އުރީދީ ދިވެހި ޕްރިމިއާ ލީގުގައި އިއްޔެ ކުޅުނު މެޗުން ކްލަބް އީގަލްސް 0-0ގެ ނަތީޖާ އަކުން ޔުނައިޓެޑް ވިކްޓަރީއާ އެއްވަރުވިއިރު ރޭ ކުޅުނު މެޗުން ޓީސީ 4-1ގެ ނަތީޖާ އަކުން ބީޖީ އަތުން މޮޅުވެއްޖެއެވެ.
މާޒިޔާ ލީގުގެ އެއް ވަނާގައި އޮތީ 16 މެޗުން 37 ޕޮއިންޓް ލިބިގެންނެވެ. ދެ ވަނާގައި އީގަލްސް އޮތީ 17 މެޗުން 32 ޕޮއިންޓް ހޯދައިގެންނެވެ. ތިން ވަނާގައި އޮތް ޓީސީ އަށް 17 މެޗުން ލިބިފައި ވަނީ 30 ޕޮއިންޓެވެ.
އެ މެޗުގައި ޓީސީގެ ހަތަރު ގޯލުގެ ތެރެއިން ދެ ގޯލު އަލީ ފާސިރު (ސެންޓޭ) ކާމިޔާބު ކޮށްދިން އިރު އޭނާ ވަނީ ޖުމްލަ 20 ގޯލާއި އެކު ލަނޑު ލިސްޓްގެ އެއްވަނައަށް އަރާފަ އެވެ. ދެވަނާގައި މާޒިޔާގެ ކެޕްޓަން އަސަދުﷲ އަބްދުﷲ އޮތީ 18 ގޯލާއި އެކުއެވެ.
ޓީސީގެ އަނެއް ދެ ގޯލު ކާމިޔާބު ކޮށްދިނީ އަލީ ނާފިއު (ކަޅޭ) އާއި ކެޕްޓަން ޔާމިން އިބްރާހިމް (ޔާމްބެ) އެވެ. ބީޖީއަށް ސުން ކަނޑުވާލަ ދިން ގޯލު ކާމިޔާބު ކޮށްދިނީ އަހުމަދު އުސާމްއެވެ.