ކުރީގެ ޑިފެންސް މިނިސްޓަރު ކާނަލް މުހައްމަދު ނާޒިމް ދިރިއުޅުއްވާ އެޕާޓްމެންޓުން ފެނުނީ އެމްއެންޑީއެފްގެ ހަތިޔާރެއް ނަމަވެސް ނާޒިމްގެ މައްޗަށް ކޮށްފައިވާ ދައުވާގެ އެއްބައި، ހަތިޔާރު ގެންގުޅުކަން އޭނާގެ މައްޗަށް ސާބިތުވާނެ ކަމަށް ދައުލަތުން މިއަދު ސުޕްރީމް ކޯޓުގައި ބުނެފި އެވެ.
ހަނގުރާމަވެރި ހަތިޔާރު ރާއްޖެ އެތެރެކޮށް ގެންގުޅުނުކަން ސާބިތުވެ ކުރީގެ ޑިފެންސް މިނިސްޓަރު ކާނަލް މުހައްމަދު ނާޒިމް 11 އަހަރަށް ޖަލަށް ލާން ދަށު ކޯޓުން ހުކުމްކޮށް އެ ހުކުމަށް ހައިކޯޓުން ވަނީ ތާއީދުކޮށްފަ އެވެ.
ނާޒިމްގެ ފަރާތުން އެމައްސަލަ ސުޕްރީމް ކޯޓުގައި އިސްތިއުނާފު ކުރުމުން މައްސަލަ ބަލައި ގަތުމާމެދު ގޮތެއް ނިންމަށް ކުރިއަށް ގެންދިޔަ އިޖުރާއީ އަޑުއެހުމުގެ މިއަދު ބޭއްވި މަޖިލީހުގައި ނާޒިމްގެ ފަރާތުން ހުށަހެޅި ނުކުތާތަކަށް ޖަވާބުދާރީވަމުން ދައުލަތުގެ ވަކީލު ވިދާޅުވީ އެމްއެންޑީއެފްގެ ފަރާތުން ކެޕްޓަން އަލީ އިހުސާން ހައިކޯޓުގައި ހެކިބަސް ދެމުން ނާޒިމްގެ އެޕާޓްމެންޓުން ފެނުނު ހަތިޔާރާއި އެމްއެންޑީއެފްގެ އާމަރީގައި ހުރި ހަތިޔާރާ އެއްގޮތް ކަމެއް ހުރިކަމަށް ބުނި ނަމަވެސް އެކަން ޔަގީން ކޮށްދީފައިނުވާ ކަމަށެވެ.
ނާޒިމްއަށް އެ ހަތިޔާރު ލިބުނު ގޮތް ނާޒިމް ސާބިތުކޮށްދީފައި ނުވާތީއާއި ދައުލަތުން ހުށަހެޅި ހެކިންގެ ހެކިބަހުން ނާޒިމްގެ މައްޗަށް އެމައްސަލަ ސާބިތުވާ ކަމަށް ދައުލަތުގެ ވަކީލު ވިދާޅުވި އެވެ. އަދި ހަތިޔާރު ފެނިގެން ނާޒިމް މަގާމުން ވަކިކުރުމުގެ ކުރިން އޭނާ ހުރީ ޑިފެންސް މިނިސްޓަރުގެ މަގާމުގައި ކަމުން މީހަކު ލައްވާ އެމްއެންޑީއެފް އާމަރީން ހަތިޔާރު ނެގުމުގެ ފުރުސަތު ނާޒިމަށް އޮތް ކަމަށް ދައުލަތުގެ ވަކީލު ވިދާޅުވި އެެވެ.
ނާޒިމްގެ އެޕާޓްމެންޓުން ފެނުނީ އެމްއެންޑީއެފްގެ އާމަރީގެ ހަތިޔާރެއް ނަމަވެސް ދައުވާގައި ބުނާ ހަތިޔާރު ގެންގުޅުނުކަން ނާޒިމްގެ މައްޗަށް ސާބިތުވާނެ ކަމަށް ދައުލަތުގެ ވަކީލު ވިދާޅުވި އެވެ. އަދި ނާޒިމްގެ އެޕާޓްމެންޓުން ފެނުނު ހަތިޔާރުގެ ޒިންމާ އެހެންމީހަކު ނަގާފައިނުވާ ކަމަށް ވެސް ދައުލަތުގެ ވަކީލު ވަނީ ވިދާޅުވެފަ އެވެ.
ނާޒިމްގެ އެޕާޓްމެންޓަށް ހަތިޔާރުވެއްދީ އާސިފް ކިޔާ ފުލުހެއްކަމަށް ނާޒިމްގެ ފަރާތުން ބުނި ނަމަވެސް އެއީ ހަގީގަތާ ހިލާފު ވާހަކަތަކެއްކަމަށް ދައުލަތުގެ ވަކީލު ވަނީ ވިދާޅުވެފަ އެވެ. އަދި އެއީ މީގެ ކުރިން ހައިކޯޓާއި ދަށުކޯޓުގައި ވެސް ނާޒިމްގެ ފަރާތުން ފާހަގަކޮށްފައިވާ ވާހަކައެއް ނޫންކަމަށާއި އެހެންކަމުން އެކަން ސާބިތު ކުރުމަށް ސުޕްރީމް ކޯޓަށް ހެކިން ހާޒިރުކުރަންޖެހޭކަމަށް ނުފެންނަ ކަމަށް ދައުލަތުގެ ވަކީލު ވިދާޅުވި އެވެ.
