މީހާއަށް އެހީތެރިވުން އަވަސް ކުރަންޖެހެއެވެ.
ޕޮލިސް ސުޓާފް ސާޖެންޓް އަބްދުލް ޖަލީލު އިބްރާހިމް ވިދާޅުވީ އަނިޔާއިން ސަލާމަތްވުމަށް ފުރަތަމަ ކަމަކަށް އެކަން ސިއްރު ކުރުމުގެ ބަދަލުގައި ކިޔައިދޭންޖެހޭ ކަމަށެވެ. ފުލުހުންނަށް އެފަދަ މައްސަލައެއް ހުށައެޅުމުން ރައްކާތެރިކަން ފޯރުކޮށްދޭނެ ކަމަށް އޭނާ ވިދާޅުވިއެވެ.
ހަރުދަނާ އުސޫލްތަކެއް ގާއިމް ކުރެވިފައިވީނަމަވެސް ދުވަހުން ދުވަހަށް އަނިޔާ ދަނީ އިތުރުވަމުންނެވެ. އެތައް ދިރިއުޅުމެއް އެކަމުގައި ޖެހި ވިއްސިވިލާލިވާއިރު އެތައް އަންހެނުންނެއް ވަނީ ބިކަވެފައެވެ. އެކަންކަމުން ރައްކާތެރިވާންޖެހެއެވެ. ހަރުދަނާ އުސޫލްތަކެއް ހެދިފައިއެބަހުއްޓެވެ. އެހީތެރިވާނެ ފަރާތްތައް ގިނައެވެ. އަވަހަށް ރިޕޯޓްކުރާށެވެ.