އޮލިމްޕިކްސް ގޭމްސް 1984 ވަނަ އަހަރަށް ފަހު، ފުރަތަމަ ފަހަރަށް އަންހެނުންގެ ހަތަރެއް ގުނަ 100 މީޓަރު ރިލޭ އިވެންޓުން އިނގިރޭސީން މެޑެއްޔެއް ހޯދައިފިއެވެ.
ބްރެޒިލްގެ ރިއޯ ޑި ޖެނޭރޯގައި ކުރިއަށްދާ އޮލިމްޕިކް ގޭމްސްގައި އަޝާ ފިލިޕް އާއި، ޑެސިރީ ހެންރީ އާއި ޑިނާ އަޝާ ސްމިތު އަދި ޑެރީލް ނެއިޓާ ހިމެނުނު އިނގިރޭސި ރިލޭ ޓީމުން ވަނީ ލޯ މެޑެއްޔެއް ހޯދައިފައެވެ. އެ ޓީމު 41.77 ސިކުންތުން ރޭސް ނިންމި އިރު، އެއީ އިނގިރޭސިންގެ ގައުމީ ރެކޯޑެކެވެ.
ހަތަރެއް ގުނަ 100 މީޓަރު ދުވުމުން ރަން މެޑެއްޔެއް ހޯދާފައިވަނީ އެމެރިކާއެވެ. އެމެރިކާ ޓީމުން ރޭސް ނިންމާފައިވަނީ 41.01 ސިކުންތުންނެވެ. އެ ޓީމު ވެފައިވަނީ ދުނިޔޭގެ ތާރީހުގައި ދެ ވަނަ އަށް އެންމެ އަވަހަށް އެ ރޭސް ނިންމި ޓީމަށެވެ.
އެ އިވެންޓުގެ ރިހި މެޑެލް ހޯދާފައިވަނީ ޖެމެއިކާގެ ޓީމެވެ. އެ ޓީމުގައި މި ފަހަރުގެ އަންހެނުންގެ 100 މީޓަރު ދުވުމާއި 200 މީޓަރު ދުވުމުން ރަން މެޑެއްޔެއް ހޯދި އެލެއިން ތޮމްސަން ހިމެނެއެވެ. ޖެމެއިކާގެ ޓީމުން ރޭސް ނިންމާފައިވަނީ 41.36 ސިކުންތުންނެވެ.