މިދިޔަ އަހަރު ބ. ހިބަޅިދޫއިން ފެނުނު ހަތިޔާރުތަކުގެ ތެރެއިން ބާކީ ހުރި ހަތިޔާރު ހޯދުމަށް ރ. އަތޮޅުގެ ފަޅުރަށެއް ކަމުގައިވާ ރ. ފެންފުށި ބަލައި ފާސްކުރަން ފަށައިފި އެވެ.
ފުލުހުންގެ އިންފޮމޭޝަން އޮފިސަރު އިސްމާއިލް އަލީ "ސަން" އަށް ވިދާޅުވީ، ރިޔާސީ ލޯންޗުކޮޅު ގޮއްވާލި މައްސަލައިގައި އިތުރަށް ބަލަންޖެހޭ ބައެއް ކަންކަން ބެލުމަށްޓަކައި ފުލުހުން މިދޔަ ބުދަ ދުވަހުން ފަށައިގެން ރ. ފެންފުށި ފާސްކޮށްފައިވާ ކަމަށެވެ.
ފެންފުށި ބަލައި ފާސްކުރަމުން އަންނަނީ ބުދަ ދުވަހު ހަވީރު ނެރުނު ކޯޓު އަމުރެއްގެ ދަށުންނެވެ. އެ އަމުރު ނެރުނީ ހިބަޅިދޫއިން ނުފެނި ހުރި ހަތިޔާރުތައް ފެންފުށީގައި ފޮރުވާފައި ހުރި ކަމަށް ބުނާ މައްސަލައަކާ ގުޅިގެންނެވެ.
ކޯޓު އަމުރެއްގެ ދަށުން ފުލުހުން ބ. ހިބަޅިދޫ ބަލައި ފާސްކުރީ މިދިޔަ އަހަރުގެ އޮކްޓޫބަރު މަހުގެ ފަހުކޮޅު އެވެ. އެފަހަރު ފުލުހުން ވަނީ ހިބަޅިދޫގެ ފަޅުތެރެއަށް ފައްތައި، ފޮރުވާފައި ހުރި ހަތިޔާރުތަކެއް ހޯދައިފަ އެވެ.
ފެނުނު ހަތިޔާރުތަކުގެ ތެރޭގައި އޭކޭ 56 ބަޑިއެއް، ސަބް މެޝިންގަންއެއް ކަމުގައިވާ މެޝިން ޕިސްޓަލް ފައިވެއް، ހައި ޕަވާ ޕިސްޓަލްއެއް، ސްނައިޕަރު ބަޑިއެއްގެ ވަޒަނަކާއި ދުރުމިއެއް، ދެ އަތު ބޮން އަދި ގޮއްވުމެއް އިތުރަށް ވަރުގަދަ ކުރުމަށް ބޭނުންކުރާ ސާމާނާއި ޕްލާސްޓިކް އެކްސްޕްލޯސިވްސް ޗާޖަރުތަކެއް ހިމެނެ އެވެ. އަދި އައިއީޑީ (އިމްޕްރޮވައިސިވް އެކްސްޕްލޯސިވް ޑިވައިސް) އެއް ވަނީ ފެނިފައެވެ.
ހިބަޅިދޫއިން ހަތިޔާރު ފެނުނު މައްސަލައިގައި ދައުލަތުން ވަނީ ހަތަރު މީހެއްގެ މައްޗަށް ޓެރަރިޒަމްގެ ދައުވާ އުފުލައިފައެވެ. އެއީ ކުރީގެ ނއިބު ރައީސް އަހުމަދު އަދީބު އަބްދުލް ޣަފޫރާއި ސިފައިންގެ ބަޑި ގުދަނުގެ ކުރީގެ ވެރިޔާ އަހުމަދު ފަޔާޒު އަލީ ރިޒާ އާއި އެފްއޭއެމްގެ ނޮމިލައިޒޭޝަން ކޮމެޓީގެ ކުރީގެ މެމްބަރު މުހައްމަދު ހުސައިން (އޮއިއްޓޭ) އާއި މ. ލޭންޑް އޮފް ގާޑަން އަހުމަދު އިޝްފާހު އަލީގެ އިތުރުން މ. ސެސްނާ މުހައްމަދު އައްލާމް ލަތީފެވެ.