ޔޭޔޭ އައިޑިއާސް ކަޕުގެ ކުއާޓާ ފައިނަލުން ކަސްޓަމްސް ރެކްރިއޭޝަން ކްލަބާއި، އެސްޓީއޯ އަދި ބީއެމްއެލް ޖާގަ ހޯދައިފި އެވެ.
ކަސްޓަމްސް އާއި އެސްޓީއޯ އަދި ބީއެމްއެލް ކުއާޓާގެ ޖާގައެއް ހޯދީ ރޭ ކުޅުނު ދެވަނަ ބުރުގެ މެޗުތަކުން މޮޅުވެގެންނެވެ.
ކަސްޓަމްސް އިން ކުއާޓާގެ ޖާގައެއް ހޯދީ ރޭ ކުޅުނު ދެވަނަ ބުރުގެ މެޗުގައި އެމްއެމްއޭ އަތުން ޕެނަލްޓީ ޖަހައިގެން 6-7 ލަނޑުން މޮޅުވެގެންނެވެ. އެ މެޗުގެ ފުރިހަމަ ވަގުތު ހަމަވި އިރު، 1-1 ލަނޑުން ދެ ޓީމު ވަނީ އެއްވަރުވެފަ އެވެ. މެޗުގައި ކަސްޓަމްސްގެ ލަނޑު އިބްރާހިމް މަދުހީ ހުސައިން ކާމިޔާބުކޮށްދިން އިރު، އެމްއެމްއޭގެ ލަނޑު ކާމިޔާބުކޮށްދިނީ އިސްމާއިލް ނާޝިދު އެވެ. އެ މެޗުގެ މޮޅު ކުޅުންތެރިޔާގެ މަގާމަށް ހޮވުނީ އެމްއެމްއޭގެ ޒައިދާން އަހުމަދެވެ.
އެސްޓީއޯ އިން ކުއާޓާގެ ޖާގައެއް ހޯދީ ރޭ ކުޅުނު ދެވަނަ ބުރުގެ މެޗުގައި ރެއިންބޯ އަތުން 3-2 ލަނޑުން މޮޅުވެގެންނެވެ. އެސްޓީއޯ އިން މެޗުގައި ކާމިޔާބުކުރި ތިން ލަނޑުގެ ތެރެއިން ދެ ލަނޑު މެޗުގެ މޮޅު ކުޅުންތެރިޔާގެ މަގާމަށް ހޮވުނު އަބްދުﷲ ޝައްފާން ކާމިޔާބުކޮށްދިން އިރު، އަނެއް ލަނޑު ކާމިޔާބުކޮށްދިނީ މުހައްމަދު ޝާހު އެވެ. މެޗުގައި ރެއިންބޯގެ ލަނޑުތައް ކާމިޔާބުކޮށްދިނީ ނާއިފް މުހައްމަދާއި އަހްމަދު ސާމިހު އެވެ.
ބީއެމްއެލް އިން ކުއާޓާގެ ޖާގައެއް ހޯދީ ރޭ ކުޅުނު ދެވަނަ ބުރުގެ މެޗުގައި އެންމެ ފަހުގެ ޗެމްޕިއަން އެމްޕީއެލް އަތުން 4-3 ލަނޑުން މޮޅުވެގެންނެވެ. މެޗުގައި ބީއެމްއެލް އިން ކާމިޔާބުކުރި ހަތަރު ލަނޑުގެ ތެރެއިން ދެ ލަނޑު މެޗުގެ މޮޅު ކުޅުންތެރިޔާގެ މަގާމަށް ހޮވުނު މުހައްމަދު ނާޝިދު ކާމިޔާބުކޮށްދިން އިރު، އަނެއް ދެ ލަނޑު ކާމިޔާބުކޮށްދިނީ އިޝާން އިބްރާހިމް އާއި ހުސައިން ޝިފާން އެވެ. މެޗުގައި އެމްޕީއެލްގެ ލަނޑުތައް ކާމިޔާބުކޮށްދިނީ ހުސައިން ނިހާނާއި، މުހައްމަދު އަޔާޒް އަދި އަހްމަދު ރިލްވާން އެވެ.
ކަސްޓަމްސް އާއި އެސްޓީއޯ އަދި ބީއެމްއެލްއާ އެކު ކުއާޓާ އިން މިހާތަނަށް ދެން ޖާގަ ހޯދާފައިވަނީ ކޮޅުފުށްޓާއި އެލައިޑް އަދި އިމިގްރޭޝަނެވެ.
އައިޑިއާސް ކަޕްގެ ދެވަނަ ބުރުގެ ފަހު ދެ މެޗު މިރޭ ކުޅުމަށް ހަމަޖެހިފައިވެ އެވެ. މިރޭ 8:00 ގައި ކުޅޭ މެޗުގައި އެމްއާރްޑީސީ އާއި ޓިޑްސް ބައްދަލުކުރާ އިރު، މިރޭ 9:00 ގައި ކުޅޭ މެޗުގައި ބައްދަލުކުރާނީ މަޑަވެއްޔާއި އާސަންދަ އެވެ. އެ މެޗުތަކުން މޮޅުވާ ޓީމުތަކަށް ކުއާޓާގެ ފަހު ޖާގަ ލިބޭނެ އެވެ.
މި އަހަރުގެ މުބާރާތުގެ ޗެމްޕިއަން ޓީމަށް 30،000 ރުފިޔާގެ ފައިސާގެ އިނާމެއް ހުށަހަޅާ އިރު، ރަނަރަޕް ޓީމަށް 10،000 ރުފިޔާގެ ފައިސާގެ އިނާމެއް ހުށަހަޅާފައިވެ އެވެ. ޗެމްޕިއަން ޓީމާއި ރަނަރަޕް ޓީމުގެ އިތުރުން މުބާރާތުގެ އެންމެ މޮޅު ފަސް ކުޅުންތެރިންނާއި، މުބާރާތުގެ އެންމެ މޮޅު ކުޅުންތެރިޔާ އަދި އެންމެ ގިނަ ލަނޑުޖަހާ ކުޅުންތެރިޔާގެ މަގާމު ހޮވުމަށް ނިންމާފައިވެ އެވެ.
ހއ. ކެލާ އައިލެންޑް ޑިވެލޮޕްމަންޓް އެންޑް އެންވަޔަރަންމެންޓަލް އެވެއާނަސް ސޮސައިޓީ (އައިޑިއާސް) އިން އިންތިޒާމުކޮށްގެން މި މަހުގެ 20 އިން ފެށިގެން އަންނަ މަހުގެ 12ގެ ނިޔަލަށް ކުރިއަށްގެންދާ ފުޓްސަލް މުބާރާތުގެ އެކްސްކްލޫސިވް ސްޕޮންސަރަކީ ބީއެޗްއެމް ޓްރޭޑާސް އެވެ. އޮންލައިން މީޑިއާ ޕާޓްނަރަކީ ސަން އޮންލައިނެވެ.