ޔޭޔޭ އައިޑިއާސް ކަޕްގެ ކުއާޓާ ފައިނަލުގެ ފުރަތަމަ ޖާގަތައް ކޮޅުފުށްޓާއި، އެލައިޑް އަދި ކްލަބު އިމިގްރޭޝަނުން ހޯދައިފި އެވެ.
ކުޅިވަރު އެކުވެނި ވެލިދަނޑުގައި ކުރިއަށްދާ ފުޓްސަލް މުބާރާތުގެ ދެވަނަ ބުރުގެ ފުރަތަމަ މެޗުގައި ވިންސެންޑޯ އަތުން 3-2 ލަނޑުން މޮޅުވެ، ކޮޅުފުށި ވަނީ ކުއާޓާގެ ޖާގައެއް ހޯދައިފަ އެވެ.
ރޭގެ އެ މެޗުގައި ކޮޅުފުށީގެ ލަނޑުތައް ކަމިޔާބުކޮށްދިނީ އަބްދުﷲ ޝުޖާއު އާއި، އާދަމް މިސްބާހު އަދި އިބްރާހިމް ފުރުގާން އެވެ. ވިންސެންޑޯގެ ލަނޑުތައް ކާމިޔާބުކޮށްދިނީ އިސްމާއިލް މަމްދޫހު އަދި އިސްމާއިލް އާސިފް އެވެ. އެ މެޗުގެ މޮޅު ކުޅުންތެރިޔާގެ މަގާމަށް ހޮވުނީ ކޮޅުފުށީގެ ފުރުގާން އެވެ.
ޔޭޔޭ އައިޑިއާސް ކަޕްގެ ދެވަނަ ބުރުގައި އެލައިޑާއި ޕީޖީ ބައްދަލުކުރި މެޗުގެ ތެރެއިން: އެ މެޗު ފަސޭހަކަމާއެކު 5-0 ލަނޑުން ކާމިޔާބުކުރީ އެލައިޑް --- ސަން ފޮޓޯ/ ފަޔާޒް މޫސާ
އެލައިޑުން ކުއާޓާގެ ޖާގައެއް ހޯދީ ރޭ ކުޅުނު ދެވަނަ ބުރުގެ މެޗުގައި ޕީޖީ އަތުން ފަސޭހަކަމާއެކު 5-0 ލަނޑުން މޮޅުވެގެންނެވެ. ރޭގެ މެޗުގައި އެލައިޑުން ކާމިޔާބުކުރި ފަސް ލަނޑުގެ ތެރެއިން ދެ ލަނޑު މެޗުގެ މޮޅު ކުޅުންތެރިޔާގެ މަގާމަށް ހޮވުނު އަހްމަދު ޝުޖާއު ކާމިޔާބުކޮށްދިން އިރު، އަނެއް ލަނޑުތައް ކާމިޔާބުކޮށްދިނީ ހުސައިން ސަވީލާއި، ހުސައިން ޝަރީފު އަދި ހުސައިން ޒާހިރު އެވެ.
އިމިގްރޭޝަނުން ކުއާޓާގެ ޖާގައެއް ހޯދީ ރޭ ކުޅުނު ދެވަނަ ބުރުގެ މެޗުގައި ހިންނަވަރު ޓީމު އަތުން 3-2 ލަނޑުން މޮޅުވެގެންނެވެ. އެ މެޗުގައި އިމިގްރޭޝަންގެ ލަނޑުތައް ކާމިޔާބުކޮށްދިނީ މެޗުގެ މޮޅު ކުޅުންތެރިޔާގެ މަގާމަށް ހޮވުނު ހުސައިން ގައްސާން ލަބީބާއި، އަބްދުﷲ ވާސިފް އަދި ހަސަން އަޒްވާން އެވެ. ހިންނަވަރުން ކާމިޔާބުކުރި ދެ ލަނޑު ވެސް ޖަހައިދިނީ މުހައްމަދު ފަޒީހު އެވެ.
އައިޑިއާސް ކަޕްގެ ދެވަނަ ބުރުގެ ތިން މެޗެއް މިރޭ ވެސް ކުޅުމަށް ހަމަޖެހިފައިވެ އެވެ. މިރޭ 8:00ގައި ކުޅޭ މެޗުގައި ކަސްޓަމްސް އާއި އެމްއެމްއޭ ބައްދަލުކުރާ އިރު، މިރޭ 9:00ގައި ކުޅޭ މެޗުގައި ބައްދަލުކުރާނީ އެސްޓީއޯ އާއި ރެއިންބޯ އެވެ. އަދި މިރޭ 10:00ގައި ކުޅޭ މެޗުގައި ބައްދަލުކުރާނީ އެންމެ ފަހުގެ ޗެމްޕިއަން އެމްޕީއެލް އާއި ބީއެމްއެލް އެވެ.
ޔޭޔޭ އައިޑިއާސް ކަޕްގެ ދެވަނަ ބުރުގައި އެލައިޑާއި ޕީޖީ ބައްދަލުކުރި މެޗުގެ ތެރެއިން: އެ މެޗު ފަސޭހަކަމާއެކު 5-0 ލަނޑުން ކާމިޔާބުކުރީ އެލައިޑް --- ސަން ފޮޓޯ/ ފަޔާޒް މޫސާ
މި އަހަރުގެ މުބާރާތުގެ ޗެމްޕިއަން ޓީމަށް 30،000 ރުފިޔާގެ ފައިސާގެ އިނާމެއް ހުށަހަޅާ އިރު، ރަނަރަޕް ޓީމަށް 10،000 ރުފިޔާގެ ފައިސާގެ އިނާމެއް ހުށަހަޅާފައިވެ އެވެ. ޗެމްޕިއަން ޓީމާއި ރަނަރަޕް ޓީމުގެ އިތުރުން މުބާރާތުގެ އެންމެ މޮޅު ފަސް ކުޅުންތެރިންނާއި، މުބާރާތުގެ އެންމެ މޮޅު ކުޅުންތެރިޔާ އަދި އެންމެ ގިނަ ލަނޑުޖަހާ ކުޅުންތެރިޔާގެ މަގާމު ހޮވުމަށް ނިންމާފައިވެ އެވެ.
ހއ. ކެލާ އައިލެންޑް ޑިވެލޮޕްމަންޓް އެންޑް އެންވަޔަރަންމެންޓަލް އެވެއާނަސް ސޮސައިޓީ (އައިޑިއާސް) އިން އިންތިޒާމުކޮށްގެން މި މަހުގެ 20 އިން ފެށިގެން އަންނަ މަހުގެ 12ގެ ނިޔަލަށް ކުރިއަށްގެންދާ ފުޓްސަލް މުބާރާތުގެ އެކްސްކްލޫސިވް ސްޕޮންސަރަކީ ބީއެޗްއެމް ޓްރޭޑާސް އެވެ. އޮންލައިން މީޑިއާ ޕާޓްނަރަކީ ސަން އޮންލައިނެވެ.