ހދ. ނޮޅިވަރަމާއި އެރަށް ކައިރީ އޮންނަ ފަޅުރަށަކުން ވަޒަންތަކެއް ފެނުނު މައްސަލައާ ގުޅިގެން މިހާތަނަށް އެއްވެސް މީހަކު ހައްޔަރުކޮށްފައިނުވާ ކަމަށް ފުލުހުން ބުނެފިއެވެ.
ފުލުހުންގެ މީޑިއާ އޮފިޝަލް މިއަދު ސަން އަށް ވިދާޅުވީ ވަޒަންތައް ހޯދުމުގެ އޮޕަރޭޝަން މިހާރު ނިމިފައިވާ ކަމަށާއި ނަމަވެސް އަދި އެއްވެސް މީހަކު އެކަމާ ގުޅިގެން ހައްޔަރުނުކުރާ ކަމަށެވެ.
"އަދި މިހާތަނަށް އެއްވެސް މީހަކު ހައްޔަރެއް ނުކުރޭ. ފުލުހުން އަންނަނީ އެ މައްސަލަ ތަހުގީގު ކުރަމުން،" އޮފިޝަލް ވިދާޅުވިއެވެ.
ހދ. ނޮޅިވަރަމް ކައިރީ އޮންނަ ފަޅު ރަށަކުން ފުލުހުން ހޯދި ވަޒަންތައް --- ފޮޓޯ: ރާއްޖެ އެމްވީ
ނޮޅިވަރަމް ކައިރީ އޮންނަ ފަޅުރަށެއް ކަމުގައިވާ ހދ. ކުނބުރުދޫން ވަޒަންތަކެއް ފެނިފައި ވަނީ އެރަށަށް ދަތުރު ދިޔަ ބަޔަކަށެވެ. އެރަށުގައި ހުރި ވަޅެއްގެ ތެރެއިން 300 އަށް ވުރެ ގިނަ ވަޒަން ވަނީ ފެނިފައެވެ.
ނޮޅިވަރަމުން ވަޒަންތައް ފެނުނީ ކޮންތަނަކުން ކަމެއް އަދި ސާފެއް ނުވެއެވެ.
މި މައްސަލައާ ގުޅޭ އިތުރު ތަފްސީލެއް ފުލުހުން ހާމަކޮށްފައެއް ނުވެއެވެ.