ދުނިޔޭގެ ތެލުގެ ބާޒާރަށް އައިސްފައިވާ ބަދަލާ ގުޅިގެން ތެޔޮ ހޯދުމަށް ސަރުކާރުން ކުރަމުން އަންނަ މަސައްކަތް މަޑުޖައްސައިލާފައިވާ ކަމަށް ފިޝަރީޒް މިނިސްޓަރު ޑރ. މުހައްމަދު ޝައިނީ ވިދާޅުވެއްޖެ އެވެ.
"ސަން" ޓީވީގެ 50 މިނެޓު ޕްރޮގުރާމުގައި މިދިޔަ އަންގާރަ ދުވަހުގެރޭ ވާހަކަފުޅުދައްކަވަމުން ޝައިނީ ވިދާޅުވީ މި ދުވަސް ވަރަކީ ދުނިޔޭގެ ބާޒާރުގައި ތެލުގެ އަގު ވަރަށް ދަށްވެފައިވާ ދުވަސްވަރެއް ކަމަށާއި އެހެންކަމުން ލައިސިންސިން ރައުންޑަކަށް ދިއުމަށް މިއީ އެއްމެ ރަނގަޅު ވަގުތުތޯ ސަރުކާރުން ވިސްނަމުންދާ ކަމަށެވެ.
"އެއީ ދުނިޔޭގައި މިކަންކަން ކުރާ އެހެން ފަރާތްތައްވެސް ކުރާ ގޮތް. އެންމެ ރަނގަޅު ދުވަސްވަރަށް ބަލާފައި އެކަން ކުރަން މި ޖެހެނީ އެކަން ކުރުމަށްޓަކައި އެންމެ ރަނގަޅު މީހުން ގެނައުމަށްޓަކައި. ހަމަގައިމުވެސް ރާއްޖެއަކުން ބޭނުމެއް ނުވޭ ސެކަންޑު ސްޓޭންޑަޑެއް ނުވަތަ ތާޑު ސްޓޭންޑަޑެއް. ރާއްޖެއިން ބޭނުން ވަނީ ހަމަ އެންމެ ރަނގަޅު ފަރާތްތައް މިކަމުގައި ސަރުކާރާ ގުޅިގެން މަސައްކަތް ކުރަން. މިހާރު ތެލުގެ މާކެޓު އޮތް ގޮތުން ވެއްޖެ ކަމަށް ވަންޏާ އަޅުގަނޑުމެންނަށް ތަންކޮޅެއް އުނދަގޫ ގަބޫލު ކުރަން މިހުންނަށް ބޮޑެތި ކުންފުނިތައް ޝައުގުވެރިކަން ފާޅުކޮށްފާނެ ކަމަކަށް،" ޝައިނީ ވިދާޅުވި އެވެ.
ޝައިނީ ވިދާޅުވީ މިހާތަނަށް ކުރި ދިރާސާތަކުން ރާއްޖޭގައި ހައިޑްރޯ ކާބަން ހުރިކަން ޔަގީންވެފައިވާ ކަމަށެވެ. ޝައިނީ ވިދާޅުވީ އެކަން މިހާރު ވަރަށް ރަނގަޅަށް ސާފުވެފައިވާ ކަމަށެވެ.
"ސަރުކާރުން ދެ އަހަރު ދުވަސް ވަންދެން މި ކުރި މަސައްކަތަކީ ދެންމެ ތި ވިދާޅުވި ފަދައިން ސަރުކާރާ އިދިކޮޅު ފަރާތްތަކުން ރައްޔިތުންނަށް ފައިދާ ހުރި ކަމެއް ކުރަން އުޅޭނަމަ އެކަމާ ބެހޭ ގޮތުން ބޭރުގައި އެކަންތައް ވިޔަނުދޭން ކުރާ މަސައްކަތްތައް ކޮށްފައިވާތީ އެކަންކަމުގެ މައްޗަށް އަރާ ރާއްޖެއިން ތެޔޮ ހޯދުމަށްޓަކައި އަޅުގަނޑުމެން ބޭރުން ގެންނަ ނުވަތަ އަޅުގަނޑުމެން އިންވައިޓުކޮށްގެން ގެނެވޭ ފަރާތްތަކަށް ކޮންފިޑެންސެއް އަދި މި ގެނެވުނީ،" ޝައިނީ ވިދާޅުވި އެވެ.
ތެޔޮ ހުންނަ ސަރަހައްދުތަކުން ފެންނަ ކަހަލަ މުރަކަ އާއި އެހެން އެހެން ނިޝާންތައް ރާއްޖޭގެ ކަނޑުގެ އަޑިން ފެނިފައިވާ ކަަމަށް ޖަރުމަނުގެ ހެމްބާގް ޔުނިވަސިޓީން ކުރިން ދިރާސާއަކުން ވަނީ ދައްކާފަ އެވެ.
ޖަރުމަނުގެ ޖިއޮލޮޖިކަލް ސާވޭތަކުން ދައްކާ ގޮތުން ރާއްޖޭގެ ސަރަހައްދުގެ ބިމުގެ އަޑިން "ފުލުއިޑެއް ނުވަތަ ގޭސް" އަރާ ކަމުގެ ހެކިތައް ފެނިފައިވާ ކަމަށް ޑރ. ޝައިނީ ވަނީ ކުރިން ވިދާޅުވެފައެވެ. އަދި ރާއްޖޭގައި ތެޔޮ ހުރިކަން ޔަގީނާ ގާތަށް އެނގޭ ކަމަށް ވެސް ޝައިނީ ވަނީ ވިދާޅުވެފައެވެ.