ދުނިޔޭގެ ކަނޑުތަކަށް މިހާރު ކުނި އަޅަމުންދާ މިންވަރަށް ކުނި އަޅަމުންދާނަމަ 2050 އަންނަންވާ އިރަށް، ބަރުދަނުން ބަލާއިރު ދުނިޔޭގެ ކަނޑުތަކުގައި މަހަށްވުރެ ޕްލާސްޓިކް ކުނި ގިނަވާނެ ކަމަށް ވޯލްޑް އިކޮނޯމިކް ފޯރަމުން ނެރުނު ރިޕޯޓެއްގައި ބުނެފި އެވެ.
މިއަދު ނެރުނު އެރިޕޯޓުގައިވާ ގޮތުން ކޮންމެ އަހަރަކު އަށް މިލިއަން ޓަނުގެ ޕްލާސްޓިކް ކުނި ކަނޑަށް އެޅެ އެވެ. އެއީ ކޮންމެ މިނިޓަކު ކުނި އުކާ ޓްރަކެއްގެ ފުރާ ހުންނަ ޕްލާސްޓިކް ކަނޑަށް އެޅުމާ އެއްވަރުގެ މިންވަރެކެވެ. އެ ރޭޓުން ކުނި އަޅަމުން ދާނަމަ 2030 އަންނަންވާއިރަށް މިނިޓެއްގެ ތެރޭ ކަނޑަށް އެޅޭ ކުނީގެ މިންވަރު ދެ ޓްރަކަށް އިތުރުވާނެ އެވެ. އަދި 2050 އަންނަންވާއިރަށް ހަތަރު ޓްރަކަށް އިތުރުވާނެ އެވެ. އެހާ ހިސާބަށްދާއިރު، ބަރުދަނުގެ ގޮތުން ކަނޑުގައި މަހަށްވުރެ ޕްލާސްޓިކް ގިނަވާނެ އެވެ.
އޭޝިއާ ޕެސިފިކް އިކޮނޯމިކް ކޯޕަރޭޝަނުން ލަފާކުރާ ގޮތުގައި ކަނޑަށް އަޅާ ކުނީގެ ސަބަބުން އެސަރަހައްދުގެ ފަތުރުވެރިކަމަށާއި، މަސްވެރިކަމަށް ކޮންމެ އަހަރަކު 1.3 ބިލިއަން ޑޮލަރުގެ ގެއްލުންވެ އެވެ.
ފާއިތުވި 50 އަހަރު ތެރޭގައި ޕްލާސްޓިކް ބޭނުން ކުރާ މިންވަރު ވަނީ 20 ގުނަ އިތުރުވެފަ އެވެ. އަދި ކުރިއަށް އޮތް 20 އަހަރުތެރޭގައި އެމިންވަރު އަނެއްކާވެސް ދެގުނައަށް އިތުރުވާނެ ކަމަށް ލަފާކުރެވެ އެވެ.