ޒިކާ ވައިރަސް އޭޝިއާގައި ފެތުރެމުން ދިޔުމުގެ ފުރުސަތު ބޮޑު ކަމަށް ވޯލްޑް ހެލްތް އޯގަނައިޒޭޝަން (ޑަބްލިއުއެޗްއޯ)އިން ބުނެފި އެވެ.
އީޑީސް މަދިރީގެ ޒަރިއްޔާއިން ފެތުރޭ ޒިކާ ވައިރަސް ދުނިޔޭގެ 70 ގައުމަކުން ފެނިފައިވާ އިރު އޭގެ ތެރެއިން 19 ގައުމަކީ އޭޝިއާގެ ގައުމުތަކެވެ. އެގޮތުން ސިންގަޕޫރުގެ އެތައް ސަތޭކަ މީހުންގެ ގައިން ޒިކާ ފެނިފައިވާ އިރު ޒިކާއާ ގުޅުން ހުރި މައިކްރޯސެފަލީގެ ދެމައްސަލައެއް ތައިލެންޑުން ފެނިފައިވެ އެވެ.
އަދި ރާއްޖެއައި ތިން މީހަކު އެނބުރި ގައުމަށް ދިޔަ ފަހުން ޒިކާ ވައިރަހަށް ޕޮޒިޓިވް ވެފައިވާ ކަމަށާއި ޒިކާ ވައިރަސް ރާއްޖޭގައި އުޅޭ މިންވަރު ބެލުމަށް، ހުން އައިސްގެން ޑޮކްޓަރަށް ދައްކާ ބަލިމީހުންނަށް ކުރެވޭ ތަހުލީލުތަކުގެ ތެރޭގައި ޒިކާ ވައިރަސްއަށް ޓެސްޓް ކުރަން ފަށާފައިވާ ކަމަށް އައިޖީއެމްއެޗުން ވަނީ ބުނެފަ އެވެ. އަދި މިހާތަނަށް ރާއްޖޭގައި ޓެސްޓުކޮށްފައިވާ އެއްވެސް ދިވެއްސެއްގެ ގައިން ޒިކާ ވައިރަސް ފެނިފައި ނުވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ވަނީ ބުނެފަ އެވެ.
ޒިކާ ވައިރަސް ޖެހުމުން ގާތްގަނޑަކަށް 80 ޕަސެންޓު މީހުންގެ ގައިން އެއްވެސް އަލާމާތެއް ނުފެނެ އެވެ. ބައެއް މީހުންގެ ގައިން ފެންނަ އަލާމާތްތަކުގެ ތެރޭގައި ހުންއައުމާއެކު ގައިން ރަތްކުލައިގެ ކުދި ބިހިތަކެއް ނެގުމާއި ލޯރަތްވުން، ގައިގައިރިއްސުން، ބޮލުގައިރިއްސުން އަދި ހުޅުތަކުގައި ރިއްސުން ހިމެނެ އެވެ.
ނަމަވެސް މާބަނޑު އަންހެނުންނަށް ޒިކާ ވައިރަސް ޖެހުމުން ބަނޑުގައި އޮންނަ ދަރިފުޅަށް މައިކްރޯސެފަލީ ކިޔާ ކޮންޑިޝަންއެއް ޖެހުމުގެ ފުރުސަތު ބޮޑު ކަމަށް އެމެރިކާގެ ސެންޓާސް ފޯ ޑިޒީސް ކޮންޓްރޯލް އެންޑް ޕްރިވެންޝަން (ސީޑީސީ)ން ބުނެފައިވެ އެވެ. މައިކްރޯސެފަލީ އަކީ ތުއްތުކުއްޖާގެ ސިކުނޑިއާއި ބޮލުގެ ނާށިގަނޑު ރަނގަޅަށް އާލާނުވެ އުފަންވުމަށް ކިޔާ ނަމެކެވެ.