ކޮންމެ އަހަރެއްގެ ޖޫން މަހުގެ ފަސް ވަނަ ދުވަހު ދުނިޔޭގައި ފާހަގަކުރާ ދުނިޔޭގެ ތިމާވެށީގެ ދުވަހާ ގުޅިގެން، ރާއްޖޭގެ ސްކޫލް ދަރިވަރުންނަށް ފޮޓޯ ނެގުމުގެ މުބާރާތެއް ބާއްވަން އެންވަޔަރަމަންޓް މިނިސްޓްރީން ނިންމައިފި އެވެ.
އެ މިނިސްޓްރީ އިން މިއަދު ބުނީ، އެ މުބާރާތުގެ ބޭނުމަކީ ސްކޫލް ދަރިވަރުންގެ މެދުގައި ތިމާވެށީގެ ހޭލުންތެރިކަން އިތުރުކޮށް، ތިމާވެށީގެ ހާލަތާއި މައްސަލަތައް ފޮޓޯގެ ޒަރިއްޔާ އިން ފާޅުކުރުމުގެ ފުރުސަތު ހޯދައިދިނުން ކަމަށެވެ.
އެންވަޔަރަމަންޓް މިނިސްޓްރީ އާއި މޯލްޑިވްސް ފޮޓޯގްރާފާސް އެސޯސިއޭޝަން ގުޅިގެން ބާއްވާ އެ މުބާރާތުގެ ޝިއާރަކީ "ދެމެހެއްޓެނެވި ތަރައްގީއަކަށް ތިމާވެށި" އެވެ. އަދި މުބާރާތް ހުޅުވާލާފައި ވަނީ ތިން އުމުރުފުރާއަކަށެވެ. އެއީ
- 6 – 7 ގްރޭޑް
- 8 – 10 ގްރޭޑް
- 11 – 12 ގްރޭޑް
ޝިއާރުގެ ދަށުން ފޮޓޯތައް ހުށަހެޅޭނެ ތިން ކެޓަގަރީއެއް ވެސް މިނިސްޓްރީން ވަނީ ކަނޑައަޅާފަ އެވެ. އެއީ،
1. އެއީ ވޯޓާ،އެނާޖީ
2. ވޭސްޓް،ޕޮލިއުޝަން
3. "ބަޔޯޑައިވާސިޓީ އެންޑް ލައިވްލިހުޑް"
ފޮޓޯ ހުށަހެޅުމުގައި ދަރިވަރުންނަށް ވަކި އަދަދެއް ކަނޑައެޅިފައިނުވާ އިރު، ކޮންމެ އުމުރުފުރާއަކުން ވަނަތައް ހޮވުމަށް ފަހު، އަގުހުރި އިނާމުތަކެއް ލިބިގެންދާނެ ކަމަށް އެންވާރަމަންޓް މިނިސްޓްރީން ބުނެ އެވެ.
އެ މިނިސްޓްރީން ބުނީ، މުބާރާތައް ފޮޓޯ ހުށަހެޅޭނީ އެކަމަށް ހާއްސަކުރެވިފައިވާ ފޯމާއެކުގައި ކަމަށާއި ފޯމް، އެ މިނިސްޓްރީގެ ރިސެޕްޝަނުންނާ މިނިސްޓްރީގެ ވެބްސައިޓުން ލިބެންހުންނާނެ ކަމަށެވެ.
މުބާރާތަށް ފޮޓޯތައް ބަލައިގަނެވޭނެ އެންމެ ފަހުގެ ތާރީހެއްގެ ގޮތުގައި ކަނޑައަޅާފައި ވަނީ މެއި މަހުގެ ފަސް ވަނަ ދުވަހެވެ. އަދި މުބާރާތަށް ހުށަހަޅާ ފޮޓޯތައް ހިމަނައިގެން ޖޫން މަހުގެ 3-4ގައި މައުރަޒެއް ވެސް ބޭއްވުމަށް ހަމަޖެހިފައިވާ ކަމަށް އެންވާރަމަންޓް މިނިސްޓްރީން ބުނެ އެވެ.