ޓީބީ ފެތުރުން ކޮންޓްޜޯލް ކުރުމުގައި ލިބިފައިވާ ނަތީޖާއާ މެދު ހިތްހަމަޖެހެވެން ނެތް ކަމަށާއި ޓީބީ ބަލި އިތުރުވެގެންދިއުމުގެ ފުރުސަތު އެބައޮތް ކަމަށް ހެލްތް މިނިސްޓަރު އިރުތިޝާމް އާދަމް ވިދާޅުވެއްޖެ އެވެ.
ދުނިޔޭގެ ޓީބީ ދުވަސް ގައުމީ ފެންވަރެއްގައި ފާހަގަކުރުމަށް މިއަދު ހެނދުނު އާޓްސް ގެލެރީގައި ބޭއްވި ރަސްމިއްޔާތުގައި ވާހަކަފުޅުދައްކަވަމުން ހެލްތް މިނިސްޓަރު ވިދާޅުވީ، ރާއްޖެއަކީ ވެސް ލާމެހިފައި އޮތް މުޖުތަމައުއެއް އޮތް ގައުމެއް ކަމުން ރާއްޖޭގައި ޓީބީ ބަލި އިތުރުވެގެންދިއުމުގެ ފުރުސަތު އެބައޮތް ކަމަށެވެ.
"ވަރަށް ގިނަ ފަރާތްތަކުން މިހާރު ފާހަގަކުރައްވާފައި މި ވަނީ، ރާއްޖޭގައި ޓީބީ ބަލި އިތުރުވެގެންދިއުމުގެ ފުރުސަތު އެބައޮތް ކަމަށް. ރާއްޖޭގައި ވެސް މިއޮތީ ލާމެހިފައި އޮތް މުޖުތަމައުއެއް. އެހެންކަމުން ޓީބީ ފެތުރުމުގެ ޖާގަ އެބައޮތް،" މިނިސްޓަރު ވިދާޅުވި އެވެ.
އެކަމަނާ ވިދާޅުވީ ދުނިޔޭގެ ސިއްހަތު ޖަމިއްޔާއާ ރާއްޖޭގެ އަމާޒަކީ ވެސް ޓީބީ މުޅިން ނައްތާލުން ކަމަށެވެ. އަދި ޓީބީ ނައްތާލުމަށް ކުރަންޖެހޭ ކަންތައްތަކުގައި ސިއްހީ ފަރާތްތަކުން ތައްޔާރަށް އޮތް ކަމަށް ފާހަގަކުރެއްވި އެވެ.
މިއަދުގެ ރަސްމިއްޔާތުގައި ޓީބީ ނައްތާލެއްވުމަށް ގިނަގުނަ މަސައްކަތްތަކެއް ދިގު މުއްދަތެއްގައި ކުރައްވާފައިވާ ކުރީގެ ގައުމީ ޓީބީ ކޮންޓްރޯލް ޕްރޮގްރާމް މެނޭޖަރު އަދި މިދިޔަ އަހަރު ސާކް ޓީބީ އިނާމް ހޯއްދެވި ޝަމީމާ ހުސެއިންނަށް އެ އެވޯޑް ހަވާލުކޮށްދެއްވާފަ އެވެ.
އެ އެވޯޑް ޝަމީމާއާ ހަވާލުކޮށްދެއްވީ ސާކް ޓީބީ އަދި އެޗްއައިވީ ސެންޓަރުގެ ގަވާނިން ބޯޑް މެމްބަރު ޑރ. އަބްދުލް އަޒީޒް ޔޫސުފެވެ.
މީގެ އިތުރުން، ޝަމީމާގެ އަގު ވަޒަންކޮށް ހެލްތް މިނިސްޓްރީން ވެސް ވަނީ ހަނދާނީ ފިލައެއް ހަވާލުކޮށްފައެވެ. ޝަމީމާއަށް އެ އެވޯޑް ހަވާލުކޮށްދެއްވީ ހެލްތް މިނިސްޓަރު އިރުތިޝާމް އާދަމެވެ.