ބްރަސެލްސް (އޭޕްރިލް 2): ޕެރިހަށް ހަމަލާ ދިން މީހުންގެ ތެރެއިން، ސަލާހް އަބްދުއްސަލާމް އޭނާ ގެންގުޅުނު ބޮން ގޮއްވާނުލީ ގަސްތުގައި، އެހެން މީހުންގެ ސަލާމަތަށްޓަކައި ކަމަށް އޭނާގެ ބޭބެ، މުހައްމަދު އަބްދުއްސަލާމް ބުނެފި އެވެ.
މުހައްމަދު އެހެން ބުނެފައި ވަނީ ފްރާންސުގެ ބީއެފްއެމްޓީވީއާ ވާހަކަ ދައްކަމުންނެވެ.
"އަހަރެން އެކަން ކުރި ނަމަ ބައިވަރު މީހުން މަރުވާނެ. ނަސީބަކުން އަހަންނަކަށް އެކަމެއް ނުކުރެވުނު،" ސަލާހް ބުނި ކަަމަށް މުހައްމަދު ބުންޏެވެ.
މިދިޔަ އަހަރުގެ ނޮވެމްބަރު މަހު ޕެރިހުގެ ކޮންސަޓް ހޯލަކަށާއި، ސްޓޭޑިއަމްއަކަށާއި، ރެސްޓޯރެންޓުތަކަކަށް ދިން ހަމަލާތަކުގެ ސަބަބުން 130 މީހަކު މަރުވި އެވެ.
ފުލުހުން ބުނާ ގޮތުގައި މިދިޔަ މަހުގެ 22ގައި ބްރަސެލްސް އަށް ހަމަލާ ދިނީވެސް ޕެރިހަށް ހަމަލާދިން ހަނގުރާމަވެރި ވިއުގައިންނެވެ. އިސްލާމިކް ސްޓޭޓް (އައިއެސް) އިން ވަނީ ދެހަމަލާގެ ޒިންމާ ނަގާފަ އެވެ.
ބެލްޖިއަމްއަށް އުފަން ފްރާންސުގެ ރައްޔިތެއް ކަމަށްވާ ސަލާހް އަބްދުއްސަލާމް ބްރަސެލްސްގައި ފިލައިގެން އުޅޭތާ ހަތަރު މަސް ފަހުން، އެގައުމުގެ ފުލުހުން އޭނާ ހައްޔަރުކޮށްފައި ވަނީ މިދިޔަ މަހުގެ 18 ވަނަ ދުވަހު އެވެ.
އޭނާ ހައްޔަރުކުރުމަށް ފަހު ފުލުހުން ވަނީ ޕެރިހުގައިި ދިން ހަމަލާތަކުގައި އޭނާގެ ދައުރާ ބެހޭގޮތުން ސުވާލު ކޮށްފަ އެެވެ. ނަމަވެސް، ބެލްޖިއަމްގެ ހަމަލާތަކަށް ފަހު އޭނާ ވަނީ ހަނު ހުރުމުގެ ހައްގު ބޭނުންކޮށްފަ އެވެ.
ބްރަސެލްސްގެ ޖަލުގައި ސަލާހާ ބައްދަލު ކުރުމަށް ފަހު މުހައްމަދު ބުނީ، ޕެރިހުގެ ހަމަލާތަކާ ބެހޭ ތަހުގީގުތަށް ކުރާ ފްރާންސުގެ ފުލުހުންނަށް ސަލާހް އެއްބާރުލުން ދޭން ބޭނުންވާ ކަމަށެވެ. އަދި ޕެރިހުގެ ހަމަލާތަކުގައި އޭނާގެ ޒިންމާ އޮތް ކަމުގައި ވިޔަސް، ބްރަސެލްސްއަށް ދިން ހަމަލާތަކުގައި އޭނާގެ އަތެއް ނޯންނާނެ ކަމަށް ބުނެފަވާ ކަމަށެވެ.
ނަމަވެސް ބެލްޖިއަމްގެ ފުލުހުން ވަނީ ބްރަސެލްސްގައި ހަމަލާ ދިން މީހުންގެ ތެރެއިން ދެމީހުންނާ ސާލިހުއާ ގުޅުމެއްވާ ކަމަށް ބުނެފަ އެވެ.
އެގޮތުން، ބްރަސެލްސްގެ އެއާޕޯޓުގައި ޖާނުން ފިދާވެގެން ހަމަލާ ދިން ޚާލިދު އަލް ބަކްރާއީ ކުއްޔަށް ހިފި އެޕާޓްމެންޓަކުން ސަލާހުގެ އިނގިލީގެ ނިޝާން ފެނިފައިވާ ކަމަށް ފުލުހުން ބުންޏެވެ. އަދި އެއާޕޯޓަށް ހަމަލާ ދިން އިތުރު މީހެއް ކަމަށްވާ، ނާޖިމް ލަޝްރާއީއާ އެއްކޮށް ސެޕްޓެމްބަރު މަހު ސަލާހް އަބްދުއްސަލާމް ހަންގޭރީއާ އޮސްޓްރިއާގެ ބޯޑަރު ހުރަސް ކުރަނިކޮށް، އެދެމީހުންގެ ކާރު ފުލުހުން ހުއްޓުވާފައިވާ ކަމަށް މައްސަލަ ތަހުގީގު ކުރާ ފަރާތްތަކުން ބުނެފައިވެ އެެވެ. (ބީބީސީ)