ރައްޔިތުންގެ މަޖިލީހަށް މިހާރު ހުށަހެޅިފައިވާ، ދެޖިންސުގެ ހަމަހަމަކަމާބެހޭ ބިލު، ނުވަތަ ޖެންޑާ އީކުއަލިޓީ ބިލު އިސްލާހުކޮށް، ގާނޫނުގެ ތެރެއިން ކޯޓާ ސިސްޓަމެއް ނުވަތަ ވަކި ޕަސަންޓެއް އަންހެނުނަށް ޚާއްސަ ކުރުމުގެ ސިސްޓަމެއް ތައާރަފު ކުރުމަށް، ކޯޕަރޭޓް ބޯޑުތަކުގައި އަންހެނުންގެ ހިއްސާ އިތުރުކޮށް، އަންހެނުންގެ ތަރައްގީއަށް މަސައްކަތް ކުރާ ޖަމިއްޔާ ވިމެން އޮން ބޯޑްސްއިން ގޮވާލައިފި އެވެ.
އެޖަމިއްޔާއިން ނެރުނު ބަޔާނެއްގައި ބުނެފައިވަނީ، ކޯޓާ ސިސްޓަމެއް ތައާރަފު ކުރެވިގެން ގޮސްފި ނަމަ އެއީ ރާއްޖޭގެ އާބާދީގެ 51 ޕަސަންޓު ހިއްސާ ކުރާ އަންހެނުންނަށް ތަރައްގީގެ ފުރުސަތުތަކުގައި ބައިވެރިވުމަށް މަގުފަހި ކުރެވިގެން ދާނެ މުހިންމު ފިޔަވަޅަކަށް ވާނެ ކަމަށެވެ.
ވިމެން އޮން ބޯޑްސްގެ ބަޔާނުގައި ބުނީ، މިހާތަނަށް ކުންފުނިތަކުގެ ގަވަރނެންސް ހަރުދަނާކުރުމަށް ކުރެވިފައިވާ މަސައްކަތްތައް އެންމެ ފުރިހަމަގޮތުގައި ހާސިލް ނުކުރެވުނު އެއް ސަބަބަކީ ޤާނޫނީ ގޮތުން އެކަމަށް ބާރު އެޅިފައި ނެތުން ކަމަށެވެ.
އެ ޖަމިއްޔާއިން ބުނީ، 2007 ވަނަ އަހަރު އެކުލަވާލައި، 2014 ވަނަ އަހަރު އިސްލާހު ކުރެވިފައިވާ ކޯޕަރޭޓް ގަވަނަންސް ފްރޭމްވޯކްގެ ތެރެއިން ކޯޓާ ސިސްޓަމެއް ޕަބްލިކް ލިސްޓެޑް ކުންފުނިތަކަށް ތައާރަފު ކުރެވިފައި އޮތް ނަމަވެސް، މިއަހަރާ ހަމައަށް ވެސް ކަނޑައެޅި އަމާޒު ހާސިލު ވެފައި ނުވާ ކަމަށެވެ.
ތިރީސް ޕަސަންޓު އަންހެން ޑިރެކްޓަރުން ބޯޑުތަކުގައި ބައިވެރިވުމަށް ކަނޑައެޅުނު އަމާޒު ހާސިލު ނުވި ސަބަބަކީ ވެސް، ގާނޫނީ އޮނިގަނޑުގެ ތެރެއިން ކޯޓާ ސިސްޓަމެއް، ނުވަތަ ބޯޑު ޑިރެކްޓަރުންގެ ވަކި ޕަސަންޓެއް އަންހެނުންނަށް ޚާއްސަ ކުރުމުގެ ނިޒާމަކަށް ބާރު ލިބިފައި ނެތުމުން ކަމަށް ވިމެން އޮން ބޯޑްސްއިން ބުނެ އެވެ.
