ކޮންމެ ދިވެއްސަކަށް ކީރިތި ގުރުއާނުގެ ކޮޕީއެއް ނުވަތަ މުސްހަފެއް ދިނުމަށް ސަރުކާރުން ފެށި މަޝްރޫއުގެ ދަށުން ފުރަތަމަ ޗާޕް ކޮށްގެން ގެންނަން ނިންމި އަދަދަށްވުރެ، ގާތްގަނޑަކަށް ދެ ގުނަ އިތުރަށް ޗާޕްކޮށްގެން ގެނެވޭނެ ކަމަށް އިސްލާމިކް މިނިސްޓްރީން ބުނެފި އެވެ.
"މުސްހަފް މާލްދީފް" ނުވަތަ "ކޮންމެ ދިވެހި ރައްޔިތަކަށް މުޞްހަފެއް"ގެ ނަމުގައި ދިވެހީންނަށް ހާއްސަ މުސްހަފެއް ޗާޕްކުރުމަށް ފެށި އެ މަޝްރޫއުގެ ދަށުން ފުރަތަމަ ގެންނަން ނިންމާފައި އޮތީ 50،000 މުސްހަފެވެ.
"ސަން" އަށް ދެއްވި، ހާއްސަ އިންޓަވިއުއެއްގައި އިސްލާމިކް މިނިސްޓްރީގެ ޑެޕިއުޓީ މިނިސްޓަރު މުހައްމަދު މުސްތަފާ އިބްރާހިމް ވިދާޅުވީ، ފުރަތަމަ ބުރުގައި މިހާރު ޗާޕްކޮށްގެން ގެންނަން ނިންމާފައިވަނީ 97000 މުސްހަފް ކަމަށެވެ.
އޭނާ ވިދާޅުވި ގޮތުގައި، މުސްހަފް ޗާޕްކުރި އަދަދު އިތުރުވީ، ކުރިން ޗާޕްކުރި އަގަށްވުރެ ހެޔޮ އަގެއްގައި ޗާޕްކުރެވޭނޭ ގޮތް ހަމަޖެހުމުންނެވެ. އަދި ޗާޕްކުރި ފޮތްތައް ރާއްޖެ ގެނައުމުގައި މިހާރު ކުރިއަށްދަނީ ލޮޖިސްޓިކް މަސައްކަތްތައް ކަމަށާއި ކުރިއަށް އޮތް މަހެއް ނުވަތަ ދެމަހެއްގެ ތެރޭގައި މުސްހަފްތައް ރާއްޖެ ގެނެވޭނެ ކަމަށް ވިދާޅުވި އެވެ.
"ކުރިން ސޫދާންގައި ހުންނަ ޗާޕް ކުރާތަނަކުން ޗާޕްކުރަން އޮތީ. އޭރު އޮތީ އެއްލައްކަ މުސްހަފް ހަދިޔާކުރަން. ނަމަވެސް އެތަނަށް މަނީ ޓްރާންސްފާ ކުރެވޭނެ ގޮތެއް ނުވެގެން ދުބާއީގައި ހުންނަ ޗާޕްކުރާތަނަކުން މިހާރުގެ މުސަހަފްތައް ޗާޕްކުރަނީ. ދުބާއީގައި ހުންނަ ތަނުން ޗާޕްކުރުމުން ކުރީގަ ފަސް ޑޮލަރަށް މުސްހަފެއް ޗާޕްކުރެވެން ހުރި އަގު ތިން ޑޮލަރަށް ކުޑަވެގެންދިޔަ،" މުސްތަފާ ވިދާޅުވި އެވެ.
ރާއްޖޭގެ އިސްލާމިކް މިނިސްޓްރީ އާއި ރާއްޖޭގެ ޖަމިއްޔާތަކާއި ބަހުރެއިންގެ ޤުރުއާން ކެއާ ސޮސައިޓީއާ ގުޅިގެން ފެށި އެ މަޝްރޫއަށް ފައިސާ ހޯދާފައިވަނީ ސަރުކާރުގެ ބަޖެޓުން އެއްވެސް ފައިސާއެއް ނުނަގައި ދިވެހި ބައެއް ކުންފުނިތަކާއި އާންމުން ހަދިޔާ ކުރާ ފައިސާއިންނެވެ. އަދި މަޝްރޫއަށް ބަހުރެއިންގެ ޤުރުއާން ކެއާ ސޮސައިޓީން ވެސް ބައިނަލްއަގްވާމީ ގޮތުން އެހީތެރިކަން ހޯދަން އެއްބަސްވެފައިވެ އެވެ.
