އޮލިމްޕިކް ގޭމްސްގެ 5،000 މީޓަރު ދުވުމުން ވެސް އިނގިރޭސިވިލާތުގެ މޯ ފަރާހް ރަން މެޑެއްޔެއް ހޯދައިފިއެވެ.
ބްރެޒިލްގެ ރިއޯ ޑި ޖެނޭރޯގައި ކުރިއަށްދާ އޮލިމްޕިކް ގޭމްސްގައި ފަރާހް ވަނީ 10،000 މީޓަރު ދުވުމުން ވެސް ރަން މެޑެއްޔެއް ހޯދައިފައެވެ. މިހާރު އޭނާ ވެފައިވަނީ އިނގިރޭސިވިލާތުގެ އެންމެ ކާމިޔާބު ޓްރެކް އެންޑް ފީލްޑް އެތުލީޓަށެވެ.
އޮލިމްޕިކް ގޭމްސްގެ 5،000 މީޓަރު ދުވުމުގައި ދުވެ، ފަރާހް ރޭސް ނިންމާފައިވަނީ 13 މިނެޓާއި 3.30 ސިކުންތުންނެވެ. އެ އިވެންޓުން ރިހި މެޑެލް ހޯދާފައިވަނީ 13 މިނެޓާއި 3.90 ސިކުންތުން ރޭސް ނިންމި އެމެރިކާގެ ޕައުލް ކިޕްކެމޮއި ޗެލީމޯ އެވެ. އަދި އެ އިވެންޓުން ލޯ މެޑެލް ހޯދާފައިވަނީ 13 މިނެޓާއި 4.35 ސިކުންތުން ރޭސް ނިންމި އިތިއޯޕިއާގެ ހަގޯސް ގެބްރިވެޓް އެވެ.
ފަރާހް ވަނީ 2012 ވަނަ އަހަރުގެ އޮލިމްޕިކްސްގެ 5،000 މީޓަރު އަދި 10،000 މީޓަރު ދުވުމުން ވެސް ރަން މެޑެއްޔެއް ހޯދައިފައެވެ. އޭނާ ވެފައިވަނީ އޮލިމްޕިކްސްގައި އެ ދެ އިވެންޓުގެ ރަން މެޑެލް ދިފާއު ކުރި ދެވަނަ ދުވުންތެރިޔާ އަށެވެ.