އިމިގްރޭޝަން ބަލިކޮށް، އެސްޓީއޯ އިން ޗެމްޕިއަންކަން ހޯދައިފި

ޔޭޔޭ އައިޑިއާސް ކަޕް ފުޓްސަލް މުބާރާތުގެ ފައިނަލުގައި ކްލަބު އިމިގްރޭޝަން ބަލިކޮށް، އެސްޓީއޯ އިން ޗެމްޕިއަންކަން ހޯދައިފި އެވެ.

ވާދަވެރި ކުޅުމެއް ފެނިގެންދިޔަ ފައިނަލް މެޗުގައި އިމިގްރޭޝަންގެ މައްޗަށް އެސްޓީއޯ އިން ކުރި ހޯދާފައިވަނީ 3-2 ލަނޑުންނެވެ. އެ މެޗާއި މުބާރާތުގެ ނިންމުމުގެ ރަސްމިއްޔާތު ޝަރަފްވެރިކޮށްދެއްވީ ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ރައީސް އަހްމަދު ޠާރިގް (ޓޮމް) އެވެ.

ފައިނަލް މެޗުގައި އެސްޓީއޯ އިން ކާމިޔާބުކުރި ތިން ލަނޑުގެ ތެރެއިން ދެ ލަނޑު އަބްދުﷲ ޝައްފާން ކާމިޔާބުކޮށްދިން އިރު، އެ ޓީމުގެ އަނެއް ލަނޑު ކާމިޔާބުކޮށްދިނީ މުހައްމަދު އިމްރާން އެވެ. މެޗުގައި އިމިގްރޭޝަންގެ ލަނޑުތައް ކާމިޔާބުކޮށްދިނީ ހަސަން އަޒްވާން އާއި ހުސައިން ގައްސާން އެވެ. މެޗުގެ މޮޅު ކުޅުންތެރިޔާގެ މަގާމަށް ހޮވުނީ އެސްޓީއޯ އަށް ދެ ލަނޑު ކާމިޔާބުކޮށްދިން އަބްދުﷲ ޝައްފާން އެވެ.

މުބާރާތުގެ ފައިނަލް މެޗަށްފަހު ވަނަވަނަ އަށް ހޮވުނު ޓީމުތަކާއި ކުޅުންތެރިންނަށް ޓްރޮފީ އާއި ސެޓްފިކެޓް އަދި އިނާމު ހަވާލުކޮށްފައިވެ އެވެ. މުބާރާތުގެ ޗެމްޕިއަންކަން ހޯދި އެސްޓީއޯ އަށް 30،000 ރުފިޔާގެ ފައިސާގެ އިނާމެއް ދިން އިރު، ރަނަރަޕް އިމިގްރޭޝަނަށް ދީފައިވަނީ 10،000 ރުފިޔާގެ ފައިސާގެ އިނާމެވެ.

މުބާރާތުގެ ފެއާޕްލޭ ޓީމާއި، އެންމެ މޮޅު ފަސް ކުޅުންތެރިންނާއި، މުބާރާތުގެ އެންމެ މޮޅު ކުޅުންތެރިޔާ އަދި މުބާރާތުގައި އެންމެ ގިނަ ލަނޑުޖެހި ކުޅުންތެރިޔާ އަށް ޓްރޮފީ އާއި ސެޓްފިކެޓް ވަނީ ހަވާލުކޮށްފަ އެވެ. މުބާރާތުގެ ފެއާޕްލޭ ޓީމަކަށް ހޮވިފައިވަނީ ސެމީ ފައިނަލާ ހަމައިން މުބާރާތާ އަލްވަދާއު ކިޔަން ޖެހުނު ބީއެމްއެލް އެވެ.

މުބާރާތުގެ އެންމެ މޮޅު ފަސް ކުޅުންތެރިންގެ ތެރޭގައި ހިމެނުނީ އިމިގްރޭޝަންގެ އަހްމަދު އަޝްފާން އާއި، އެސްޓީއޯގެ ޝައްފާން އާއި، އެސްޓީއޯގެ ގޯލްކީޕަރު އަބްދުﷲ ނާސިހް އާއި، ބީއެމްއެލްގެ މުހައްމަދު ނާޝިދު އަދި ކަސްޓަމްސްގެ އިބްރާޙިމް މަހުދީ އެވެ.

މުޅި މުބާރާތުގެ އެންމެ މޮޅު ކުޅުންތެރިޔާގެ މަގާމަށް ހޮވުނީ ފައިނަލް މެޗުގެ މޮޅު ކުޅުންތެރިޔާގެ މަގާމު ވެސް ހޯދި އެސްޓީއޯގެ ޝައްފާން އެވެ. އައިޑިއާސް ކަޕްގައި އެންމެ ގިނަ ލަނޑުޖެހި ކުޅުންތެރިޔާގެ މަގާމަށް ހޮވިފައިވަނީ މަޑަވެލީގެ އަލީ ޝިފާއު އެވެ. އޭނާ ވަނީ މުބާރާތުގައި އެ ޓީމަށް ދިހަ ލަނޑު ކާމިޔާބުކޮށްދީފަ އެވެ.

މިދިޔަ މަހުގެ 20 އިން ފެށިގެން މިއަދުގެ ނިޔަލަށް ކުރިއަށްދިޔަ އައިޑިއާސް ކަޕް ފުޓްސަލް މުބާރާތުގެ އެކްސްކްލޫސިވް ސްޕޮންސަރަކީ ބީއެޗްއެމް ޓްރޭޑާސް އެވެ. އޮންލައިން މީޑިއާ ޕާޓްނަރަކީ ސަން އޮންލައިނެވެ.