ރާއްޖޭގެ ކުންފުނިތަކުގެ ކޯޕަރޭޓް ބޯޑުތަކުގައި އަންހެނުންގެ ދައުރާއި ހިއްސާ އިތުރުކޮށް، އަންހެނުންގެ ތަރައްގީއަށް މަސައްކަތް ކުރާ ޖަމިއްޔާ ވިމެން އޮން ބޯޑްސް (ވޮބް)ގެ ފަރާތުން ކުރިޔަށް އޮތް އަހަރު ތެރޭގައި، މުޅި ރާއްޖޭގައި ޖެންޑާ ޑައިވާސިޓީއާ ބެހޭ ސާވޭއެއް ހެދުމަށް ނިންމައިފި އެވެ.
ވިމެން އޮން ބޯޑްސްއިން ބުނާ ގޮތުގައި، އިނގިރޭސި ހައި ކޮމިޝަނާ ގުޅިގެން އެ ޖަމިއްޔާއިން ކުރިޔަށް ގެންދާ މި ސާވޭއަކީ މީގެ ކުރިން ހެދިފައިވާ ރީސާޗެއްގެ މައްޗަށް ބިނާކޮށް ކުރިޔަށް ގެންދާ ސާވޭއެކެވެ. އެ ޖަމިއްޔާއިން ބުނާ ގޮތުގައި، ޖެންޑާ ޑައިވާސިޓީއާއި ދެ ޖިންސުގެ ހަމަހަމަކަމާ ބެހޭ ގޮތުން ކުރެވޭ މި ސާވޭގެ ނަތީޖާތައް، ގައުމީ ފެންވަރުގެ މަހާސިންތާއެއްގައި އާންމުކޮށް، އެއާ ބެހޭ ގޮތުން މަޝްވަރާ ކުރެވޭނެ އެވެ.
ވިމެން އޮން ބޯޑްސްއިން އިތުރަށް ބުނީ، އެ ޖަމިއްޔާއިން ގާއިމުކުރުމަށް ރާވަމުންދާ ކެޕޭސިޓީ ޑިވެލޮޕްމެންޓް ޓްރެއިނިންގ ސެންޓަރު ވެސް އަންނަ އަހަރު ތެރޭގައި ގާއިމު ކުރެވޭނެ ކަމަށެވެ. މާލޭގައި ގާއިމުކުރާ މި މަރުކަޒުގެ މަސައްކަތްތައް އަތޮޅު ތެރެއަށް ފުޅާ ކުރުމަށް ވެސް އެ ޖަމިއްޔާއިން ވަނީ ނިންމައިފައެވެ.
ވިމެން އޮން ބޯޑްސްއިން ރޭ ވަނީ އެ ޖަމިއްޔާގެ އަހަރީ އާންމު ޖަލްސާ ބާއްވައިފައެވެ. އެ ޖަލްސާގައި އެ ޖަމިއްޔާގެ ބޯޑުން ހުސްވެފައިވާ ބައެއް މަގާމުތަކަށް އެކިއެކި ފަރާތްތައް އައްޔަނު ކޮށްފައި ވެ އެވެ.
އެގޮތުން، ޖަމިއްޔާގެ ސެކްރެޓަރީ ޖެނެރަލްގެ މަގާމަށް ގ. ޝީޝާ ޓަވަރު އައިމިނަތު މައިހާ އަހްމަދު އައްޔަނު ކޮށްފައިވާ އިރު، ޖަމިއްޔާގެ ޚަޒާންދާރުގެ މަގާމަށް އައްޔަނުކޮށްފައި ވަނީ މ. ދެކުނުއާގޭ އައިމިނަތު ދުންޔާ އެވެ. އަދި އެ ވިމެން އޮން ބޯޑްސްގެ ބޯޑު މެމްބަރުކަމަށް މއ. އެވަބްރައިޓް ނޫރާ އިބްރަހިމް ޒާހިރު އައްޔަނު ކޮށްފައި ވެ އެވެ.