ޓޭބަލް ޓެނިސް އެސޯސިއޭޝަން އޮފް މޯލްޑިވްސް (ޓީޓީއޭއެމް) އިން އިންތިޒާމްކޮށްގެން ކުރިއަށްގެންދާ 56 ވަނަ ގައުމީ ޓީޓީ މުބާރާތުގެ ފުރަތަމަ ޑިވިޝަނުގެ ސިންގަލްސް ސެމީ ފައިނަލުން ޖާގަ ހޯދި ކުޅުންތެރިން ކަށަވަރުވެއްޖެ އެވެ.
ފުރަތަމަ ޑިވިޝަނުގެ ފިރިހެން ބައިގެ ސެމީގެ ޖާގަތައް ހޯދާފައިވަނީ މޫސާ މުންސިފާއި މުންތިފް އަހްމަދާއި ޒީސްތު ނަސީމް އަދި ހުސައިން ޝިފްނާން އެވެ.
'ގްރޫޕް އޭ'ގެ އެއް ވަނަ ހޯދައިގެން ސެމީގެ ޖާގައެއް މުންސިފް ހޯދި އިރު، އެ ގްރޫޕުގެ ދެ ވަނައިގެ ގޮތުގައި ސެމީން ޖާގަ ހޯދާފައިވަނީ ހުސައިން ޝިފްނާން އެވެ. 'ގްރޫޕް ބީ'ގެ އެއް ވަނަ ހޯދައިގެން ސެމީގެ ޖާގައެއް ޒީސްތު ހޯދި އިރު، އެ ގްރޫޕުގެ ދެ ވަނައިގެ ގޮތުގައި ސެމީން ޖާގަ ހޯދާފައިވަނީ މުންތިފް އެވެ.
ފުރަތަމަ ޑިވިޝަނުގެ އަންހެން ބައިގެ ސެމީގެ ޖާގަތައް ހޯދާފައިވަނީ މުއީނާ މުހައްމަދާއި ފާތިމަތު ޖުމާނާ އާއި ރަފާ ނާޒިމް އަދި ޝިއުރާ ޝަރީފް އެވެ.
އަންހެން ބައިގެ 'ގްރޫޕް އޭ'ގެ އެއް ވަނައިގެ ގޮތުގައި ރަފާ ސެމީން ޖާގަ ހޯދި އިރު، އެ ގްރޫޕްގެ ދެ ވަނައިގެ ގޮތުގައި ސެމީން ޖާގަ ހޯދާފައިވަނީ ޖުމާނާ އެވެ. 'ގްރޫޕް ބީ'ގެ އެއް ވަނަ ހޯދައިގެން މުއީނާ ސެމީން ޖާގަ ހޯދި އިރު، އެ ގްރޫޕްގެ ދެ ވަނައިގެ ގޮތުގައި ސެމީން ޖާގަ ހޯދާފައިވަނީ ޝިއުރާ އެވެ.
ފިރިހެން ޑިވިޝަންގެ ސެމީގެ ފުރަތަމަ މެޗުގައި މިރޭ މުންސިފާ ދެކޮޅަށް މުންތިފް ނުކުންނަން ޖެހޭ އިރު، ސެމީގެ ދެވަނަ މެޗުގައި ޝިފްނާންއާ ދެކޮޅަށް މިރޭ ޒީސްތު ނުކުންނާނެ އެވެ. އަންހެން ޑިވިޝަންގެ ސެމީގެ ފުރަތަމަ މެޗުގައި މިރޭ މުއީނާއާ ދެކޮޅަށް ޖުމާނާ ނުކުންނަ އިރު، ސެމީގެ ދެވަނަ މެޗުގައި ޝިއުރާއާ ދެކޮޅަށް މިރޭ ރަފާ ނުކުންނާނެ އެވެ.
އެ މެޗުތަކުގެ އިތުރުން ނުވަ އަހަރުން ދަށުގެ އަންހެން އަދި ފިރިހެން ބައިގެ ފައިނަލާއި 15 އަހަރުން ދަށުގެ އަންހެން އަދި ފިރިހެން ބައިގެ ފައިނަލާއި މިކްސް ޑަބަލްސްގެ ފައިނަލް މެޗު ވެސް މިރޭ ކުރިއަށްދާނެ އެވެ. މިކްސް ޑަބަލްސްގެ ފައިނަލުގައި ވާދަކުރާނީ ޒީސްތު އާއި ރަފާގެ ޕެއާ އާއި މުއީނާ އާއި މުންސިފްގެ ޕެއާ އެވެ.