އަންނަ މޭ މަހުން ފެށިގެން ހައިޑްރޯ ފުލޮރޯ ކާބަން (އެޗްސީއެފްސީ) ގޭސް އެތެރެކުރުމަކީ މަނާ ކަމެއް ކަމަށް އެންވަޔަރަމަންޓް މިނިސްޓްރީން ބުނެފި އެވެ.
އޯޒޯން ފަށަލައަށް ގެއްލުންދޭ މާއްދާތައް ނައްތާލުމަށް ދިވެހިރާއްޖެ އިން ބައިވެރިވެފައިވާ "މޮންޓްރިއަލް ޕްރޮޓޮކޯލް އޮން ސަބްސްޓެންސަސް ދެޓް ޑިޕްލީޓް ދި އޯޒޯން ލޭޔާ" މުއާހަދާގެ ދަށުން އަންނަ މޭ މަހުން ފަށައިގެން އެޗްސީއެފްސީ ހުންނަ ގޭސް ރާއްޖެ އަށް އެތެރެ ކުރުމަކީ މަނާ ކަމެއް ކަމަށެވެ.
އަންނަ މޭ މަހުން ފަށައިގެން އެޗްސީއެފްސީ ހުންނަ ގޭސް ރާއްޖެ އެތެރެ ކުރުން އެންވަޔަރަމަންޓް މިނިސްޓްރީން މަނާ ކޮށްފައިވާ އިރު މިދިޔަ ޑިސެމްބަރު މަހުގެ ހަވަނަ ދުވަހު ރައީސް އަބްދުﷲ ޔާމީން ވަނީ އޯޒޯން ފަށަލައަށް ގެއްލުންދޭ މާއްދާތަކާއި އެފަދަ ކެމިކަލް މާއްދާތައް އެކުލެވޭ އާލާތްތައް ރާއްޖެއަށް އެތެރެކުރުން މަދުކޮށް، ހުއްޓާލުމަށް މަޖިލީހުން ފާސްކުރި ގާނޫނު ތަސްދީގުކުރައްވައިފަ އެވެ.
އިއުލާނުގައި ބުނެފައި ވަނީ އެ މިނިސްޓްރީގެ ބޭނުމަކީ އެފަދަ ކެމިކަލް ރާއްޖެ އަށް އެތެރެކުރުން މަދުކުރުން ކަމަށެވެ. އެގޮތުން 2020 ވަނަ އަހަރުގެ ފަހުން ރާއްޖޭގައި އެންމެ ގިނައިން ވެސް ބޭނުން ކުރެވޭނީ 1.68 މެޓްރިކް ޓަނުގެ ކެމިކަލް ކަމަށާއި އެއީ ވެސް ހަމައެކަނި ހިދުމަތް ދިނުމުގައި ބޭނުމުގައި ކަމަށް އިއުލާނުގައި ބުނެފައިވެ އެވެ.
އޯޒޯން ފަށަލަ ހިމާޔަތް ކުރުމަށް ފިޔަވަޅު އެޅުމާ ބެހޭ ގާނޫނުގައި އޯޒޯނަށް ގެއްލުންދޭ ކެމިކަލް މާއްދާތަކުގެ ތެރެއިން 25 ބާވަތެއް ރާއްޖެއަށް އެތެރެކުރުން މަނާކޮށްފައިވެ އެވެ.
އޯޒޯން ފަށަލަ ހިމާޔަތް ކުރުމަށް ފިޔަވަޅު އެޅުމާ ބެހޭ ގާނޫނުގައި ބުނެފައިވާ ގޮތުން ރާއްޖެއަށް އެތެރެ ކުރުން މަނާކޮށްފައިވާ ކެމިކަލް މާއްދާއެއް ރާއްޖެ އަށް އެތެރެކޮށްފި ނަމަ އެތެރެ ކުރާ ކޮންމެ ކިލޯގްރާމަކަށް 1،000 ރުފިޔާ އާއި 8،000 ރުފިޔާގެ އަދަދަކުން ޖޫރިމަނާ ކުރެވޭނެ އެވެ. އަދި އެފަދަ ކެމިކަލް މާއްދާއެއް އެކުލެވޭ އާލާތެއް އެތެރެކޮށްފި ނަމަ 10،000 ރުފިޔާ އާއި 100،000 ރުފިޔާގެ ދެމެދުގެ އަދަދަކުން ޖޫރިމަނާ ކުރަންވާނެ ކަމަށް ގާނޫނުގައިބުނެފައިވެ އެވެ.
އަންނަ އަހަރުގެ މެއި މަހުން ފެށިގެން ރާއްޖެ އަށް އެތެރެ ކުރުން ކޮންޓްރޯލްކޮށްފައިވާ މާއްދާއެއް އެތެރެކޮށްފި ނަމަ 10،000 ރުފިޔާ އާއި 100،000 ރުފިޔާއާ ދެމެދުގެ އަދަދަކުން ޖޫރިމަނާ ކުރައްވާނެ ކަމަށް އެ ގާނޫނުގައި ބުނެފައިވެ އެވެ.