އައިޑިއާސް ކަޕްގެ ސެމީގެ މެޗުތައް މިރޭ

ޔޭޔޭ އައިޑިއާސް ކަޕް ފުޓްސަލް މުބާރާތުގެ ސެމީ ފައިނަލް މެޗުތައް މިރޭ ކުރިއަށްދާނެ އެވެ.

ކުއާޓާ ފައިނަލް މެޗުތަކުން މޮޅުވެ، ސެމީ އަށް ހޮވުނު ޓީމުތަކަކީ ކްލަބު އިމިގްރޭޝަނާއި، ބީއެމްއެލް އާއި، އެސްޓީއޯ އަދި ކަސްޓަމްސް ރެކްރިއޭޝަން ކްލަބެވެ.

ކުޅިވަރު އެކުވެނި ވެލިދަނޑުގައި ކުޅޭ ސެމީގެ ފުރަތަމަ މެޗުގައި މިރޭ 8:00ގައި އިމިގްރޭޝަނާއި ބީއެމްއެލް ބައްދަލުކުރާ އިރު، މިރޭ 9:00ގައި ކުޅޭ ސެމީގެ ދެވަނަ މެޗުގައި ބައްދަލުކުރާނީ އެސްޓީއޯ އާއި ކަސްޓަމްސް އެވެ.

މި އަހަރުގެ މުބާރާތުގެ ޗެމްޕިއަން ޓީމަށް 30،000 ރުފިޔާގެ ފައިސާގެ އިނާމެއް ހުށަހަޅާ އިރު، ރަނަރަޕް ޓީމަށް 10،000 ރުފިޔާގެ ފައިސާގެ އިނާމެއް ހުށަހަޅާފައިވެ އެވެ. ޗެމްޕިއަން ޓީމާއި ރަނަރަޕް ޓީމުގެ އިތުރުން މުބާރާތުގެ އެންމެ މޮޅު ފަސް ކުޅުންތެރިންނާއި، މުބާރާތުގެ އެންމެ މޮޅު ކުޅުންތެރިޔާ އަދި އެންމެ ގިނަ ލަނޑުޖަހާ ކުޅުންތެރިޔާގެ މަގާމު ހޮވުމަށް ނިންމާފައިވެ އެވެ.

ހއ. ކެލާ އައިލެންޑް ޑިވެލޮޕްމަންޓް އެންޑް އެންވަޔަރަންމެންޓަލް އެވެއާނަސް ސޮސައިޓީ (އައިޑިއާސް) އިން އިންތިޒާމުކޮށްގެން މިދިޔަ މަހުގެ 20 އިން ފެށިގެން މި މަހުގެ 12ގެ ނިޔަލަށް ކުރިއަށްގެންދާ ފުޓްސަލް މުބާރާތުގެ އެކްސްކްލޫސިވް ސްޕޮންސަރަކީ ބީއެޗްއެމް ޓްރޭޑާސް އެވެ. އޮންލައިން މީޑިއާ ޕާޓްނަރަކީ ސަން އޮންލައިނެވެ.