ޕެރިސް (ޑިސެމްބަރ 9): ފްރާންސުގެ ޕެރިހަށް މިދިޔަ މަހުގެ 13 ވަނަ ދުވަހު ދިން ހަމަލާތަކުގެ ތެރެއިން ބަޓަކްލޭން ކޮންސާޓް ހޯލަށް ޖާނުން ފިދާވެގެން ހަމަލާ ދިން މީހުންގެ ތެރެއިން ތިން ވަނަ މީހާ އަކީ ފުއާދް މުހައްމަދު އަގަދު ނަމަކަށް ކިޔާ ފްރާންސް މީހެއް ކަމަށް އެގައުމުގެ ފުލުހުން ބުނެފި އެވެ.
ފުލުހުންނާ ހަވާލާދީ އޭއެފްޕީގައިވާ ގޮތުން ފުއާދް މުހައްމަދު އަގަދު އަކީ އިރުމަތީ ފްރާންސަށް ނިސްބަތްވާ 23 އަހަރުގެ ޒުވާނެކެވެ.
އޭއެފްޕީގެ ރިޕޯޓުގައިވާ ގޮތުން ފުއާދު ވަނީ އޭނާގެ ބޭބެއާއި އެކުވެރިންނާއެކު 2013 ވަނަ އަހަރު ސީރިއާ އަށް ދަތުރުކޮށްފަ އެވެ. އެ ދަތުރުގައި ބައިވެރިވި ގިނަ މީހުން ފްރާންސަށް އެނބުރި ދިޔުމުން ފުލުހުން ވަނީ އެމީހުން ހައްޔަރު ކޮށްފަ އެވެ.
ހައްޔަރު ކުރި މީހުންގެ ތެރޭގައި ފުއާދުގެ ބޭބެ ކަރީމް މުހައްމަދު އަގަދު ވެސް ހިމެނެއެވެ. އޭނާ އަދިވެސް ހުރީ ފްރާންސުގެ ޖަލުގައި ކަމަށް މައުލޫމާތު ލިބެއެވެ.
ބަޓަކްލޭންގައި ތިން މީހުން ވެގެން ދިން ހަމަލާތަކުގެ ސަބަބުން 90 މީހަކު މަރުވި އެވެ. ހަމަލާގައި ދެން ބައިވެރިވީ ފްރާންސުގެ ރައްޔިތުން ކަމަށްވާ 29 އަހަރުހެ އުމަރު އިސްމާއިލް މުސްތަފާ އާއި 28 އަހަރުގެ ސަމީ އަމީމޯރު އެވެ.