ބަންގަބަންދު ގޯލްޑް ކަޕުގެ ގްރޫޕް "އޭ"ގެ ފުލުގައި އޮތް ސްރީ ލަންކާ އަތުން 1-2ގެ ނަތީޖާއަކުން އެންމެފަހުގެ ޗެމްޕިއަން މެލޭޝިއާ ބަލިވެ، މުބާރާތުން ކަޓައިފި އެވެ.
ޑާކާގެ ބަންގަބަންދު ސްޓޭޑިއަމްގައި މިއަދު ކުޅުނު މެޗަށް ސްރީ ލަންކާ ނުކުތް އިރު އެ ޓީމު ވަނީ މުބާރާތުން އަލްވަދާއު ކިޔަން ޖެހިފަ އެވެ. ލަންކާ އާއި މެލޭޝިއާ ގްރޫޕް ސްޓޭޖުން ކެޓުމުން، ސެމީ ފައިނަލަށް ދަތުރުކޮށްފައި ވަނީ ބަންގްލަދޭޝްގެ ސީނިއާ ޓީމާއި ނޭޕާލެވެ.
ގްރޫޕު "އޭ"ގެ އެއް ވަނަ ޓީމު ކަށަވަރު ވާނީ މިއަދު ހަވީރު ރާއްޖެ ގަޑިން 5:30 ގައި ނޭޕާލާއި ބަންގްލަދޭޝް ބައްދަލު ކުރާ މެޗުންނެވެ.
މެލޭޝިއާ އާއި ލަންކާ މިއަދު ކުޅުނު މެޗުގައި މޮޅަށް ކުޅުނީ މެލޭޝިއާއިންނެވެ. ފުރަތަމަ ހާފުގައި ލަންކާއިން ލަނޑު ޖެހުމަށްފަހު އެ ޓީމުގެ ފަރާތުން ފެނިގެން ދިޔައީ ޑިފެންސިވް ގޭމެކެވެ.
މެޗުގެ ފުރަތަމަ ލަނޑު ލަންކާއިން ކާމިޔާބު ކުރީ 18 ވަނަ މިނެޓުގަ އެވެ. ޕެނަލްޓީ އޭރިއާ ތެރެއިން ޗަތުރަންގާ ސަންޖީވާ ހުރަސްކޮށްލި ބޯޅައަކުން އެ ލަނޑު ލަންކާއަށް ކާމިޔާބުކޮށް ދިނީ ނަޕޫނަ ބަންޑާރަ އެވެ. މެޗުގެ ދެ ވަނަ ލަނޑު ލަންކާއަށް ކާމިޔާބުކޮށްދިނީ މެޗުގެ 62 ވަނަ މިނެޓުގައި ޗަތުރަންގަ އެވެ.
މެލޭޝިއާގެ ހަމައެކަނި ލަނޑު ޖެހީ މެޗުގެ ފަހު 10 މިނެޓުތެރޭގަ އެވެ.
މުބާރާތުގައި މެލޭޝިއާ ތަމްސީލު ކުރަނީ އެ ގައުމުގެ ފުރަތަމަ ޑިވިޝަންގެ ކުލަބެއް ކަމަށްވާ ފެލްޑާ ޔުނައިޓަޑެވެ.
ބަންގުބަންދު ގޯލްޑް ކަޕުގެ ގްރޫޕް ބީގައި ހިމެނޭ ރާއްޖޭގެ ގައުމީ ފުޓްބޯޅަ ޓީމު މާދަމާ ނުކުންނާނީ ބަހުރެއިންއާ ދެކޮޅަށެވެ. އެ މެޗު ކުޅޭނީ މާދަމާ ރާއްޖެ ގަޑިން 2:00 އެވެ. މާދަމާގެ ދެ ވަނަ މެޗުގައި ބައްދަލު ކުރާނީ ބަންގްލަދޭޝްގެ ޒުވާން ޓީމާއި ކެމްބޯޑިއާ އެވެ. މުބާރާތުގެ ގްރޫޕް ބީގެ އެއް ވަނައިގައި ރާއްޖެ އޮތީ ހަ ޕޮއިންޓާއެކުއެވެ.