އައިޑިއާސް ކަޕްގެ އެންމެ ފަހުގެ ޗެމްޕިއަން އެމްޕީއެލް ބަލިކޮށް، އާސަންދައިން އެ މުބާރާތުގެ ދެވަނަ ބުރުގެ އުންމީދު ބޮޑުކޮށްފި އެވެ.
ޔޭޔޭ އައިޑިއާސް ކަޕްގެ 'ގްރޫޕް އެފް'ގައި އެމްޕީއެލްއާ ދެކޮޅަށް ރޭ ކުޅުނު މެޗުން އާސަންދަ މޮޅުވެފައިވަނީ 4-0 ލަނޑުންނެވެ.
އެ ނަތީޖާއާއެކު ކުޅުނު ތިން މެޗުން ލިބުނު ހަ ޕޮއިންޓާއެކު ގްރޫޕް އެފްގެ އެއް ވަނައިގައި އެމްޕީއެލް އޮތް އިރު، ދެވަނައިގައި އޮތް އާސަންދަ އަށް ވެސް ތިން މެޗުން ލިބިފައިވަނީ ހަ ޕޮއިންޓެވެ. ގްރޫޕްގެ ތިން ވަނައިގައި އޮތް ހިންނަވަރަށް ކުޅުނު ދެ މެޗުން ތިން ޕޮއިންޓް ލިބިފައިވާ އިރު، ގްރޫޕްގެ ފުލުގައި އޮތް ޕީއޯ އެސްސީ އަށް ކުޅުނު ދެ މެޗުން އެއްވެސް ޕޮއިންޓެއް ލިބިފައެއް ނުވެ އެވެ. ގްރޫޕް 'އެފް' އިން ދެވަނަ ބުރަށް ދަތުރުކުރާ ޓީމުތައް ކަށަވަރުވާނީ މިރޭ ހިންނަވަރާއި ޕީއޯ އެސްސީ ބައްދަލުކުރާ މެޗަށްފަހު އެވެ.
ރޭ ކުޅުނު ގްރޫޕް އެފްގެ މެޗުގައި އާސަންދަައިގެ ހަތަރު ލަނޑުގެ ތެރެއިން ދެ ލަނޑު އަހްމަދު އަބްދުﷲ ކާމިޔާބުކޮށްދިން އިރު، އަނެއް ދެ ލަނޑު ކާމިޔާބުކޮށްދިނީ އަހްމަދު ސިމްހާން އާއި އަލީ ނަދީމް އެވެ. މެޗުގެ މޮޅު ކުޅުންތެރިޔާގެ މަގާމަށް ހޮވުނީ އާސަންދައިގެ އަހްމަދު އަބްދުﷲ އެވެ.
ރޭ ކުޅުނު ފުރަތަމަ މެޗުގައި ބައްދަލުކޮށްފައިވަނީ 'ގްރޫޕް އީ' އިން ދެވަނަ ބުރުގެ ޖާގަ ކަށަވަރުކޮށްފައިވާ ބީއެމްއެލް އާއި އެމްއާރްޑީސީ އެވެ. އެ މެޗު ނިމިގެންދިޔައީ 3-3 ލަނޑުން ދެ ޓީމު އެއްވަރުވެގެންނެވެ. އެ ނަތީޖާއާއެކު 'ގްރޫޕް އީ'ގެ އެންމެ ކުރީގައި އޮތް އެމްއާރްޑީސީ އާއި ބީއެމްއެލް އަށް ވެސް ތިން މެޗުން ލިބިފައިވަނީ ހަތް ޕޮއިންޓެވެ. އެ ގްރޫޕުގައި ދެން ހިމެނޭ ނައިފަރާއި މުންޑިއާންސް ދެ މެޗު ކުޅުނު އިރު، އެ ދެ ޓީމަށް ވެސް އަދި ޕޮއިންޓެއް ލިބިފައެއް ނުވެ އެވެ.
ރޭ ކުޅުނު 'ގްރޫޕް އީ'ގެ މެޗުގައި ބީއެމްއެލްގެ ލަނޑުތައް ކާމިޔާބުކޮށްދިނީ އިބްރާހިމް ސިނާހު އާއި، މުހައްމަދު ނާޝިދު އަދި އިބްރާހިމް ހަމްދާން އެވެ. މެޗުގައި އެމްއާރްޑީސީން ޖެހި ތިން ލަނޑުގެ ތެރެއިން ދެ ލަނޑު އިސްމާއިލް އީސާ (މެސީ) ކާމިޔާބުކޮށްދިން އިރު، އަނެއް ލަނޑު ކާމިޔާބުކޮށްދިނީ ހުޒައިފަތު ރަޝީދެވެ. އެ މެޗުގެ މޮޅު ކުޅުންތެރިޔާގެ މަގާމަށް ހޮވުނީ އެމްއާރްޑީސީ އަށް ދެ ލަނޑު ކާމިޔާބުކޮށްދިން މެސީ އެވެ.
ހއ. ކެލާ އައިލެންޑް ޑިވެލޮޕްމަންޓް އެންޑް އެންވަޔަރަންމެންޓަލް އެވެއާނަސް ސޮސައިޓީ (އައިޑިއާސް) އިން އިންތިޒާމުކޮށްގެން މި މަހުގެ 20 އިން ފެށިގެން އަންނަ މަހުގެ 12ގެ ނިޔަލަށް ކުރިއަށްގެންދާ ފުޓްސަލް މުބާރާތުގައި 24 ޓީމެއް ވާދަކުރާ އިރު، އެ ޓީމުތައް ހަ ގްރޫޕަކަށް ބަހާލާފައިވެ އެވެ.
މުބާރާތުގެ ދެވަނަ ބުރަށް ދަތުރު ކުރާނީ ކޮންމެ ގުރޫޕަކުން ވެސް އެންމެ ގިނަ ޕޮއިންޓް ހޯދާ ދެ ޓީމެވެ. އޭގެ އިތުރުން ތިން ވަނައަށް ދާ ޓީމުތަކުގެ ތެރެއިން އެންމެ މަތިން ޕޮއިންޓް ލިބޭ ހަތަރު ޓީމަކަށް ވެސް ގަދަ 16 އިން ޖާގަ ލިބޭނެ އެވެ.
މި އަހަރުގެ މުބާރާތުގެ ޗެމްޕިއަން ޓީމަށް 30،000 ރުފިޔާގެ ފައިސާގެ އިނާމެއް ހުށަހަޅާ އިރު، ރަނަރަޕް ޓީމަށް 10،000 ރުފިޔާގެ ފައިސާގެ އިނާމެއް ހުށަހަޅާފައިވެ އެވެ. ޗެމްޕިއަން ޓީމާއި ރަނަރަޕް ޓީމުގެ އިތުރުން މުބާރާތުގެ އެންމެ މޮޅު ފަސް ކުޅުންތެރިންނާއި، މުބާރާތުގެ އެންމެ މޮޅު ކުޅުންތެރިޔާ އަދި އެންމެ ގިނަ ލަނޑުޖަހާ ކުޅުންތެރިޔާގެ މަގާމު ހޮވުމަށް ނިންމާފައިވެ އެވެ.
އައިޑިއާސް ކަޕްގެ އެކްސްކްލޫސިވް ސްޕޮންސަރަކީ ބީއެޗްއެމް ޓްރޭޑާސް އެވެ. އޮންލައިން މީޑިއާ ޕާޓްނަރަކީސަން އޮންލައިނެވެ.