ކޮޅުފުށްޓާއި ވިންސެންޑޯގެ މެޗުން ޔޭޔޭ އައިޑިއާސް ކަޕްގެ ދެވަނަ ބުރުގެ މެޗުތައް މިރޭ ފަށާނެ އެވެ.
ދެވަނަ ބުރުގެ ތިން މެޗެއް މިރޭ ކުޅުމަށް ހަމަޖެހިފައިވާ އިރު، ކުޅިވަރު އެކުވެނި ވެލިދަނޑުގައި ކުޅޭ ދެވަނަ ބުރުގެ ފުރަތަމަ މެޗުގައި ކޮޅުފުށްޓާއި ދެކޮޅަށް ވިންސެންޑޯ ނުކުންނާނީ މިރޭ 8:00 ގައެވެ.
އައިޑިއާސް ކަޕް ދެވަނަ ބުރުގެ ދެވަނަ މެޗުގައި މިރޭ 9:00 ގައި އެލައިޑާއި ޕީޖީ ބައްދަލުކުރާ އިރު، އިމިގްރޭޝަނާއި ހިންވަރު ބައްދަލުކުރާ މެޗު ފެށުމަށް ހަމަޖެހިފައިވަނީ މިރޭ 10:00 ގައެވެ.
އެ ޓީމުތަކުގެ އިތުރުން ދެން ދެވަނަ ބުރުގައި ވާދަކުރާ ޓީމުތަކަކީ ކަސްޓަމްސް، އެމްއެމްއޭ، އެސްޓީއޯ، ރެއިންބޯ، އެމްޕީއެލް، ބީއެމްއެލް، އެމްއާރްޑީސީ، ޓިޑްސް، މަޑަވެލި އަދި އާސަންދަ އެވެ. ދެވަނަ ބުރުގެ މެޗުތަކުން މޮޅުވާ ޓީމުތަކަށް މި މަހުގެ ހަ ވަނަ ދުވަހު ފަށާ ކުއާޓާ ފައިނަލުން ޖާގަ ލިބޭނެ އެވެ.
މި އަހަރުގެ މުބާރާތުގެ ޗެމްޕިއަން ޓީމަށް 30،000 ރުފިޔާގެ ފައިސާގެ އިނާމެއް ހުށަހަޅާ އިރު، ރަނަރަޕް ޓީމަށް 10،000 ރުފިޔާގެ ފައިސާގެ އިނާމެއް ހުށަހަޅާފައިވެ އެވެ. ޗެމްޕިއަން ޓީމާއި ރަނަރަޕް ޓީމުގެ އިތުރުން މުބާރާތުގެ އެންމެ މޮޅު ފަސް ކުޅުންތެރިންނާއި، މުބާރާތުގެ އެންމެ މޮޅު ކުޅުންތެރިޔާ އަދި އެންމެ ގިނަ ލަނޑުޖަހާ ކުޅުންތެރިޔާގެ މަގާމު ހޮވުމަށް ނިންމާފައިވެ އެވެ.
ހއ. ކެލާ އައިލެންޑް ޑިވެލޮޕްމަންޓް އެންޑް އެންވަޔަރަންމެންޓަލް އެވެއާނަސް ސޮސައިޓީ (އައިޑިއާސް) އިން އިންތިޒާމުކޮށްގެން މި މަހުގެ 20 އިން ފެށިގެން އަންނަ މަހުގެ 12ގެ ނިޔަލަށް ކުރިއަށްގެންދާ ފުޓްސަލް މުބާރާތުގެ އެކްސްކްލޫސިވް ސްޕޮންސަރަކީ ބީއެޗްއެމް ޓްރޭޑާސް އެވެ. އޮންލައިން މީޑިއާ ޕާޓްނަރަކީ ސަން އޮންލައިނެވެ.