ކޯސްޓްލައިން ހާޑްވެއާ އިމާރާތުގައި އިއްޔެ ހިނގި އަލިފާނުގެ ހާދިސާގައި ސަރުކާރުގެ އެހީތެރިކަން ހޯދާފައިވާ ބައެއް ފަރާތްތަކަށް އެލައިޑް އިންޝުއަރިންސުގެ އެހީގައި ބޯހިޔާވަހިކަން ފޯރުކޮށްދީފި އެވެ.
އެލައިޑް އިންޝުއަރެންސުގެ އިޖްތިމާއީ ޒިންމާގެ ދަށުން ހާލުގައި ޖެހިގެން ސަރުކާރުގެ އެހީތެރިކަން ހޯދި މީހުންނަށް ދަނީ މާލޭގެ ދެ ގެސްޓް ހައުސްއަކުން ބޯހިޔާވަހިކަން ފޯރުކޮށްދެމުންނެވެ. އެގޮތުން އެއް ގެސްޓު ހައުސް އިން 11 ކޮޓަރި އާއި ދެވަނަ ގެސްޓް ހައުސް އިން ފަސް ކޮޓަރި އެލައިޑުގެ އެހީގައި ވަނީ ހަމަޖައްސާފައެވެ.
އެލައިޑުން ބޯހިޔާވަހިކަން ފޯރުކޮށްދީފައި ވަނީ ޑިޒާސްޓަ މެނޭޖްމަންޓުގެ އެހީތެރިކަން ހޯދި މީހުންގެ ތެރެއިން 48 މީހަކަށެވެ.
ގެސްޓް ހައުސްތަކުން ފުރުސަތު ދިން މީހުންނަށް އެ މީހުންނަށް ހަމަޖައްސައިދިން ހޮޓެލްތަކުގައި ތިބުމުގެ އިންތިޒާމް ހަމަޖައްސާފައި ވަނީ ހަތަރު ދުވަހަށެވެ. ނަމަވެސް އެނބުރި އާއްމު ހާލަތަށް ރުޖޫއަވާން ބޭނުންވާ ބޭފުޅުންނަށް އެކަމުގެ ފުރުސަތު ދީފައިވާއިރު، އިތުރު މުއްދަތެއް ބޭނުންވާ މީހުންނަށް އެ ފުރުސަތު ހަމަޖައްސައިދޭނެ އެވެ.
އެލައިޑުން ބޯހިޔާވަހިކަން ފޯރުކޮށްދީފައި ވަނީ، ފެންވަރު ރަނގަޅު ގެސްޓް ހައުސްތަކުން، ހެނދުނުގެ ނާސްތާއާ އެކުގަ އެވެ. އެބޭފުޅުންނަށް ބޭނުންވާ އެހެން ގަޑިތަކުގެ ކެއުން ހަމަޖައްސައި ދޭނީ ޑިޒާސްޓަރު މެނޭޖްމަންޓް ސެންޓަރުންނެވެ.
މޯލްޑިވްސް ޑިޒާސްޓަމެނޭޖްމެންޓްގެ ފަރާތުން ވާހަކަފުޅު ދައްކަވަމުން ފާތިމަތު ތަސްނީމް މިއަދު ވިދާޅުވީ މިހާތަނަށް އެ މެނޭޖްމެންޓުން އެހީތެރިކަން ފޯރުކޮށްދެމުންދާ ފަރާތްތަކުގެ އަދަދު 136 އަށް އަރާ ކަމަށެވެ. އޭގެ ތެރޭގައި 30 ކުޑަކުދިންނާއި ސުކޫލަށްދާ 21 ކުދިން އަދި އުމުރުން ދުވަސްވީ 65 އަހަރުން މަތީގެ ތިން މީހުންގެ އިތުރުން މާބަނޑު ދެ މީހުން ހިމެނޭ ކަމަށް ވިދާޅުވި އެވެ.
އެ ހުރިހާ ބޭފުޅުނަށް ވެސް ސަރުކާރުން ބޯހިޔާވަހިކަން ފޯރުކޮށްދެއްވާފައި ވަނީ، މާލޭ ގެސްޓް ހައުސްތަކުންނެވެ. އެގޮތުން މާލޭގެ ހަ ގެސްޓް ހައުސްއަކުން އެ ފަރާތްތަކަށް ބޯހިޔާވަހިކަން ފޯރުކޮށްދެމުން ގެންދާ ކަމަށް ޑިޒާސްޓަރު މެނޭޖްމަންޓް ސެންޓަރުން ބުނެ އެވެ.