ޔޭޔޭ އައިޑިއާސް ކަޕްގެ ގްރޫޕް ސީގެ އެއް ވަނަ އެސްޓީއޯ ހޯދި އިރު، ގްރޫޕް ޑީގެ އެއް ވަނަ ކްލަބު އިމިގްރޭޝަނުން ހޯދައިފި އެވެ.
ގްރޫޕް ސީގެ އެއް ވަނަ އެސްޓީއޯއިން ހޯދީ ކުޅުނު ތިން މެޗުން ލިބުނު ހަތް ޕޮއިންޓާއެކު އެވެ. ދެ ވަނައިގައި އޮތް އެމްއެމްއޭ އަށް ދެ މެޗުން ތިން ޕޮއިންޓް ލިބިފައިވާ އިރު، ހަތަރު ވަނައިގައި އޮތް ވިންސެންޑީ އަށް ދެ މެޗުން ލިބިފައިވަނީ ދެ ޕޮއިންޓެވެ. ގްރޫޕްގެ ފުލުގައި އޮތް އޮމަދޫ އަށް ތިން މެޗުން އެންމެ ޕޮއިންޓެއް ލިބިފައިވާ އިރު، އެ ޓީމު ވަނީ މުބާރާތަށް އަލްވަދާއު ކިޔަން ޖެހިފަ އެވެ.
ގްރޫޕް ސީގައި މިއަދު ހަވީރު ކުޅުނު މެޗުގައި އޮމަދޫ އަތުން އެސްޓީއޯ ވަނީ 3-1 ލަނޑުން މޮޅުވެފަ އެވެ. އެ މެޗުގައި އެސްޓީއޯގެ ލަނޑުތައް ކާމިޔާބުކޮށްދިނީ އަލީ އަރުޝަދާއި، މުހައްމަދު ޝާހު އަދި މުހައްމަދު އަރީޝް އެވެ. އޮމަދޫގެ ހަމައެކަނި ލަނޑު ކާމިޔާބުކޮށްދިނީ އަހްމަދު ހުމައިދު އެވެ. މެޗުގެ މޮޅު ކުޅުންތެރިޔާގެ މަގާމަށް ހޮވުނީ އެސްޓީއޯގެ މުހައްމަދު ޝާހު އެވެ.
ގްރޫޕް ޑީގެ އެއް ވަނަ އިމިގްރޭޝަނުން ހޯދީ ކުޅުނު ތިން މެޗުން މޮޅުވެ، ހޯދި ނުވަ ޕޮއިންޓާއެކު އެވެ. ގްރޫޕުގެ ދެ ވަނައިގައި އޮތް ޓިޑްސް އަށް ތިން މެޗުން ހަތަރު ޕޮއިންޓް ލިބިފައިވާ އިރު، ތިން ވަނައިގައި އޮތް ޕީޖީ އަށް ދެ މެޗުން ލިބިފައިވަނީ އެއް ޕޮއިންޓެވެ. އަދި ގްރޫޕުގެ ފުލުގައި އޮތް ލަގާނާ އަށް ކުޅުނު ދެ މެޗުން އެއްވެސް ޕޮއިންޓެއް ލިބިފައެއް ނުވެ އެވެ.
މިއަދު ހަވީރު ކުޅުނު މެޗުގައި ޓިޑްސް އަތުން 2-1 ލަނޑުން އިމިގްރޭޝަން ވަނީ މޮޅުވެފަ އެވެ. އެ މެޗުގައި އިމިގްރޭޝަންގެ ލަނޑުތައް ކާމިޔާބުކޮށްދިނީ ހަސަން އަޒްވާން އާއި ޔޫސުފް އުމަރު އެވެ. ޓިޑްސްގެ ހަމައެކަނި ލަނޑު ކާމިޔާބުކޮށްދިނީ އަހްމަދު ސިރާޖެވެ. އެ މެޗުގެ މޮޅު ކުޅުންތެރިޔާގެ މަގާމަށް ހޮވުނީ އިމިގްރޭޝަނުގެ ޔޫސުފް އުމަރެވެ.
ހއ. ކެލާ އައިލެންޑް ޑިވެލޮޕްމަންޓް އެންޑް އެންވަޔަރަންމެންޓަލް އެވެއާނަސް ސޮސައިޓީ (އައިޑިއާސް) އިން އިންތިޒާމުކޮށްގެން މި މަހުގެ 20 އިން ފެށިގެން އަންނަ މަހުގެ 12ގެ ނިޔަލަށް ކުރިއަށްގެންދާ ފުޓްސަލް މުބާރާތުގައި 24 ޓީމެއް ވާދަކުރާ އިރު، އެ ޓީމުތައް ހަ ގްރޫޕަކަށް ބަހާލާފައިވެ އެވެ.
މުބާރާތުގެ ދެވަނަ ބުރަށް ދަތުރު ކުރާނީ ކޮންމެ ގުރޫޕަކުން ވެސް އެންމެ ގިނަ ޕޮއިންޓް ހޯދާ ދެ ޓީމެވެ. އޭގެ އިތުރުން ތިން ވަނައަށް ދާ ޓީމުތަކުގެ ތެރެއިން އެންމެ މަތިން ޕޮއިންޓް ލިބޭ ހަތަރު ޓީމަކަށް ވެސް ގަދަ 16 އިން ޖާގަ ލިބޭނެ އެވެ.
މި އަހަރުގެ މުބާރާތުގެ ޗެމްޕިއަން ޓީމަށް 30،000 ރުފިޔާގެ ފައިސާގެ އިނާމެއް ހުށަހަޅާ އިރު، ރަނަރަޕް ޓީމަށް 10،000 ރުފިޔާގެ ފައިސާގެ އިނާމެއް ހުށަހަޅާފައިވެ އެވެ. ޗެމްޕިއަން ޓީމާއި ރަނަރަޕް ޓީމުގެ އިތުރުން މުބާރާތުގެ އެންމެ މޮޅު ފަސް ކުޅުންތެރިންނާއި، މުބާރާތުގެ އެންމެ މޮޅު ކުޅުންތެރިޔާ އަދި އެންމެ ގިނަ ލަނޑުޖަހާ ކުޅުންތެރިޔާގެ މަގާމު ހޮވުމަށް ނިންމާފައިވެ އެވެ.
އައިޑިއާސް ކަޕްގެ އެކްސްކްލޫސިވް ސްޕޮންސަރަކީ ބީއެޗްއެމް ޓްރޭޑާސް އެވެ. އޮންލައިން މީޑިއާ ޕާޓްނަރަކީ ސަން އޮންލައިނެވެ.