މާލޭ ހުޅަނގު ދެކުނު ފަރާތުގެ ޓީޖެޓީ ސަރަހައްދު ފަޅަށް ވަންނަން ދިޔަ ދޯންޏެއް ސުނާމީ ބިނާ މައިޒާނުގައި މިރޭ ޖެހިއްޖެ އެވެ. މިއީ އެތަނުގައި ދޯންޏެއް ޖެހުނު ތިންވަނަ ފަހަރެވެ. އެ މައިޒާނުގައި މިރޭ ޖެހުނީ "އެލް ޓޫނާ" ނަމަކަށް ކިޔާ ދޯންޏެކެވެ.
ހައުސިން މިނިސްޓްރީން މިރޭ ކުރި ޓުވީޓެއްގައި ބުނެފައި ވަނީ، ސުނާމީ ބިނާ މައިޒާން ހުޅުވިފަހުން އެ މައިޒާނުގައި ތިންފަހަރަށް ދޯންޏެއް ޖެހިފައިވާ ކަމަށެވެ.
A dhoni hits TsunamiBinaa Maizan,for the 3rd time since its opening.The Maizan was built on same footprint as before pic.twitter.com/wTTjflQGtD
— housing.gov.mv (@HousingGovMv) July 16, 2016
ފުލުހުންގެ އިންފޮމޭޝަން އޮފިސަރު އިސްމާއިލް އަލީ ވިދާޅުވީ، ސުނާމީ ބިނާ މައިޒާނުގައި ދޯންޏެއް ޖެހުނު މައްސަލަ ފުލުހުން ތަހުގީގު ކުރަމުން އަންނަ ކަމަށެވެ.
ސުނާމީ ބިނާ މައިޒާނުގައި ދޯންޏެއް ޖެހިފައިވާއިރު މިދިޔަ މޭ މަހުގެ ތެރޭގައި ވެސް އެ ސަރަހައްދަށް ވަންނަން ދިޔަ ދޯންޏެއް ވަނީ އެ މައިޒާނުގައި ޖެހިފަ އެވެ. އެ ހާދިސާގައި އެ ދޯނީގެ ކެޕްޓަން ވަނީ ހައްޔަރު ކުރުމަށްފަހު ދޫކޮށްލާފަ އެވެ. އޭނާ ހުރީ މަސްތުގެ ހާލަތުގައި ކަމަށާއި އޭނާގެ އަތުގައި ކަނޑުއުޅަނދު ދުއްވުމުގެ ހުއްދައެއް ވެސް ނެތް ކަމަށް ފުލުހުން ވަނީ ބުނެފަ އެވެ.
ހައުސިން މިނިސްޓަރު މުއިއްޒު މީގެކުރިން ވިދާޅުވީ މާލޭ ހުޅަނގު ދެކުނު ފަރާތުގެ ޓީޖެޓީ ސަރަހައްދު ފަޅަށް ވަދެ ނުކުންނަ އުޅަނދުފަހަރު ސުނާމީ ބިނާ މައިޒާނަށް ސަމާލުވުމަށް އެދިލައްވާ ކަމަށެވެ.
ކުރީގެ ތިންރުއް ޕާކަށް ސުނާމީ ބިނާ ބަދަލުކޮށް، ތަރައްގީ ކޮށްފައިވާ ސުނާމީ ބިނާ މައިޒާނަކީ ގާތްގަނޑަކަށް ތިން މިލިއަން ރުފިޔާ ހަރަދުކޮށްގެން ހަދާފައިވާ ތަނެކެވެ.