ދުނިޔޭގެ ފުޓްބޯޅައިގެ މައި އިދާރާ (ފީފާ)ގެ ރައީސަކު ހޮވުމަށް ބާއްވާ އިންތިހާބް ފަސްކޮށްދިނުމަށް އެދި އެ އިންތިހާބްގައި ވާދަކުރާ ޖޯޑަންގެ ޕްރިންސް އަލީ ބިން ހުސެއިން ކޯޓް އޮފް އާބިޓްރޭޝަން ފޯ ސްޕޯޓްސްއަށް ހުށަހެޅުއްވި މައްސަލަ ބަލައިނުގަނެ ކޯޓުން ބޭރުކޮށްލައިފިއެވެ.
މިދިޔަ އަހަރުގެ އިންތިހާބުގައި ވާދަކޮށް ނާކާމިޔާބުވެވަޑައިގެންނެވި ޕްރިންސް އަލީ މާދަމާ ސްވިޒަލޭންޑްގެ ޒިޔުރިކްގައި އޮންނަ އެ އިންތިހާބް ހުއްޓުވަން ކޯޓަށް މައްސަލަ ވެއްދީ އިންތިހާބުގެ ތައްޔާރީތަކާއި އިންތިޒާމްތަކާއި މެދު ހިތް ހަމަ ނުޖެހޭ ކަމަށް ވިދާޅުވެއެވެ.
އެގޮތުން ޕްރިންސް އަލީ ފާހަގަކުރެއްވި ކަންތައްތަކުގެ ތެރޭގައި ވޯޓުގެ ސައްހަ ކަން ސާބިތުކުރުމަށް ވޯޓިން ބޫތު އެތެރެ ފެންނަގޮތަށް ބެހެއްޓުން ހިމެނެއެވެ. އޭނާ ވިދާޅުވީ، އެގޮތަށް ހަދަން ޖެހެނީ ވޯޓުލުމަށްފަހު ކަރުދާސް ކޮޅު ފޮޓޯ ނެގުން ހުއްޓުވުމުގެ ގޮތުން ކަމަށެވެ.
މާދަމާ ބާއްވާ އިންތިހާބުގައި ޕްރިންސް އަލީއާއެކު ދެން ވާދަކުރައްވަނީ، އޭއެފްސީގެ ރައީސް ސަލްމާން ބިން އިބްރާހިމް އަލް ހަލީފާ އާއި ޖެރޯމް ޝެމްޕޭން އާއި ޓޯކިޔޯ ސެކްސްވޭލްގެ އިތުރުން ޔޫއެފާގެ ޖެނެރަލް ސެކްރެޓަރީ ޖިއާނީ އިންފަންޓިނޯއެވެ.
ޝެއިޚް ސަލްމާން އަށް އެފްރިކާ އަދި އޭޝިއާގެ ތާއީދު އޮތްއިރު އިންފަންޓީނޯ އަށް ވަނީ ޔޫރަޕާއި ދެކުނު އެމެރިކާގެ ގައުމުތަކުން ތާއިދުކުރާނެ ކަން ހާމްކޮށްފައެވެ. ފީފާގެ 209 މެމްބަރު ގައުމުން ވޯޓުލާ އިންތިހާބު ކާމިޔާބު ކުރެވޭނީ މަދުވެގެން ދެބައިކުޅަ އެއްބައި ވޯޓު ލިބިވަޑައިގެންނެވެ.
ފީފާގެ ރައީސަކު ހޮވަން ވޯޓުލުން މި ބާއްވާނީ 1998 ވަނަ އަހަރުން ފެށިގެން ރައީސްކަން ކުރައްވަމުން އައި ސެޕް ބްލެޓާ މިދޔަ އަހަރުގެ ޖޫން މަހު އިސްތިއުފާ ދެއްވަން ނިންމެވުމުންނެވެ.