ސައުތު އޭޝިއަން ގޭމްސްއަށް ތައްޔާރުވުމަށް ތައިލެންޑްގައި ޓްރެއިނިން ހަދަމުންދާ ގައުމީ ބާސްކެޓްބޯލް ޓީމު ކުޅުނު ތިން ވަނަ މެޗްގައި ޓްރެއިލް އިންޓަނޭޝަނަލް ޔުނިވަސިޓީގެ ޑްރެގަން ބާސްކެޓްބޯލް ޓީމާ ދެކޮޅަށް ކުޅުނު މެޗް 12 ޕޮއިންޓްގެ ތަފާތުން ގައުމީ ބާސްކެޓްބޯލް ޓީމު ބަލިވެއްޖެއެވެ.
މިއަދު ކުޅުނު މެޗްގައި ޓްރެއިލް ޑްރެގަން އިން 74 ޕޮއިންޓް ހޯދިއިރު ރާއްޖޭގެ ޓީމަށް ހޯދިފައިވަނީ 62 ޕޮއިންޓެވެ.
މެޗާ ބެހޭގޮތުން ވާހަކަ ދައްކަމުން ގައުމީ ބާސްކެޓްބޯލް ޓީމުގެ ކޯޗް އަހްމަދު ފަޔާޒު ބުނީ، ޓްރެއިލް ޑްރެގަންއަކީ ފެންވަރުގެ ގޮތުން ތަފާތު ޓީމެއް ކަމަށާއި ޓެކްޓިކަލީ އަދި ފިޒިކަލީވެސް އެޓީމުގެ ކުޅުންތެރިން ވަރުގަދަ ކަމަށެވެ.
ފަޔާޒު ބުނީ، ޓްރެއަލް ޑްރެގަން ޓީމުގެ އެންމެ ބޮޑު ތަފާތަކަށް ފެނުނީ އެޓީމުގެ ހިމެނޭ އިސްކޮޅުން ދިގު ދެކުޅުންތެރިން ކަމަށާއި އެޓީމުން ހޯދި ގިނަ ޕޮއިންޓް ހޯދާފައިވަނީ އެ ދެކުޅުންތެރިން ކަމަށެވެ.
މެޗުން ބަލިވިނަމަވެސް ރާއްޖޭގެ ކުޅުންތެރިންގެ ފަރާތުންވެސް ރަނގަޅު ފައިޓެއް އެޓީމާ ދެކޮޅަށް ދިން ކަމަށާއި ޕޮއިންޓްގެ ގޮތުން ފަރަގު ކުޑަ ކުރެވުމުން ހިތް ހަމަޖެހޭ ކަމަށް ފަޔާޒު ބުންޏެވެ.
އޭނާ ބުނީ، ރާއްޖެއިން ވާދަކުރަންވީ ވެސް ވަރުގަދަ ޓީމުތަކާ ދެކޮޅަށް ކަމަށާއި އޭރުން ދިވެހި ކުޅުންތެރިންނަށް ރަނގަޅު ތަޖުރިބާ ތަކެއް އެ މެޗުތަކުން ލިބިގެންދާނެ ކަމަށެވެ.
މިހާތަނަށް ކުޅުނު ތިން މެޗްގެ ތެރެއިން ރާއްޖެއިން ވަނީ ފުރަތަމަ ކުޅުނު ދެ މެޗް ކާމިޔާބުކޮށްފައެވެ.
އިއްޔެ ބެންކޮކު ޔުނިވަސިޓީގެ ގޯލްޑަން ޝާކް ޓީމާ ދެކޮޅަށް ކުޅުނު މެޗް ރާއްޖެއިން ކާމިޔާބު ކުރީ ތަފާތު ބޮޑު ނަތީޖާއަކުންނެވެ.