ޑެޕިއުޓީ މިނިސްޓަރު މުސްފަތާ ވިދާޅުވީ، އެ މަޝްރޫއަށް ރާއްޖޭގެ ބައެއް ކުންފުނިތަކާއި އާންމުން ހަދިޔާ ކުރި ފައިސާއިން 287،181 ޑޮލަރު (4,428,331 ރުފިޔާ) ލިބުނު ނަމަވެސް ކޮންމެ ދިވެހި ރައްޔިތަކަށް މުސްހަފެއް ދިނުމަށް އެކަށީގެންވާ އަދަދެއްގެ ފައިސާއެއް ލިބިފައިނުވާ ކަމަށެވެ.
އަދި ވިދާޅުވީ، ބަހުރައިނަށް އިސްލާމިކް މިނިސްޓްރީގެ އޮފިޝަލުންކުރި ދަތުރުގައި އެ ފަރާތުން ހޯދާފައިވާ އެއްވެސް ފައިސާއެއްގެ މައުލޫމާތެއް ލިބިފައިނުވާ ކަމަށެވެ.
ނަމަވެސް ޤުރުއާން ޕްރިންޓްކޮށް މުސްހަފް ނުލިބޭ ގައުމުތަކަށް ހިލޭ ބެހުމުގެ މަސައްކަތް ކުރި ބަހުރައިންގެ ޤުރުއާން ކެއާ ސޮސައިޓީއަކީ މިހާރު އެގައުމުން އުވާލާފައިވާ ސޮސައިޓީއެކެވެ. ގާނޫނާ ގަވާއިދާ ހިލާފު ކަންތައްތަކެއް ކުރުމުގެ ސަބަބުން ބަހުރެއިންގެ ލޭބާ އެންޑް ސޯޝަލް ޑިވެލޮޕްމަންޓް މިނިސްޓްރީން އެ ސޮސައިޓީ އުވާލީ މިއަހަރުގެ ޖޫން މަހުގެ ތެރޭގައެވެ.
ދިވެހި ކޮންމެ ރައްޔިތަކަށް މުސްހަފެއް ދިނުމަށް ސަރުކާރުން މަޝްރޫއު ފެށީ ކުރީގެ އިސްލާމިކް މިނިސްޓަރު މުހައްމަދު ޝަހީމްގެ ބެއްލެވުމުގެ ދަށުން، މީގެ ދެ އަހަރު ކުރިންނެވެ. އެ ފޮތް ކުރިން ނެރެން ނިންމީ މިނިވަން 50 އާ ދިމާކޮށެވެ.
ނަމަވެސް މުސްތަފާ ވިދާޅުވި ގޮތުގައި، މުސްހަފްގެ މަސައްކަތް ދިގުލައިގެން ދިޔައީ، އެ މަސައްކަތް ފެށި ފަހުން އިސްލާމިކް މިނިސްޓްރީއަށާއި މިނިސްޓަރު ވެސް ބަދަލުވުމުންނާއި އޮޑިޓް ރިޕޯޓުގައި ވެސް އެކަމާ ގުޅުންހުރި މައްސަލަތަކެއް ހުރުމުން އެކަންތައްތައް ހައްލުކޮށް އެއީ ކިހިނެތްދިޔަ ކަމެއްތޯ ބެލުމަށް ދުވަސްތަކެއް ނެގުމުން ކަމަށެވެ.
މީގެ އިތުރުން، ފުރަތަމަ މުސްހަފްތައް ޗާޕްކުރަން ނިންމި ސޫދާނަށް ފައިސާ ފޮނުވުމުގައި ދަތިތަކެއް ކުރިމަތިވުމުގެ ސަބަބުން ވެސް މުސްހަފް ޗާޕްކުރަން ދުވަސްތަކެއް ނެގި ކަމަށް އޭނާ ވިދާޅުވި އެވެ.
ދިވެހިންނަށް ތައްޔާރުކުރާ ހާއްސަ މުސްހަފުގައި ހުކުރު މިސްކިތުގައި ހިމެނޭ އަތްތެރި މަސައްކަތުގެ ފަންނުވެރި ކުރެހުންތައް މުސްހަފުގެ ބޭރުގަނޑާއި އެތެރޭގެ ކުރެހުންތަކާއި ލޭއައުޓްތަކުގައި އެކުލެވިފައި ހުންނާނެ އެވެ.