އޮލިމްޕިކްސްގެ ތާރީހުގައި ހޯދި ނުވަ ވަނަ ރަން މެޑެއްޔާ އެކު ޖެމެއިކާގެ ދުވުންތެރިޔާ އުސައިން ބޯލްޓް ގޭމްސްއާ އަލްވަދާއު ކިޔައިފި އެވެ.
ބްރެޒިލްގެ ރިއޯ ޑި ޖެނޭރޯގައި ކުރިއަށްދާ އޮލިމްޕިކް ގޭމްސްގައި ބޯލްޓް ވަނީ ޖެމެއިކާގެ ޓީމަށް ހަތަރެއް ގުނަ 100 މީޓަރު ރިލޭ ދުވުމުން ރަން މެޑެއްޔެއް ހޯދައިދިނުމަށް އެހީތެރިވެދީފަ އެވެ.
އެ އިވެންޓުގައި ދުވެ، ޖެމެއިކާގެ ޓީމުން ރޭސް ނިންމާފައި ވަނީ 37.27 ސިކުންތުންނެވެ. ރިހި މެޑެލް ހޯދި ޖަޕާނުން 37.60 ސިކުންތުން ރޭސް ނިންމި އިރު، ލޯ މެޑެލް ހޯދި ކެނެޑާ އިން ރޭސް ނިންމާފައި ވަނީ 37.64 ސިކުންތުންނެވެ.
މި ފަހަރުގެ އޮލިމްޕިކް ގޭމްސް އަކީ ބޯލްޓްގެ އެންމެ ފަހު ގޭމްސް ކަމަށް އޭނާ ކުރިން ބުނެފައިވާ އިރު، 2017 ވަނަ އަހަރުގެ ވޯލްޑް ޗެމްޕިއަންޝިޕަށް ފަހު ރިޓަޔާ ވުމަށް އޭނާ ނިންމާފައިވެ އެވެ.
ބޯލްޓް ވަނީ އޭނާ ވާދަކުރި ހުރިހާ އޮލިމްޕިކް ގޭމްސްގެ އިވެންޓަކުން ރަން މެޑެލް ހޯދައިފަ އެވެ. އޮލިމްޕިކްސް 2008، 2012 އަދި މި އަހަރުގެ އޮލިމްޕިކް ގޭމްސްގެ 100 މީޓަރު ދުވުން، 200 މީޓަރު ދުވުން އަދި ހަތަރެއް ގުނަ 100 މީޓަރު ރިލޭ ދުވުން ވެސް އޭނާ ވަނީ ކާމިޔާބުކޮށްފަ އެވެ.