ކޯސްޓްލައިން ހާޑްވެއާ ހުންނަ އިމާރާތުގައި ހިނގި އަލިފާނުގެ ހާދިސާގައި، އެ އިމާރާތުގެ ވަށައިގެން ހުރި ގެތަކަށް ގެއްލުންވުމުން ކޯސްޓްލައިން އިންވެސްޓްމެންޓުން އެ ގެތަކަށް އެއް މިލިޔަން ރުފިޔާގެ ފައިސާގެ އެހީއެއް ދީފި އެވެ.
ނޭޝަނަލް ޑިޒާސްޓާ މެނޭޖްމެންޓް ސެންޓަރުން މިއަދު ބުނީ، އަލިފާނުގެ ހާދިސާގައި ކޯސްޓްލައިން ހާޑްވެއާ އާއި، އެތަނުގެ ވަށައިގެން ހުރި އެހެން ތަންތަނަށް އަލިފާން ފެތުރި، ހިނގައި ދިޔަ ހާދިސާގައި އެކި ފަރާތްތަކަށް ލިބުނު ގެއްލުމާއި ގުޅިގެން، ކޯސްޓްލައިން އިންވެސްޓްމެންޓުން އެ ސެންޓަރާ އެއް މިލިޔަން ރުފިޔާ ހަވާލު ކޮށްފައިވާ ކަމަށެވެ.
އެންޑީއެމްސީން ބުނީ އެ ފައިސާ ކޯސްޓްލައިނުން ހަވާލު ކުރީ، އެ ކުންފުނީގެ ޑިރެކްޓާ ހުސައިން މުހައްމަދު، ޑިފެންސް މިނިސްޓަރު އާދަމް ޝަރީފް އުމަރާ އެކު ބޭއްވި ބައްދަލުވުމެއްގަ އެވެ.
ކޯސްޓްލައިނުގެ ފަރާތުން ދިން މިލިޔަން ރުފިޔާ، ގެއްލުން ލިބުނު ފަރާތްތަކަށް ދޫކުރެވޭނީ ސަރުކާރުން ހަމަޖައްސާ އުސޫލެއްގެ ތެރެއިންނެވެ.
ހޯމަ ދުވަހު ކޯސްޓްލައިނު ހާޑްވެއާގައި ރޯވި އަލިފާންގަނޑު ކޮންޓްރޯލު ކުރެވުނީ ތިން ގަޑިއިރުގެ މަސައްކަތުންނެވެ. އެ އަލިފާންގަނޑު ޖުމްލަ ތިން ގެޔަކަށް ފެތުރިފައިވާ އިރު، ގިނަ ބަޔަކަށް ސަރުކާރުން ބޯހިޔާވަހިކަން ފޯރުކޮށްދީފަ އެވެ.