ވިމެން އޮން ބޯޑްސްއިން ބުނީ، ޖެންޑާ ކޯޓާ ސިސްޓަމަކީ ދުނިޔޭގެ ކުދި އަދި ބޮޑެތި ގައުމުތަކުގައި މިހާރު ވެސް ތައާރަފުކޮށް، ކާމިޔާބުކަމަށް ދައްކާ ނިޒާމެއް ކަމަށެވެ.
އެގޮތުން، ކޯޓާ ސިސްޓަމް ތައާރަފު ކުރެވިއްޖެ ނަމަ ޖެންޑާ އީކުއަލިޓީ ގާއިމުކުރެވުމުން އަދާ ކުރަންޖެހޭ ޒިންމާއާއި މަސްއޫލިއްޔަތުތައް ކަނޑައެޅި، އަންހެނުންނަށާއި ފިރިހެނުންނަށް ހަމަހަމަ ފުރުސަތުތަކެއް ލިބުމުގެ މަގު ތަނަވަސްވެ، ފިރިހެނުންނެކޭ އެއްފަދައިން އަންހެންނަށް ވެސް މަތީ މަގާމުތަކާއި ގައުމުގެ ބޮޑެތި ނިންމުންތަކުގައި ބައިވެރިވުމުގެ ފުރުސަތު ލިބޭނެ ކަމަށް ބެލެވޭ ކަމަށް ވިމެން އޮން ބޯޑްސްއިން ބުނެ އެވެ.
އޭގެ އިތުރުން، ގައުމު އާރާސްތު ކުރުމުގައި އަންހެނުން ބައިވެރިވުމުން އިގްތިސާދީ އަދި އިޖުތިމާޢީ އެތައް ފައިދާތަކެއް ގައުމަށް ލިބިގެންްދާނެ ކަމަށާއި، ނޭދެވޭ ތައައްސުބުތަކުން ރައްކާތެރިކަން ލިބި މަތީ ލެވެލްތަކުގައި ފުރިހަމަ ބާރާއި އިޚްތިޔާރާއެކު ވަޒީފާއަދާކުރުމުގެ ފުރުސަތު ފުޅާވެ، އަންހެނުންގެ ހުނަރާއި ގާބިލުކަން ފުރިހަމައަށް ބޭނުންކުރެވޭނެ ކަމަށް ވެސް އެޖަމިއްޔާއިން ބުނެ އެވެ.
ޖިންސީ ތަފާތު ކުރުންތައް ނައްތާލުމުގެ ގޮތުން މިދިޔަ ފެބްރުއަރީ މަހުގެ ތެރޭގައި "ޖެންޑާ އީކުއަލިޓީ" ނަމުގައި ރައްޔިތުން މަޖިލީހަށް ބިލެއް ހުށަހެޅުއްވީ މާފަންނު މެދު ދާއިރާގެ މެމްބަރު އަސްމާ ރަޝީދެވެ.
ޖިންސީ ތަފާތު ކުރުންތައް ނައްތާލުމުގެ ބިލުގެ މަގްސަދަކީ ގާނޫނު އަސާސީ އާއި ގާނޫނުތަކުން ލިބިދޭ އަސާސީ ހައްގުތަކާއި މިނިވަންކަން ވަކި ޖިންސަކަށް ނުވަތަ ޖެންޑާއަކަށް ބަލައި ތަފާތު ކުރުމެއް ނެތި ހަމަ ކޮންމެ މީހަކަށް ވެސް ފުރިހަމައަށް ލިބިގެންވާކަން ކަށަވަރުކޮށްދިނުމެވެ.
ބިލުގައި ބުނެފައި ވަނީ އެ ބިލު މާނަކުރަން ވާނީ ގާނޫނު އަސާސީއާ އިސްލާމްދީނުގެ އަސްލުތަކާއި އެއްގޮތްވާ ގޮތުގެ މަތީން ކަމަށެވެ. އަދި ޖިންސުގެ ގާއިމްކުރުމަކީ އިސްލާމްދީނުގެ އަސްލެއް ކަމަށް ބަލައިގެން ބިލު މާނަ ކުރަންޖެހޭނެ ކަމަށް ވެސް ބިލުގައި ބުނެފައިވެ އެވެ.