މޯލްޑިވްސް ބާސްކެޓްބޯލް އެސޯސިއޭޝަން (އެމްބީއޭ) އިން އިންތިޒާމްކޮށްގެން ކުރިއަށް ގެންދިޔަ 11 ވަނަ ގައުމީ ބާސްކެޓްބޯޅަ ލީގުގެ ޗެމްޕިއަންކަން ރެޑްލައިން ކްލަބު ބަލިކޮށް، ޓީރެކްސް ބާސްކެޓްބޯލް ކްލަބުން ހޯދައިފި އެވެ.
މި އަހަރު ކުރިއަށްދިޔަ އެމްބީއޭ ޗެމްޕިއަންޝިޕް ކާމިޔާބުކުރި ރެޑްލައިންގެ މައްޗަށް ޓީރެކްސް އިން ރޭ ކުރި ހޯދާފައިވަނީ 74-70 ޕޮއިންޓުންނެވެ.
ރޭ ކުޅުނު އެ މެޗުގެ މޮޅު ކުޅުންތެރިޔާގެ މަގާމަށް ހޮވިފައިވަނީ ޓީރެކްސްގެ ރިކިން ޕެތާނީ އެވެ. އޭނާ ވަނީ އެ މެޗުގައި ޓީރެކްސް އަށް 24 ޕޮއިންޓް ހޯދައިދީފައެވެ. ރޭގެ މެޗުގައި ރެޑްލައިނަށް އެންމެ ގިނަ ޕޮއިންޓް ހޯދައިދިނީ މުހައްމަދު ޒިލާލް އެވެ. އޭނާ ވަނީ އެ ޓީމަށް 23 ޕޮއިންޓް ހޯދައިދީފައެވެ.
ގައުމީ ބާސްކެޓްބޯޅަ ލީގުގެ ނިންމުމުގެ ރަސްމިއްޔާތު ޝަރަފްވެރިކޮށްދެއްވީ ފިނޭންސް މިނިސްޓަރު އަހްމަދު މުނައްވަރެވެ. މުބާރާތުގެ އެންމެ މޮޅު ކޯޗަކަށް ޓީރެކްސްގެ ކޯޗު އިލްޔާސް އިބްރާހިމް ހޮވުނު އިރު، މުބާރާތުގައި އެންމެ ގިނަ ޕޮއިންޓް ހޯދި ކުޅުންތެރިޔަކަށް ހޮވުނީ ރެޑްލައިނަށް 157 ޕޮއިންޓް ހޯދައިދިން އެލެން ޓްރަޕަލޮވަކް އެވެ.
ގައުމީ ބާސްކެޓްބޯޅަ ލީގުގެ ޗެމްޕިއަން ޓީރެކްސް އަށް ފިނޭންސް މިނިސްޓަރު މުނައްވަރު ޝީލްޑް ހަވާލުކޮށްދެއްވަނީ: ޓީރެކްސް އިން ޗެމްޕިއަންކަން ހޯދީ ރޭ ކުޅުނު މެޗުގައި ރެޑްލައިން އަތުން މޮޅުވެގެން --- ފޮޓޯ: އެމްބީއޭ
މުބާރާތުގެ އެންމެ މޮޅު ޑިފެންސިވް ކުޅުންތެރިޔަކަށް ޓީރެކްސްގެ ރިކިން ޕެތާނީ ހޮވުނު އިރު، އެންމެ މޮޅު އޮފެންސިވް ކުޅުންތެރިޔަކަށް ހޮވުނީ ރެޑްލައިންގެ އެލެން ޓްރަޕަލޮވަކް އެވެ. އެންމެ މޮޅު ޕޮއިންޓް ގާޑަކަށް ރެޑްލައިންގެ މުހައްމަދު ޒިލާލް ހޮވުނު އިރު، އެންމެ ފައިދާހުރި ކުޅުމެއް ދެއްކި ކުޅުންތެރިޔަކަށް ހޮވުނީ ޓީރެކްސްގެ އިބްރާހިމް ރަޝްވާން އެވެ.
މާދަމާ ހަވީރު ކުޅޭ 35 ވަނަ ގައުމީ ބާސްކެޓްބޯޅަ މުބާރާތުގެ ސެމީ ފައިނަލުގެ ފުރަތަމަ މެޗުގައި ވެސް ލީގު ޗެމްޕިއަން ޓީރެކްސް އާއި ރަނަރަޕް ރެޑްލައިން ބައްދަލުކުރާނެ އެވެ. އެމްބީއޭ ޗެމްޕިއަންޝިޕް ރެޑްލައިނުން ކާމިޔާބުކުރި އިރު، ފައިނަލުގައި އެ ޓީމާ ދެކޮޅަށް ނުކުމެފައިވަނީ ޓީރެކްސް އެވެ.
ގައުމީ ބާސްކެޓްބޯޅަ މުބާރާތުގެ ސެމީގެ ފުރަތަމަ މެޗުން މޮޅުވާ ޓީމަކަށް އަންނަ ހޮނިހިރު ދުވަހު ކުޅޭ ފައިނަލުގެ ޖާގައެއް ލިބޭ އިރު، މެޗުން ބަލިވާ ޓީމެއް އަންނަ ބުރާސްފަތި ދުވަހު ކުޅޭ ތިން ވަނަ ސެމީގައި ނުކުންނަން ޖެހޭނީ ސެމީގެ ދެ ވަނަ މެޗުން މޮޅުވާ ޓީމަކާ ދެކޮޅަށެވެ.
މާދަމާ ރޭ ކުޅޭ ގައުމީ ބާސްކެޓްބޯޅަ މުބާރާތުގެ ސެމީގެ ދެ ވަނަ މެޗުގައި ބައްދަލުކުރާނީ ލީގުގެ ތިން ވަނަ ހޯދި ދަ ބައުސް ސްޕޯޓްސް ކްލަބާއި ހަތަރު ވަނަ ހޯދި ކުޑަހެންވޭރު ޔުނައިޓެޑެވެ. އެ މެޗުން ބަލިވާ ޓީމެއް މުބާރާތުގައި ކުރިއަށް ދިއުމުގެ ފުރުސަތު ގެއްލޭނެ އެވެ.