ރޮސްޓޯފްއޮންޑޮން (މާޗް 19): ރަޝިޔާގެ ދެކުނުގެ ސިޓީއެއް ކަމަށްވާ ރޮސްޓޯފްއޮންޑޮންގެ ބައިނަލްއަގްވާމީ ވައިގެބަނދަރުގައި ޖައްސަން އުޅެނިކޮށް ވެއްޓުނު ފްލައިދުބާއީގެ މަތިންދާ ބޯޓު ވެއްޓުމުގެ ހާދިސާގެ ފަހަތުގައި ތިން ސަބަބެއް އޮވެދާނެކަމަށް މިހާދިސާ ތަހްގީގު ކުރުމަށް އެކުލަވާލާފައިވާ ރަޝިޔާގެ ފަންނީ ކޮމިޓީން ބުނެފިއެވެ.
އެކޮމިޓީގެ ރައީސް ވްލަޑިމިޔަރ މާކިން ވިދާޅުވީ، ޕައިލެޓަށް ގޯހެއްހެދުމާއި، މޫސުން ގޯސްވެފައިވުމާ އަދި ޓެކްނިކަލް މައްސަލައެއް ޖެހުން މިތިން ސަބަބުގެ ތެރޭން ސަބަބެއް އެބޯޓު ވެއްޓުމުގެ ފަހަތުގައިވާ ކަމަށް ބެލެވޭކަމުގައެވެ.
މިކޮމިޓީ ބުނާގޮތުން ބޯޓު ޖެއްސުމުގެ ތެރޭގައި ބިމުގައި ޖެހުމުގެ ސަބަބުން ބޯޓުގެ ބައިތައް ވަކިވެ މުޅި ބޯޓުވަނީ ކުދިކުދި ވެފައެވެ. މިމައްސަލަބެލުމަށް ކުރެވޭ މަސައްކަތްތަކުގެ ތެރޭގައި ކަމާބެހޭ ޖިނާއީ ތަހްގީގެއް ހިންގުންވެސް ހިމެނޭކަމަށް އޭނާ ވިދާޅުވިއެވެ.
ބަޖެޓް އެއާލައިނެއް ކަމަށްވާ ބޯއިން 738-800 ގެ ބޯޓު ވެއްޓުނީ، އެބޯޓު ޖައްސަން އުޅުމުގެ ތެރޭގައި ރަންވޭއިން ނެއްޓިގެން ކަމަށްވެއެވެ. މިޙާދިސާގައި އެ ބޯޓުން ދަތުރުކުރި އެންމެން ކަމަށްވާ 55 ފަސިންޖަރުންނާއި 7 ފަޅުވެރިންވަނީ މަރުވެފައެވެ.
އެބޯޓު ދަތުރުކުރީ ދުބާއީ އިން ފުރައިގެން ރަޝިޔާގެ ދެކުނުގެ ސިޓީއެއް ކަމަށްވާ ރޮސްޓޯފްއޮންޑޮން އަށެވެ. ފްލައިޓް ނަންބަރަކީ އެފް ޒެޑް 981 އެވެ.
މަރުވި ފަސިންޖަރުންގެ ތެރޭގައި 33 އަންހެނުންނާއި 18 ފިރިހެނުން ހިމެނެއެވެ. އޭގެ ހަތަރު ކުޑަކުދިން ހިމެނޭއިރު މީގެތެރެއިން 44 މީހުންނަކީ ރަޝިޔާ މީހުންނާއި ޔުކްރޭން މީހުންނެވެ. (އަލްޖަޒީރާ)