ކުރީގެ ނައިބު ރައީސް އަހުމަދު އަދީބު އާއި ކުރީގެ ސީޕީ ހުސައިން ވަހީދު އަދި ކުރީގެ ޕީޖީ މުހުތާޒު މުހުސިން ނާޒިމް އެޕާޓްމެންޓް ބަލައި ފާސްކުރިރޭ، ގ. އެނިފެގޭ ބޭރުގައި ކާރެއްގައި ތިބިކަމަށާއި ކަމާ ނުގުޅޭ މީހަކު އެމަގުގައި ބަލައި ފާސްކުރި މަންޒަރު ބަލަން ތިބީ ކީއްވެކަން ސާބިތު ކުރުމަށް އަދީބާއި ހުސައިން ވަހީދު ހެއްކަކަށް ހާޒިރުކޮށްދެން އެދުނު ނަމަވެސް ހާޒިރުކުރަން ޖެހެނޭކަމަށް ނުފެންނަ ކަމަށް ދައުލަތުން ބުންޏެވެ.
ދައުލަތުގެ ވަކީލު ވިދާޅުވީ މީގެ ކުރިން ދަށު ކޯޓަށާއި ހައިކޯޓަށް އަދީބު ހާޒިރުކޮށްދިނުމަށް ހެއްކެއްގެ ގޮތުގައި ހުށަހަޅާފައިނުވާ ކަމަށެވެ. އެހެންކަމުން ސުޕްރީމް ކޯޓަށް އަދީބު ހާޒިރުކުރެވޭނެ ކަމަށް ގަބޫލު ނުކުރެވޭ ކަމަށް ދައުލަތުގެ ވަކީލު ވަނީ ވިދާޅުވެފަ އެވެ.
ނާޒިމްގެ ވަކީލު ހުސްނުއްސުއޫދު ވިދާޅުވީ އަދީބު ހެއްކެއްގެ ގޮތުގައި ކްރިމިނަލް ކޯޓަށް ހުށަހެޅި ހަނދާނެއްވާ ކަމަށާއި އެކަން ޔަގީން ކުރުމަށް ޖެހޭނީ ޗެކްކޮށްލަން ކަމަށެވެ. އިޖުރާއީ އަޑުއެހުންތައް މިއަދުވަނީ ނިންމާލާފަ އެވެ. ނަމަވެސް މައްސަލަ ބަލައިގަތުމާމެދު ގޮތް ނިންމުމަށް އަޑުއެހުން ބާއްވާނެ ދުވަހެއް އިއުލާނެއް ނުކުރެ އެވެ.
އެ މައްސަލާގެ ރިޔާސަތު ބެލެހެއްޓެވީ އުއްތަމަ ފަނޑިޔާރު އަބްދުﷲ ސައީދު އެވެ. އެ މައްސަލައިގެން ބެންޗުގައި ދެން ހިމެނި ވަޑައިގަންނަވަނީ ފަނޑިޔާރު އަލީ ހަމީދު މުހައްމަދާއި ފަނޑިޔާރު އަބްދުﷲ އަރީފު އާއި ފަނޑިޔާރު އާދަމް މުހައްމަދު އަބްދުﷲ ގެ އިތުރުން ފަނޑިޔާރު އަހުމަދު އަބްދުﷲ ދީދީ އެވެ.
ނާޒިމްގެ މައްސަލަ ހިނގާދިޔަގޮތް
- 18 ޖެނުއަރީ 2015: ވަޒީރުކަމުގައި ހުންނަވަނިކޮށް ނާޒިމް ގެއިން ހަތިޔާރު ފެނުނު. އޭގެ ދެ ދުވަސް ފަހުން ވަޒީރުކަމުން ވަކިކުރި
- ނާޒިމް ހައްޔަރު ކުރީ 10 ފެބުރުއަރީ 2015 ވަނަ ދުވަހު
- 23 ފެބުރުއަރީ 2015: ހަނގުރާމަވެރި ހަތިޔާރު ގެންގުޅުމުގެ ދައުވާ އުފުލި
- ނާޒިމްގެ މައްޗަށް ކުރި ދައުވާ ބަދަލުކޮށް 2 މާޗު 2015 ވަނަ ދުވަހު ނާޒިމްގެ މައްޗަށް އަލުން ދައުވާ އުފުލާފައި ވަނީ ހަނގުރާމަވެރި ހަތިޔާރު ރާއްޖެ އެތެރެކޮށް ގެންގުޅުމުގެ ކުށުގައި
- 26 މާޗު 2015: ނާޒިމް 11 އަހަރަށް ޖަލަށް ލާން ހުކުމް ކުރި
- ހައިކޯޓުގައި ހުކުމް އިސްތިއުނާފު ކުރީ 12 އޭޕްރީލް 2015 ގައި
- ނާޒިމްގެ މައްޗަށް ކްރިމިނަލް ކޯޓުން ކުރި 11 އަހަރުގެ ޖަލުހުކުމަށް ތާއީދުކޮށް އިސްތިއުނާފު މައްސަލަ ހައިކޯޓުން ނިންމާފައި ވަނީ 15 މާޗު 2016 ވަނަ ދުވަހު، ނާޒިމް ޖަލަށް ލާން ހުކުމް ކުރިތާ އެއްއަހަރު ފަހުން