މާލޭގެ ގަލޮޅު އަވަށުގައި ހުންނަ މާލެހިޔާ ފްލެޓުތަކަކީ މީހުން ދިރިއުޅުމަށް އެއްވެސް ވަރަކަށް ހެޔޮ ވާނެ ވަރުގެ ތަނެއް ނޫން ކަމަށް މާލެ ސިޓީ ކައުންސިލުން ބުނެފި އެވެ.
އެކައުންސިލުން އިއްޔެ ބޭއްވި ނޫސްވެރިންގެ ބައްދަލުވުމެއްގައި، ގަލޮޅު ދެކުނު ދާއިރާ އިން އެ ކައުންސިލަށް އިންތިޚާބުކޮށްފައިވާ ކައުންސިލަރު ފާތިމަތު ރިޒްވީން (ސައުތު ފާތުން) ވިދާޅުވީ، ގަލޮޅު ދެކުނު އަވަށުގައި އެންމެ ގިނަ ރައްޔިތުން ދިރިއުޅެމުން ދަނީ ސިނަމާލެ އެކެއް، ސިނަމާލެ ދޭއް، ސިނަމާލެ ތިނެއް، މާލެހިޔާ އެކެއް އަދި މާލެހިޔާ ދޭއް ފްލެޓު އިމާރާތްތަކުގައި ކަމުގައިވީ ނަމަވެސް، އޭގެ ތެރެއިން ބައެއް ފްލެޓުތަކުގެ ހާލަތު ވަރަށް ގޯސް ކަމަށެވެ.
އަދި ވަކިން ޚާއްސަކޮށް، މާލެހިޔާ ފްލެޓުތަކުގެ ހާލަތު ވަރަށް ދެރަ ވެފައި ނުރައްކާތެރި ކަމަށް ކައުންސިލަރު ފާތުން ވިދާޅުވި އެވެ.
"މީގެ 25 ވަރަކަށް އަހަރު ކުރިން މާލޭގައި އެޅުނު ފުރަތަމަ ފްލެޓުތައް، ސިނަމާލެ އެކެއް، ދޭއް އަދި ތިނަކަށް ވުރެ މާލެ ހިޔާގެ ފްލެޓުތަކުގެ ހާލަތު ދެރަ. މާލެހިޔާ ހެދިގެން ދިޔައީ ވަރަށް އަވަސް މުއްދަތެއްގައި، ކޮލިޓީއަށް ބަލަންޏާ އެއްވެސް ކަހަލަ ރައްކާތެރިކަމެއް ނެތް އެތަނުގައި،" ފާތުން ވިދާޅުވި އެވެ.
ކައުންސިލަރު ވިދާޅުވީ، މާލެހިޔާ ފްލެޓުތަކުގެ އެންމެ މަތީ ފްލޯތަކުގައި ދިރިއުޅޭ ރައްޔިތުންނަށް އެތަނުގައި ކުރިޔަށް އޮތް އަހަރު ރައްކާތެރިކަމާ އެކު ދިރިއުޅެވޭނެ ކަމުގެ އެއްވެސް ޔަގީންކަމެއް އޭނާގެ ނެތް ކަމަށެވެ.
"އެންމެ މަތީ ފަންގިފިލާގައި ދިރިއުޅޭ ރައްޔިތުންނަށް އެއްވެސް ޔަގީންކަމެއް ނެތޭ ގަނބައިގެން، ޝީޓު ނެއްޓިގެން އެބޭފުޅުން ތިރިއަށް ގޮސްދާނެ ކަމުގެ. އަޅުގަނޑަށް އެއްވެސް އުންމީދެއް ނުކުރެވޭ ކުރިޔަށް އޮތް ތަނުގައި އެތަނުގައި އުޅެވޭނެ ކަމަކަށް،" ކައުންސިލަރު ފާތުން ވިދާޅުވި އެވެ.
ފާތުން ވިދާޅުވީ، އެތަން ރަނގަޅަށް ބަލައި، މަރާމާތު ކުރުމުގެ މަސައްކަތް ކުރަން ޖެހޭ ކަމަށެވެ.
މާލެ ސިޓީ ކައުންސިލްގެ މޭޔަރު މުހައްމަދު ޝިހާބު އަދި ޝިފާ މުހައްމަދު -- ސަން ފޮޓޯ/މާހިލް މުހައްމަދު
މާލެ ސިޓީ ކައުންސިލްގެ ޑެޕިއުޓީ މޭޔަރު ޝިފާ މުހައްމަދު ވިދާޅުވީ، ގަލޮޅުގައި ހުންނަ ފްލެޓުތަކުގެ ހާލަތު ދެރަ ކަމުން، އެތަނަކީ މީހުން ދިރިއުޅުމަށް އެކަށީގެންވާ ތަނެއްތޯ ބެލުމަށް ޓަކައި ސާވޭއެއް ހެދުމަށް ހައުސިންގް މިނިސްޓްރީގެ އެހީތެރިކަމަށް އެދިފައި ވާނެ ކަމަށާއި މިނިސްޓްރީން އެކަމަށް އެދެވޭ ޖަވާބެއް ނުދޭ ކަމަށެވެ.
މޭޔަރު މުހައްމަދު ޝިހާބު ވިދާޅުވީ، އިންޖިނިއަރިންގް ސްޓަޑީއެއް ހެދުމަށް ހައުސިންގް މިނިސްޓްރީގައި އެދުމުން، އެކަން ނުކުރެވޭނެ ކަމަށް އެ މިނިސްޓްރީން އެންގި ކަމަށެވެ. އަދި ސިޓީ ކައުންސިލުގައި ފަންނީ މުވައްޒަފުން ނެތުމުން، ބޭރުގެ ފަރާތްތަކެއްގެ އެހީ ހޯދައިގެން އިންސްޕެކްޝަނެއް ހެދުމަށް ޓަކައި ފައިސާގެ އެހީއަށް ފިނޭންސް މިނިސްޓްރީގައި އެދުމުން، އެކަން ވެސް ކުރުމަށް އެހީތެރިކަމެއް ފޯރުކޮށް ނުދޭ ކަމަށް މޭޔަރު ވިދާޅުވި އެވެ.
"މި ފަހުން މި ހިނގީ އެތަނުގައި އަލިފާނުގެ ހާދިސާއެއް. ދެން އެއަށް ވުރެ ދެރަ ކަންކަމާ ވެސް ކުރިމަތިލާން ޖެހިފައި އޮންނާނީ،" މާލެ ސިޓީގެ މޭޔަރު ވިދާޅުވި އެވެ.
ސިނަމާލެ އެކެއް، ސިނަމާލެ ދޭއް، ސިނަމާލެ ތިނެއް، މާލެހިޔާ އެކެއް އަދި މާލެހިޔާ ދޭއް ފްލެޓްތައް ބަލަހައްޓަނީ މާލޭ ސިޓީ ކައުންސިލުންނެވެ.
މާލޭ ސިޓީ ކައުންސިލުން ކުރި ކޮމެންޓާ ބެހޭ ގޮތުން ފައިނޭންސް މިނިސްޓްރީގެ ބަހެއް ހޯދުމަށް ކުރި މަސައްކަތް ވަނީ ކާމިޔާބު ނުވެފަ އެވެ.