ބިދޭސީން ރާއްޖޭގެ ފޮޓޯގްރަފީ ދާއިރާގައި އުޅުމަށް އެއްވެސް ހާއްސަ ހުއްދައެއް ދީފައި ނުވާނެކަމަށާއި އެކަން ހުއްޓުވާނެ ކަމަށް އިކޮނޮމިކް މިނިސްޓްރީން ބުނެފިއެވެ.
ރަޖިސްޓާ އޮފް ކޮމްޕެނީ މަރިޔަމް ވިސާމް މިއަދު ސަން އަށް ވިދާޅުވީ، ފޮޓޯ ނެގުމުގެ ދާއިރާއަކީ ހަމައެކަނި ދިވެހިންނަށް ހާއްސަކޮށްފައިވާ ދާއިރާއެއް ނަމަވެސް ބައެއް ބިދޭސީން އޮޅުވާލުންތަކާއެކު އެ ދާއިރާގައި ހަރަކާތްތެރިވާ ކަމަށާއި އެކަން ހުއްޓުވާނެ ކަމަށެވެ.
"ބޮޑެތި ރިސޯޓްތަކުން މިސްއަންޑަސްޓޭންޑް ވާގޮތަށް އެބަ ވާހަކަ ދައްކަވާ. އެބޭފުޅުން އެބަ ވިދާޅުވޭ ހާއްސަ ހުއްދައެއްއޮވެއޭ. އެއްވެސް ހާއްސަ ހުއްދައެއް ނޯންނާނެ. އަޅުގަނޑުމެން ވަރަށް ސާފުކޮށް ބުނަން ބޭނުންވޭ އެއްވެސް ހާއްސަ ހުއްދައެއް އެއްވެސް ވިޔަފާރިއަކަށް ފަތުރުވެރިކަމުގައި ހަރަކާތްތެރިވާ އެއްވެސް ބަޔަކަށް ދީފައެއް ނޯންނާނެ، ބިދޭސީ ފޮޓޯގުރާފަރުން ފޮޓޯގުރަފީ އެޖެންސީއާއެކު އެގްރިމެންޓްސް ހަދާކަށް،" ވިސާމް ވިދާޅުވިއެވެ.
ބިދޭސީ ފޮޓޯގުރާފަރުންނާ ގުޅޭގޮތުން ހުށަހަޅާ ޝަކުވާތައް ޓޫރިޒަމް މިނިސްޓްރީއާއި އިމިގްރޭޝަންއާއި ގުޅިގެން ބަލަމުންދާ ކަމަށާއި އެއަށްފަހު ފިޔަވަޅު އަޅާނެ ކަމަށް ވިސާމް ވިދާޅުވިއެވެ.
ފޮޓޯގްރަފީ ދާއިރާ ހަމައެކަނި ދިވެހިންނަށް ހާއްސަ ކުރުމުން އޭގެ ފައިދާތައް ދިވެހި ޒުވާނުންނަށް ކުރާ ކަމަށާއި ސަރުކާރުންނާއި އަމިއްލަ ފަރާތްތަކުންވެސް ދަނީ ދިވެހި ފޮޓޯގްރާފަރުން ތަމްރީން ކުރަމުން ކަމަށް ވިސާމް ވިދާޅުވިއެވެ.
ބިދޭސީން ފޮޓޯގްރަފީގެ އެއްވެސް ދާއިރާއެއްގައި ނޫޅެވޭގޮތަށް ހެދުމުން ބައެއް ބިދޭސީން ދަނީ ދިވެހިން ބޭރަށްނެރެ ލިބޭ ފައިދާ މިގައުމުން ބޭރު ކުރަމުންނެވެ.
ރާއްޖޭގައި ފޮޓޯ ނަގައިގެން އާމްދަނީ ހޯދުމަކީ ދިވެހިންނަށް ހާއްސަ ދާއިރާއެއް ނަމަވެސް ބޭރުގެ ފަރާތަކުން ރާއްޖޭގައި ފޮޓޯނަގައިގެން މި އަހަރު ފުރަތަމަ ހަ މަހުގެ ތެރޭގައި 11 މިލިއަން ރުފިޔާ ގަވައިދާހިލާފަށް ހޯދިއެވެ.